Ko Hawaii Pae Aina, Volume VIII, Number 52, 30 December 1885 — HO! KAPENA! [ARTICLE]

HO! KAPENA!

Oiai e hoemi mau ana ke aupuni o America Huipuia i kona aie lahui i kela a me keia malama, pehea aku nei la kau hana e Kapena no ko kakou aie lahui ? Ua nele ko makou ike i na hoike o keia hoemiia ana o ka aie lahui ma kau mau hoike hapaha e puka mau nei, a me he la no paha me ia nele e hookaa ole ia ai ka aie lahui o Hawaii nei. Ua ike makou ma ka Bila Haawina o ka 1884 i hala, i na huaolelo i kahakahaia malalo o ke poo o ka Oihana Waiwai, penei: "Aie aupuni e ukuia ana $176,200; uku panee no ka aie aupuni $150,000." Pehea, ma kou ano kanaka Hawaii, ke hooko nei anei oe i keia kauoha kanawai, a i ole ia, ke hoopanee aku nei paha oe a mahope ! mahope ! a i ka wa e lilo ai o Hawaii nei i ke kuaiia i ka $14,500,000.