Ko Hawaii Pae Aina, Volume IV, Number 23, 4 June 1881 — KUU LEI ROSE, UA HALA. [ARTICLE]

KUU LEI ROSE, UA HALA.

Kuu moopuna mai ka lai o ke kaona Mai ka bele kanike o Kaukeano Mai ka hulilua o na kaa Ka piina loa o Leleo Ka ihona o Koiuiu a Kapalama Ke kula loa o Kaiwiula Hoea aku kakou o ka home olu o Mama Ilaila kuu moopuna e walea ai Auwe kuu moopuna—e, ua hala, Hoolai ka nohona a ka wahiue I ka olu o ka lau ohai O ka pa mai a ka Hanapepe Oia makani anu o Kalihi O ka home olu o mama Ilaila kakou i luakaha ai Elua maua hookahi oe Auwe kuu moopuna—e, ua hala. Ko uhane kino wailua ka'u e huli nei O ko leo i ka hea mai e paipai Kuhi au o ka leo no o kuu moopuna Eia ka he leo no ke kino wailua E hoolale mai ana ka uhane o kuu moopuna E hoi kakou i mololani I ka aina onehanau I ka home olu o na kupuna Auwe kuu moopuna—e, ua hala. S K KUPIHEA. He uhane aloha keia nou e Keanu Nou ka ka uhane i hele aku nei Ma ka ulu makani Ma ka welelau pae opua i ke kai Akahi hoi la a ke aloha i hiki mai ai Ke hahana nei la i kuu manawa O kuu moopuna paha ua hoi mai nei e Aole ka he aka kino wailua ka'u e ike nei E Keanu e hoi mai kaua. Nou ka ka uhane i hele aku nei Ma ka hono o na moku Moku kuu moopuna la kaawale Ke noho nei au me ka u me ka minamina No kou hele ana aole hoi he hea mai e Mama e mai kaua Ua pau ko'u lohe ana i kou leo Auwe kuu manaonao ia oe a E uwe ae ana au i kuu moopuna O Keanu ka ka inoa i hea aku ai au O ka ihu anu o Kawela Ua puhene kiheneia e ka lauae Ke ala ka Keanu i lawe mai nei e I hoa kakelekele o Keanu no kuu makemake Ua manao no au na'u o Keanu I hoa inu kope e pumehana ai o ke kakahiaka anuanu Ko inoa ua hala e Ua hala o Keanu kuu moopuna kuu moopuna hoi-e. O Keanu ka oi ka heke o na kuahiwi He pookela o Keanu no na mauna He kilohana o ko anu no Waialeale He kiowai kapu aku ia no Keanu He huakai makaikai na ka anu o Alakai

O Keanu ka hua i puka mai nei mai na Hono mai o Piilani Mailaila o Keanu i hele mai ai iwaho nei Ua ike Kona ia Keanu Ua lohe Koolau i ka hooulu ana o Keanu i ka lahui Hawaii O Keanu kai hiki mai i o'u nei Ua eheu ka makani he Waipao Papa olelo ana o Keanu me Kailiokalauokekoa Akahi oe a ike ia Keanu O Keanu ka inoa o kuu pua rose Oia hoi kekahi pua waiohinu a Keanu e lei nei e Ko inoa ia ua hala e. Nou ka uhane i niau aku nei Ma ke alamuku ke alaula a Kanaloa Keehi aku la i kahakaekae Noho aku la i Kealohilani i ke ao polohiwa a Kane I waiea kuu uhane o kuu moopuna I ka halii mai o ka ua ula me ka ua kea Auwe kuu moopuna—e, ua hala. Nou ka uhane e pa-e nei E mapu nei i ke ahiahi Ua ahi loko ua paila i ke aloha o ka moopuna I ka hoapili o ke anu me ke koekoe a Auwe kuu luhi haalele wale a—ua hala, MRS. MAMA KOELE. Nou ka uhane e hea nei e Papa e mai kaua O ka'u ia e huli nei e hoolono nei au o kuu keiki Kuu kaikamahine no hoi kuu hoapili Kuu hoa helo o ke alanui Na ka ihu o ka lio kaua i lawe Iliki kaua i ka piina o Kahako Hoea aku kaua ke kula o Kuala Aloha wale ka ihona o Pepehinaopala Oia wahi a maua e pili ai me kuu keiki Hoomaha aku kaua i ka malu kukui o Maialoa Aloha wale ka wai o Hiheukawa A me ka piina o Hualiilii Liilii oloko mokumokuahua i ke aloha ou e ke keiki Auwe kuu lei a-i kuu kaikamahine MR. NAHINU. Nou ka ka uhane i niau iho nei Ma ka aeone o Ilipala I walea ka uhane o kuu kaikamahine I ka nehe a ke kai o Piiakalae Kuu kaikamahine mai ka i-a uhaiaholo o ke one I ka piha kanaka nui o Kamanoni I ka wai huihui o ka Waikapu Kapu mai nei oe pau ka ikena Auwe kuu lei a-i ua hala e MRS. KAPUNI. He kanikau he aloha keia nou e Keanu Aloha ino no kuu moopuna Kuu luhi kuu lei ai haule ole Kuu hoapili o ka la o Honomuni Mai ka malu hale o Mahalei Ke lei no au i ke aloha ou e ka moopuna Ke halialia wale mai nei no ia'u O maikai ka pua o ka ilima i ka la Nononoula ka liko o ka lama Lamalama no i ka pua o ke Aalii He lii he nui na ka makua He lani hoi he milimili na ke kupuna Ko inoa ia ua hala e Auwe kuu moopuna e Kuu moopuna no hoi mai ke alakahi o Molokai Mai ka aina huli pono i ka makani Mai ka ua halii mai i ke kai Mai ka makani lawe one o Kealohuli Ke huli wale nei au i kuu moopuna Ke noonoo nei au no kau hana maikai Ka pane ana mai e mama e mai kaua Aloha wale ia leo i nalo iho nei Pau ka hoi ka i ana mai e e ai Me ka leo aloha a kuu moopuna e E mapu mai ana e baibai aku ia baibai Aloha wale ia leo a'u e hoomanao nei O ka ukana no ia a loko e hana nei O ka u o ka minamina i ka luhi o makou Auwe kuu lei aloha ua hala e Hala o maikai Maunaloa laelae i ka malie Molale ke kula o Moohalaia I ka hooholuia e Kaikioe Hoolana hoomahui ia Kaiolohia I ka paia mai e ka moae Hao ae la maloo ka lau laau Ka laau makapili o Anianikeha Kaena hewa ana ka ua naulu Iluna o Kukalia alia oe e na lehua o na Kaana Aia a hiki mai kaikioe Manu hoolale kai o Hilia e O ko inoa ia ua hala e. Kuu moopuna no hoi o ka ua nihi ao mauka o Waiuli O ka wai nae ke iho ana i kai o Makole Aloha wale ia wai awili pu no me ke kai Oia wai a kuu moopuna e auau ai Auwe kuu moopuna kuu minamina pau ole ia oe a. MRS. MAMA KALOPI. Kuu kaikamahine mai ka ua Kukalahale o Honolulu Mai ka i-a mililima o ka makeke

