Ko Hawaii Pae Aina, Volume I, Number 27, 6 July 1878 — Ke Sweet Onaona iko keia. [ARTICLE]

Ke Sweet Onaona iho keia.

E Ko Hawaii Pae Aina ; Aloha oe: - Ka pua Pikake aala paoa i na mokupuni, e lei ia mai la e na keiki o ka Ua Kukalahale. Ia oukou hoi e na Keiki lawaia amaama o Kalia, e kuilima mai kakou e lawe i ka nupepa "Ko Hawaii Pae Aina," i ike i na mea hou o ke kaua, me he la o lakou pu aku nei no, ka ua mea he maopopo o na olelo. E ua Keiki aukai huli malolo hoi o Waikiki, e paio ana me na ale o ka moana, e hoi mai kakou e walea me ''Ko Hawaii Pae Aina," ka opuu pua hau i hhope ia e ka makani Aoa, e haawi i ke Dala Hookahi no ka hapa makahiki i koe, i ike i ka nani o Aipo. Ia oukou hoi e na Kaikamahine maka onaona o Keomoku, i nohea i ke ala wai lipoa o Kahaloa, e uhene mai nei i ka poli o Ulukou, eia o 'Ko Hawaii Pae Aina," ka manu ai pua ohelu, nana e alo nei na ino o ka moana. E na Olopala hoi o Hamohamo e komo mai kakou ma nei poai anuhea, e inu i ka wai meli o "Ko Hawaii Pae Aina," ua hele a nohea i ka wela a ka la. I kuu mau hoa hoi o ka lae makani o Kaluahole, e hoonipo mai nei me ka nalu o Kalehuawehe, e hea mai i ka malihini e komo maloko, e papa leo me ko kakou Luna Lawe Pepa, alaila e puana ae oe: "Ilaila ka iini ana ole a ka manao, E ue hone nei i ke kino A loaa iho ka olu he wai ko lalo." Ua oki au maanei, ke hoi nei ke keiki kukulu pea o Waikiki. Me ka Lunahooponopono ka welina, a me na keiki ulele hua kepau ka adieu. J W Kahaulelio Waikiki-kai, 1878. Ahaaina ma Moanalua.—l ka auina la Poaono aku nei i hala, ua halii ia ae la kekahi papaaina ohuohu a luuluu i na ono Hawaii ma ka lanai i hoomakaukau ia e ka haku o Moanalua, no ka hookipa ana aku i ka moi o ke kopaa. Aole no i hiki ka mea nona ka papaaina, aka, ua luakaha ae no ke Alii ka Moi a me na hoa o ka Ahaolelo ma ia papaaina, a ua ulele iho e nuu i na ono i hoomakaukau ia a lawa pono. Ua luana loa lakou ma laila a hiki wale i na hora liula, alaila huli hoi mai la no ke kaona nei, me ka ohu o na waokele i kuiia i mea hoohiehie.