Ko Hawaii Pae Aina, Volume VIII, Number 52, 30 December 1885 — E HOONAAUAO IA OUKOU IHO! [ARTICLE]

E HOONAAUAO IA OUKOU IHO!

Ua lohe ia na olelo a na Luna Ohi Auhau naaupo o kekahi mau apana, ina e hookaa ole ia na auhau o na kanaka Hawaii mamua ae o ka la 15 o Dekemaba, alaila e nele ana ko lakou pono koho balota. Ke hoike aku nei makou i mua o ka lahui, aohe oiaio o ia mau olelo. No ka mea, ua hoopuka kekahi lunakanawai o ka aha kiekie i kekahi olelo hooholo e haawi ana i ka mana kupono i na kanaka Hawaii a pau a kupa Hawaii paha, ke hookaa lakou i ko lakou mau auhau mamua iho o ka la hope loa e noho ai ka Papa Nana koho balota. O keia olelo hooholo, ke paa nei ia he kanawai no ka aina oiai e kue a hoopii ole ia ana ia olelo hooholo. Oiai o keia au hooponopono aupuni he au ia o na hana eepa lehulehu i kahakahaia ma ko kakou moolelo lahui, a e haupa ana hoi na luna aupuni hana kolohe e lilo ia lakou na lanakila ma na hana ino a pau e ko ai ko lakou makemake, ke kau leo e aku nei makou i ka lahui mai o a o, e ku me ka makaukau, a e mikiala ma na la e noho ai na papa nana koho balota no ka paa o ko oukou mau inoa ma ka papa inoa o ka poe kupono i ke koho balota. Ina aole i paa, e koi aku e hookomo i na inoa o oukou i haule.