Ko Hawaii Pae Aina, Volume VII, Number 13, 29 March 1884 — KA LA 12 O FEBERURI. [ARTICLE]

KA LA 12 O FEBERUARI.

[Koena mai ka Helu 12 mai] Ma keia aoao, mamao loa aku o Kauikeouli mai ka lalani aku o Kapaakea, a pilipili ole aku hoi o Kalakaua ia Kauikeouli. Ma ka Papa mua a me keia Papa, aia wale no o Kauikeouli i kiekie wale no. Ua komo oia iloko o na Papa alii mua ekolu, oia hoi ka Niaupio, ka Pio ka Naha. Aole hoi ona koko hakina alii, he koko alii holookoa no. 3 Kauikeouli, he Peleiholani, he Kaleiopuu, he Kiwalao, he Keopuolani. Ua hoomaopopoia keia ma ka aoao o Oahu, a eia ka hoonohonoho ana o keia Papa. O Peleiholani o ke keiki a Kualii ka moi o Oahu i noho ia Kamakaimoku w. hanau o Kaleiopuu k; a o Kaleiopuu k; noho ia Kalola w, hanau o Kiwalao k; noho ia Liliha w, hanau o Keopuolani w; a o Kamehameha I k, noho i Keopuolani w, hanau o Liholiho k; Kauikeouli k, me Nahienaena w. O ko Peleiholani ike ana nana ke keiki, nolaila, kauoha aku oia i ka wahine ia Kamakaimoku, "a i hanau oe a he kaikamahine, e hea iho no oe ma kou aoao, aka, ina hanau oe he keiki kane e hea iho oe i ka Leiopuu o kuu makuakane," oia hoi he niho Lei Opuu; a no Kualii ia Lei, oia ka hea ia o Kaleiopuu. Ma keia aoao o Kaleiopuu a i kana keiki ia Kiwalao, a i kana keikamahine aku o Keopuolani, a i kana mau keiki aku ia Liholiho, Kauikeouli me Naahi enaena, i enaena loa ai ke kapu o keia mau alii, a pili loa ae ke kiekie o ke koko alii iloko o Kauikeouli. A ma keia aoao nohoi, aohe no wahi e pili aku ai o Kalakaua ia Kauikeouli, a ma keia aoao no hoi, i pakui loa ia ae ai ke kiekie o Kauikeouli maluna ae o na alii a pau, a e lilo ai oia he akua ma kekahi ano; a pehea auanei ko aoao e ka Elele e paikano mai nei, a he kiekie ae o Kalahaua [pn] ia Kauikeouli. He wahahee, a he hilahila ole keia pukapai ae. Oia ka aoao o Kauikeouli ma o Kaleiopuu la, a e nana hou ae kakou ma ka aoao o Kalola kana wahine, a o ka makuahine hoi o Kiwalao. 4 O Kekaulike ka moi o Maui, i noho ia Kekuiapoiwa Nui w, hanau o Kamehameha Nui, o Kalola w, Kahekili k, a o Kaleiopuu k, noho ia Kalola w, @

o Kiwalao k; a o Kiwalao k noho ia Liliha w hanau o Keopuolani w; a o Kamehameha I k, noho ia Keopuolani w hanau o Liholiho I k, Kauikeouli k, Nahienaena w. 5 E nana hou kakou ma ka aoao o Liliha w, ka makuahine o Keopuolani. Aia ma ka Papa elua o keia hoonohonoho kupuna ana, ua ikeia o Keeaumoku k, ke kane a Kamakaimoku w, hanau mai o Kaleiopuu k, ka mua a o Keoua k ka muli. A o Kaleiopuu, k, noho ia Kalola w, hanau o Kiwalao k, a o Kalola w, noho hou ia Keoua k, hanau o Liliha w, a o Kekuaiapoiwa kekahi inoa. A o Kiwalao k, noho aku nei ia Liliha w, hanau mai o Keopuolani makuahine o Liholiho Kauikeouli me Nahienaena, w. O keia hoao ana a Kiwalao me Lililiha w, he hoohui Naha ana keia, a o keia hoohui ana no hoi, he mea hou no ia e hoonui hou ae ai i ko Keopuolani alii kiekie loa ana, a me ka wela enaena o kona kapu. E ka poe heluhelu, e ike oukou i ka aoao o Keopuolani w, ka makuahine o Kauikeouli, a ole loa he wahi e maalili ai ka enaena o kona kapu alii ma kona mau aoao a pau, a pehea hoi e emi iho ai ko Kauikeouli koko alii o kana keiki i ko Keohokalole a me ko Kalakaua. Aole e haule o ka aoao piikoi no ke ha- . ule pahu i lalo e like me na mea i hoike mua ia aku no ko laua mau aoao. MAHELE ELUA. E ka poe heluhelu, e huli ana kakou a nana ma ka aoao o ka makuakane o Kauikeouli. 1 Kauikeouli, he Keaweikekahialiiokamoku, he Keeaumoku, he Koua, he Kamehameha I. O Keaweikekahialiiokamoku k, noho ia Kalanikauleleiaiwi w, hauau o Keeaumoku k, a o Keeaumoku k, noho ia Kamakaimoku w, hanau o Kaleiopuu k, Keoua k, a o Keoua k, noho ia Kekuiapoiwa II hanau o Kamehameha I k, a o Kamehameha I k, noho ia Keopuolani w, hanau o Liholiho, Kauikeouli k, Nahienaena w. O keia noho ana a Kamehameha I me Keopuolani w, he ano noho Naha ana. No ka mea, he kaikamahine o Keopuolani na Kiwalao ke kaikuaana Haku ona, a nolaila, lawe ae o Kamehameha I ina keiki i loaa iaia me ke kaikamahine a laua i mau Lei nona a he mau Akua kekahi olelo ana, a ma ka hanau ana, ua hea oia ia lakou he mau moopuna nana. O ke kumu o keia mau kapaia ana, no ke kiekie loa o ko Keopuolani aoao. Aole nae e emi iho o Kauikeouli ma o Kamehameha I la, no ka mea, ua paʻi a paʻi o Kaleiopuu laua me Keoua na makuakane o Kiwalao laua me Kamehameha; ua paʻi a paʻi no hoi ma na makuahine o laua nei. . O keia aoao o Kauikeouli, aole ia e loaa aku ia Kalakaua me Keohokalole o ka lalama hele ana ae, a o Kauikeouli ka mea e hoopapa aku ai, o ka oi ae o ke koko alii o Kalakaua, he wahahee a lalau loa keia. 2 Kauikeouli, he Kahekili he Kamehameha I, a penei ka hoomoe ana o keia Papa: O Kahekili kane noho ia Kekuaiapoiwa II hanau o Kamehameha I k, a o Kamehameha I k, noho ia Keopuolani w, hanau o Liholiho k, Kauikeouli k, me Nahienaena w. O Kahekili moi no keia o Maui, a kaikunane no hoi o Kalola w, ka makuahine o Kiwalao. [Aole i pau.]