Ko Hawaii Pae Aina, Volume I, Number 41, 12 October 1878 — He Inoa lei no ka Moiwahine Kapiolani. [ARTICLE]

He Inoa Lei no ka Moiwahine Kapiolani.

Aia i Haili ko lei nani, O ka nua Lehua i Mokaulele, O ka papahi lei o ka aina, Ke kuia mai la e ka Puulena, E ka makani hali ala o ka lua, Puia i kai o Hilo Hanakahi, Hookahi hoi oe hookahi au, Ka nahele aloha o Paieie, Noho mai hano o Uwekahuna, Ka uwahi noe o Kilauea. Kupu mai ka manao lia i ka nani, I ka papa lohi lua o Maukele, O ka lohi mai kau e Wahinekapu, Ei ae ka makani o ka Ulumano, Nana i kuilima mai kanahele Like aku ai me ka nuku o ka manu, Owai hoi kai ike ia Maunakea, Aohe ona lua e like ai Haina ka Wahine nona ka Lei— O Kapiolani i ka iu o ka moku. Aia i Lihau ko lei nani, O ka ae Lehua i poe i ka manu, Ke hana mai la i ka lau makani, Ka Hono o Piilani ua lai lua, Luana i Hauola kahi manao, I ka lai hulilua a ka Maaa, Hanohano k aopua i ka malie, I ke kaa a ke ao i Maunalei, A he lei hoi no ua lai nei, No ka nalu hai-hai-maka o Uo, Ke noho nei no au i ka lulu, Me na lai elua a ka manu, Alia oe la e Haleakala E alai nei ia Kauiki Ua maikai ke alo o Piiholo, I ka noho a ka Ua Ulalena, Haina ka Wahine nona ka Lei— O Kapiolani i ka iu o ka moku. Aia i Nuuanu ko lei nani, O na Ahihi popohe i kanahele, Ke hakua mai la e ke Kiowao, Hoolawa i ka pua Kamakahala, Maikai ka hana a Waipuhia, E hooma-u nei i ke oho Palai, Wehiwehi Lanihuli i ke Kawelu, I-pu loku i ke alo o na pali, Pau ole ke onaona o Kekele, I ka ahui pala o ka Hinano, Hanohano Mololani i ke ehukai, I ka hana a ka Ua Apuakea, Akea ka ohu i na kuahiwi, Ma ke kakai pali o Maunawili, He aloha ia wai anu i ka ili, Ka uwalo a ka leo o ke kahuli, Haina ka Wahine nona ke Lei— O Kapiolani i ka iu o ka moku. Aia i Mana ko lei nani, O ka ohai o Papiohuli I pili koolua me ke kaunoa, Nonono ula i ka Wailiula, Ina paha oe e ike ana, I ka holu a ka niu o Kaunalewa, Ike la paha oe i ka mea nani, I ka punohu ula i ka moana, He elele waha ole kai hiki mai, Na ka Iwi ai Lehua o kanahele, I ka ike ana iho lana ka manao, I ka hea a ka leo o Kawikini, Kau aku ka manao no Wailua, No ka wai hooipo ka pua hau, Aohe ka heluna no Waimea, Ua like laua me Makaweli, Haina ka Wahine nona ka Lei— O Kapiolani i ka iu o ka moku. Aia i Europa ko lei nani, O ka pua kalaunu o Lakana, Ke lohia mai la e Inia Ka anapa ka Lukini e ike, Ka hulali a ka momi me ke kaimana, Me[a] e ka nani ke ike aku, Kohu me he wai e ale mai ana, Ka ahihi i ke alo o Mekiko, Me he a na ka Hokuwelowelo, I ka ilikai o ka Pakipika, Ke lawe mai la e ke kiakolu, E ka laina mokuahi o ka Hema, K@na mai ka nani i pau pono, I lai ke helena a ka Wahine, I ike mai ai na mokupuni, I ko la nui hao a paihi, Haina ka Wahine nona ka Lei— O Kapiolani i ka iu o ka moku, Aia i ka opua ko lei nani, O ke anuenue pipio iluna, Haaheo i ka mea @@ liilii, Aweawe ula i ka maka o ke ao, A he like a like me ka onohi, Me ka punohu ula i ka malie, Ke halia mai la e Kanoelani, Me ke ala koi ula koi aweawe, Ulumahiehie i ka ua noe, I ka ehu wai o Kulanihakoi, A he kahiko ia no ia nei, No ka pua kapu i ka iu o Lono I kukupu a pua ma ke Hikina, I ewe i Hawaii moku o Keawe, Ua kau ae la i Makanoni, I kahi a ka la i puka mai ai, Kaeha ka hapa a Hanakaulua, I ka oliko pua i ka malie, Haina ka Wahine nona ka Lei— O Kapiolani i ka iu o ka moku. KELIIHOOHIE.