Ko Hawaii Pae Aina, Volume IV, Number 11, 12 March 1881 — KE AHI PELE MA HAWAII. [ARTICLE]

KE AHI PELE MA HAWAII.

Ke hoomau nei no ka wahine o ka lua i kana hana hookalakupua ma kona mau aupuni elua, oia o Kilauea a me Mauna Loa, a ke hooiho mei la kekahi hapa nuku o kona inaina maluna o ka aina e aneane aku ai e hiki i Hilo, nona ka loa i koho pupuahulu ia aku, he 8 paha mile mai ke kaona aku. Na kekahi ike maka i hoaumoe ma ka home o Pele, oia ka Hon. Jos. Nawahi, i hoopomaikai mai ia makou i na lono e pili ana ia Pele, a ke waiho aku nei makou malalo iho i kana leta mea hou: Hilo, Mar. 1, 1881. Hon. Jos. U. Kawainui; Aloha oe: - Ke aloha aku nei o Mrs. Nawahi ia oe. Ua hoi mai nei maua mai ka huakai mauna no ka lua o Pele. Ua haalele maua i ka home lehua no ka lua o Pele. Ahiahi o ka la 19 o Federuari, hiki. A ma ia po, he nui ka a ana ma Kilauea, maluna hoi o Mauna Loa, a pela no ma kahi e kahe nei no Hilo. O ka loko ahi hou iloko o waena konu ka oi o ka a a me ka weliweli o ke ano o ke ahi. Aole maua i manao e iho ilalo, aka no ka olelo o ka haole kiai i ka Hale Kotele, e hele maua e ike i ka mea hou mamua o ko maua make ana, nolaila, ua iho maua me ka haole alakai, a na hoohalaia eono hora ilalo o ka lua no ke kaahele ana e makaikai hou i na mea ano e a kupaianaha hoi a ke Akua i hana ai. Ke hoomauia mai nei no ka nee ana o ke ahi pele mauka ae nei o ka ululaau no ka mamao ewalu paha mile. Malie no o Hilo nei. Me ke aloha, J Nawahi.