Ko Hawaii Pae Aina, Volume VIII, Number 52, 30 December 1885 — KA MOKUAHI "MARAROA." [ARTICLE]

KA MOKUAHI "MARAROA."

I ka hora 5 o ke ahiahi Poakahi iho nei, Dekemaba 21, ua ku mai ma keia awa ka mokuahi nani a maikai "Mararoa," no ka manawa mua loa, mai na panalaau mai o ka hema. He keu keia o ka mokuahi i hoonani maikai loa ia. Ua kuhi makou o na mokuahi "Mariposa" a me "Alameda" la ka oi, e ia ka hoi o ka oi mai nei keia. Ua kapiliia keia mokuahi hao kila ma Enelani e Denny a me na Hoahahau. O kona loa, he 320 kapuai; laula, 42 kapuai; a o ka hohonu he 26 kapuaai. Ka nui o kona mau tona, he 2,600, a ua hiki iaia ke lawe i na tona ukana he 2,200 ka nui. Haalele keia mokuahi ia Kikane i ka hora 5 P. M. o ka la 4 o Dekemaba a ku ma Nu Kilani i ka hora 8 P. M. o ka la 8 o Dekemaba. Haalele ia Nu Kilani i ka hora 4:20 A. M. o ka la 9 a ku ma Honolulu i ka hora 5 P. M. o ka la 21 o Dekemaba, he elua hora oi ae o ka holo mamua o na wa holo loa i ikeia ma na moolelo ma i ia awa a i keia awa. Haalele ia Honolulu i ka hora 10 P. M. o ka la 21 o Dekemaba, a e ku ana paha ma Kapalakiko i ka hora 12 awakea o ka la 28 o Dekemaba, oia he 6 la a me 12 hora mai Honolulu aku nei, no ka mea, oia ka manawa a ke kapena i manao paa ai e ku aku ilaila.