Mai ka wai owe mai o ka piula Aloha wale ia wai au e hea mai ai e i wai Auwe kuu ike ole ia oe a. Kuu kaikamahine mai ka piina o Keoneula Hoomaha aku i ka wai o Nuhelewai Aloha wale ke kula o Kaiwiula Oia wahi a kakou e hele ai E hiki aku ai kakou i ka home o'u o ka makua Kuu kaikamahine mai ka malu o ka ohai Aloha wale ia wahi a makou e noho ai me a'u mau keiki Auwe kuu ike ole ia oe a. MISS KAHUILA. Kuu kaikamahine mai ka olu kohai o Waikahalulu Luuluu au kaumaha i ko aloha I ka hiki ana mai o ka lohe Kuu kaikamahine ua hala Ua haalele mai nei ia makou Auwe kuu ike ole ia oe a. MRS. KAUHIAKAMA. Kuu kaikamahine mai ka ua halii mai He lou, eha ka ka ukana a kuu keiki i hiki mai nei i ka lau o ka wilou Oia hoi ke kumakena ka lihalilia i ko aloha e I ka hiki ana mai o ka lohe o kuu keiki ua hala Ka hala no ka ia nalo loa Auwe kuu ike ole ia oe a. M PALAU. Kuu kaikamahine mai ka hale makua nui Mai ka la welawela a Honomuni Mai ka hale piha kanaka nui o Makalei hale Aloha ia hale a kaua e walea ai Auwe kuu lihaliha, kuu manaonao kuu ike ole i oe a. Kuu kaikamahine mai ka lai o ke kaona Mai ka makani anu o Kalihi he Hanapepe Pee aku nei oe e ke ao opua nalowale Ke huli nei hoi au ia oe aole he loaa Eia aku nei la ae i hea i nalo aku nei Auwe kuu ike ole kuu minamina e, Kuu kaikamahine no hoi mai ka hale lana au i ke kai Na ihu o Lehua kakou i hoihoi mai Hiki kakou i ke awa o Pukoo I ka lai hoi o ka aina onehanau I hanauia hoi oe i lei ai no kuu aloha Auwe kuu aloha kuu nalowale loa a. S KUPIHEA OPIO. Kuu kaikamahine mai ka Honoonamoku E nana ana i ka moku holo ae I walea maua me kuu keiki i ka hone o ka bila Aloha ka leo o ke kai i ka nehe mai i ke one Oia kai hoala mai i ke kulu aumoe Moe au a huli ae aole kuu keiki Eia ka ua haalele mai nei ia'u e Auwe kuu keiki kuu lei a-i ua hala MISS KEA. Kuu moopuna mai ka po loloa o ka hooilo Mai ka makani anu he Hoolua Elea mea nui oloko o'u e noho nei O ka u me ka minamina ia oe a Auwe kuu hulu moopuna ua hala a Maikai ka wai o Moaula molale i ka pali Hanohano no iluna o Puupa Ke nana iho ia lalo o Halawa Nani ke one o Kaawili lahalaha i ka malie Nani ka ulu kukui o Lanikaula i ke kula Nani ka lae o Kapuupoi i ke kai I kaikaina ke aloha nau e malama nei Auwe kuu moopuna e ua hala a. KAWAINUI.