Ko Hawaii Pae Aina, Volume VIII, Number 42, 17 October 1885 — NA MEA HOU O PAIHIIHI. [ARTICLE]

NA MEA HOU O PAIHIIHI.

I kuu "Pae Aina" Aloha; Adieu wale kaua:—Ua loaa mai ia'u he wa kupono e hoouna aku ai imua o kou mau kolamu i kela mau hua e kau ae la maluna, a na kou ahonui hoi ia e puili pu aku me kou mau tausani poe heluhelu. Ka Aha Mele Nui ma Paia. Ma ka po Poaono i hala aku nei, oia hoi ka la 3 o Oct, ua wehe ia he Aha Mele nui maloko o ka luakini o Paia, mai ka papa himeni kaulana mai o Paihiihi, ka oioi hoi o Maui Hikina, a o ka papa himeni hoi nana i hoala na kupa hiamoe o ka aina haaheo (Kohala.) A o na pomaikai a pau e loaa ana, no ka pomaikai o ka ekalesia. Ua hoomaka na hana i ka hora 7 P.M. a pau i ka hora 8 P.M. ua ku i ka anoi na mele i mele ia mai, a o ka oi aku paha a'u i hoomanao iho ai, o "Nebukaneza" a me "Pulu i ka huna kai" ke hele la a nei ka papa hele o ka luakini. O ka huina o na loaa he $15.00, aole no i nui loa ka poe makaikai. Ke Anaina Halawai. Mahope iho o ka pau ana o na hana mele, ua noho no ke anaina pela, a ua malama ia ke anaina haipule na B. W. Keanu o Wailuku, a na piha i ka hauoli, ma kana mau hoakaka piha ana. A ma ka hora 10 P.M. ua pau ka halawai. Ka Halawai Hoole Waiona. Mahope iho o ka pau ana o ke anaina haipule, ua noho ka halawai Hoole Waiona, a o ka oi loa aku o ko'u mahalo, o ka noho paa loa o ke anaina me ke kali ana a pau pono na hana. I keia manawa i ku mai ai o Melekelina, a hoakaka mai la i na kumu o kona hoala ana i keia halawai ma Paia. Mahope iho o ka pau ana o kona mau hoakaka ana, ua ku mai la o Rev J. P. Kuia, a heluhelu mai la i ke Kumukanawai nui, a i ka pau ana, ua kakau inoa na poe a pau e makemake ana e hoole i ka inu ana i ka waiona, a ua hiki aku la ka huina o na lala i loaa ma ia po i ka 26, me ka holo pono o na hana. Ma ia manawa no ua kohoia na luna nui, penei: J P Haulani : : : Peresidena J B Luna : : : Kakauolelo Rev J P Kuia : : : : Puuku. Nolaila, eia ke ku nei he halawai Hoole Waiona ma Paia nei. He wahi Paina Luau. I ka pau ana o ka halawai hoole waiona, ua kukala mai la ke kahu Rev J P Kuia, e noho no ke anaina pela, a hiki i ka wa e kani mai ai ka bele, alaila, o ka wa ia o na mea a pau e hele ae ai e paina, i kahi mea i hoomakaukauia. Aole no i pauaho iho ke anaina ua noho no lakou. I ke kani ana mai o ka bele ua hele aku la na mea a pau, a haupa iho la i na kuhinia a ka puukolu, a o kou mea kakau kekahi malaila. a ma ka hora 11.30 P.M. ua hoohiki aku la kou ea kakau ma ka home, a me na hoa a pau oia uka. E kuu Pae Aina, e hoike ae oe ma ke akea. O kuu mahalao a me kuu piha hauoli, maluna no ia o na keiki pulu i ka huna kai o Alenuihaha, a me ke kahu Rev J P Kuia, a maluna hoi o ke anaina, i hoomanawanui mai e ike i na hana o ia po ko'u aloha nui, a no lakou au e hoomanao nei i na wa a pau, Good Bye kakou. Na Hipa a ka Haku. Ma ka la Sabati iho nee la 4 o keia malama, ua hoohui hou ia mai he 10 mau hoahanau hou iloko o ka ekalesia o Paia, a ua hipuu ia lakou me na hoa kahiko o ia ekalesia ma ke Kaula Kaa kolu o Ka manaoio, Ka manaolana a me ke Aloha. No Paihiihi mai he 4 hoahanau, a no Haliimaile mai he 6. Nolaila, maluna o lakou ko'u manaolana, he poe hana i ka hana. Ka i-a ku ma Maui nei. Eia ma na Kahakai o Hamakuapoko nei ka i-a ku he Moilii, a o na wahine a me na kane ia e hele nei i ka lawaia me na upena makika, aole pela mamua a'u i ike ai, he hapa ia, a he oi aku no keia, ke hele ala a kapalili iluna o ka holopapa, aole pela ka Alalaua, aka, ma ke ano mau o kanaka Hawaii, ke koho koho nei no lakou, me ka olelo ana, he kanaka aku no ka hopena, pela io ana no paha. Hoike Kula Sabati. E malamaia ana he hoike Kula Sabati no na Kula Sabati o Paia nei ma Paihiihi. Ma ka la 18 o Okatoba e hiki mai ana, e malama ia ai, na hana

hoike. Na wai la auanei e papahi i ka lei o ka hanohano. Ma keia wahi, ke hooki nei au i ko'u kui lima pu ana me oe, a me ko'u mau hoa ka welina, a me oe hoi ka Adieu hope loa, a na ke au o ka manawa e hoike mai i ko kaua hui hou ana, oiai ke hea mai nei kai Ua Ukiukiu iaʻu e hoi maua e pili. Owao iho no. LUINA.