Ko Hawaii Pae Aina, Volume VIII, Number 52, 30 December 1885 — HE UI, HE NINAU. [ARTICLE]

HE UI, HE NINAU.

Eia ma ka apana o Honolulu nei, he lehulehu wale o ka poe kupono i ke koho balota i komo maloko o na puali koa a me na hui kinai ahi. E ia ka ninau, e haawiia ana anei he palapala kupono i ke koho balota kaawale, no ke kanaka hookahi i komo i ka puali koa a me ka hui kinai ahi ? E makaala ko Honolulu poe holo balota i keia mea ano nui, a e hoole i ke koho ana o ke kanaka no elua manawa kaokoa i haawiia keia hana alunu. Eia hoi kekahi, pehea na koa pualu, ua kaawale a haalele i keia apana no kekahi manawa loihi a e noho mai nei ma na kuaaina ? E ae ia ana anei kekahi kanaka okoa e ae no ka palapala kupono i hoopukaia no ke koa e noho ana ma kahi e ? Ua mahui a ike lihi makou i ke kau i hala i kekahi mau palapala kupono i ke koho balota i hoopuka papalua ia, aka no ke kaawale o na moho holo lunamakaainana mai ka pahu balota mai e lohe ole ia ai na inoa o ka poe koho i ka wa e hele aku ai e hookomo, nolaila ike pono ole ia aku na koho ana a me na inoa i haiia i ka wa e ninauia mai ai. Ua hiki ia makou ke lawe mai maanei a hoikeike aku, ua ikeia ma ka papa inoa o ka poe kupono i ke koho balota o ke kau i hala ka inoa o S. H. Haaheo, aka ua kaawale loa nae oia i Puna no kekahi mau makahiki loihi. Ia wai la i haawi ia ai kela palapala kupono i ke koho, a owai la kai koho ma kona inoa ? He koa oia, a me he mea la, na ua aliikoa paha i kii a lawe mai i kona palapala kupono i ke koho me ka ike no aole oia maanei. Na keia mau kinaunau i ikeia i kono ia makou e honaauao aku i ka poe moho e holo balota ana.