Ko Hawaii Pae Aina, Volume VIII, Number 31, 1 August 1885 — HE MAU PAA MARE. [ARTICLE]

HE MAU PAA MARE.

Ka nupepa Ko Hawaii Pae Aina, Aloha oe:— E oluolu ae e hookomo iho ma kahi kaawale o kou mau kolamu i kela mau hua e kau ae la maluna. Ua hoohui ia o Sam. Paniani me Luika Kalai, a o Jeo Kupalai me Luika Kahaleanu ma ke kakahiaka Poaono, hora 10, e E. Helekunihi, maloko o ka berita mare, ma ka halepule o Paihiihi. Ua malama ia ke anaina nui o na paa mare me ka maluhia, ma ka pule a D. W. Marry, a mahope iho o ka pau ana o kana pule, ua ku mai la o J. P. Haulani me kana mau haumana mikioi a milolii hoi, ma ka hookani ana mai i ko lakou mau kileo i na mele i haku noeau ia e P. Haulani, a ma ko'u nana aku ua piha au i ka mahalo. Ua like ka leo o na kaikamahine me na o-u leo lea o ka ua Ukiu, o na keikikane hoi haohao, i ka hele no hoi a ko'uko'u i ka puu. Mahope o ka pau ana o ke mele, ua ku mai o Helekunihi a hai mai i na manao hoolana i mua o ke anaina e pili ana no na paa mare opio i hana ia ma ia la, Pau ia; ua hookuu na hana me ka pule a E. Helekunihi. I ka hookuu ana o na hana, ua eleu mai la o Kapena Haulani ma ka hoopololei ana i ka huakai ma kekahi lanai nui i hoomakaukau ia e P. K. Kamoa a me K. K. Kepoo, a ua hiki aku ka huakai o na paa mare ma kahi i hoomakaukau ia e ua mau makua la. Ua lako ka poi a me ka io puaa maluna o na papaaina elua, a ua ai kela a me keia a kena i na kohi kelekele a ka puukolu. Mahope o ka pau ana o ka paina, ua malama hou ia he anaina haipule ma ka hora elua o ka auina la, malalo o ke alakai ana a D. W. Marry a me B. K. Luna, a ma ka hora 3, ua hookuu ia ka hana, a noho hou ke anaina e hoonuu i na ono iho i koe, a ma ka hora 4, ua hookuu ia na hana o ka la me ka maluhia. William Kahoohie Paihiihi Hamakuapoko Iulai 5 1885