Ko Hawaii Pae Aina, Volume IV, Number 35, 27 August 1881 — HE LETA MAI ITALIA MAI. [ARTICLE]

HE LETA MAI ITALIA MAI.

REGIA ACCADEMIA MILITARE, TORINO, ITALIA, Iulai 29, 1881. I kuu hoa'loha oiaio a makamaka maikai hoi, K M Koahou, Aloha oe. E like me ka loaa pono ana aku o ka'u leta ia oe, pela no i loaa pono mai ai kau leta ia'u, ma ka aina kaawale nei, ua nui ko'u mahalo no ka loaa pono ana mai o kau leta, me ka lana o ka manao o ka makamua loa paha ia o na leta ano nui i loaa mai ia'u mai ka pae moku mai o Hawaii, e pili ana i ke Ahi Pele a kahe'la i kai o Hilo, a he mea hou ano nui ia ma Europa nei a puni, a ua kamailio nui ia ma na nupepa a pau o Europa nei. Nolaila, eia no a'u a o makou hoi a pau ke nee ae nei imua, i loaa'i hoi ke kahua no kakou, a o oukou mai mailaila a hiki wale i ko kakou lei ana i ke "oho o ka palai." Eia wau ma ka Royal Academy of Civil and Military Engineer of Turin, ma ka akau hoi o Italia nei e kokoke ana i na kuahiwi kaulana o Helevatia ma na mauna Alepa. He 300 a oi ka nui o na opio o keia hale ao. He poe keia i hoonaauao ia ma na Kula nui e, a owau ka Hawaii iwaena o lakou. O ka poe ma ke kaua lio a me ka puali koa ma ka Eneginio, he poe makaukau kiekie loa lakou ma na mea helu, a eia ia nei na kumuao akamai loa ma na mea hellu. O ka olelo Farani ko Eu ropa nei olelo kaulana, he nui ka oluolu o keia poe Italia a pela pu no hoi me ko Farani, he nui ka oluolu o na haumana o keia kula ia'u. O Generala Geamotti ke poo o keia kula a he kanaka oluolu loa hoi oia, i ka nana ana i na opio a pau o keia kula, ua kohu poe keonimana. He oluolu loa ke kau o keia wahi, a ua like loa no me kekahi wahi o Hawaii. Ma Europa nei, he waina a me ka bia ka wai e inu ai, a o ka oi loa aku nae ka waina ma Farani me Italia nei, aohe nae he poe ona, aka, he poe eleu a helehelena maikai a ikaika ko lakou. Ua hoouna aku nei a'u i kou aloha i ko'u mau hoa aukai, ia James K Booth, ma ka Royal Military Academy of Naples, Robert N Boyd ma ka Royal Naval Academy of Naples. E haawi oe i ko'u aloha nui loa i na Hawaii ponoi a pau o Hilo, a me na wahi e ae e hui ana me oe, e hooikaika hoi e hoouna na Hawaii ponoi ma ko kakou Ahaolelo o ka M H 1882 nei. Me ka awiwi, aloha nui loa oe. Owau no R W WILCOX.