Ko Hawaii Pae Aina, Volume VIII, Number 52, 30 December 1885 — NU HOU KU WAHO. [ARTICLE]

NU HOU KUWAHO.

Ma ke ku ana mai a ka moku pea Eureka i ka la 19 aku nei i hala, ua loaa mai keia mau mea hou malalo iho: NO AMERIKA. Ua loaa aku i Generala Howard o na Puali Koa Amerika e noho mana ana ma ka mahele o Platte ke kauoha mai ke Kuhina Kaua aku, e hoouna i mau puali koa i Loko Paakai. No ka mea, na nui ka nune o ka lehulehu malaila no na haunaele e upu wale ia la e hiki io mai ana malaila. Nolaila i hoouna e ia ai na koa e malama i ka palekana o na ola kanaka a me ka maluhia o na waiwai, a e hoakakuu iho hoi i ka pioloke e na manao. Ma ka noho ana o na luna senate Ripubalika ma Wasinetona i ka la 5 o

Dekemaba, ma ko lakou halawai malu na hooholo lakou, e waiho mai i ka inoa o Keoni Seremana i Peresidena no ka manawa no ka Ahaolelo Senate. I ka wa i hooholo ai na luna senate Ripubalika e waiho i keia inoa, ua ku ae o Keoni Keremana a haawi aku la i kona mau hoomaikai i mua o kona mau hoa senate. Ma ia la hookahi no, a ma ke kulanakauhale o Wasinetona, ua hui ae na luna senate Democarata a ua hooholo lakou e waiho aku i ka inoa o luna senate Harris o Tenesi i Peresidena no ka Ahaolelo Senate. Ua ae o luna senate Harris i kona inoa e hana ia pela, aka aole paha e puka ana. Ua hui ae na lunamakaainana Democarata o ka Hale Ahaolelo nui ma Wasinetona, a ua hooholo lakou o ka lunahoomalu mua no o ke kau i hala ko lakou luna oia o Carlisle o Kenetuke. Ua hooholo ia he olelo hooholo, e ka hui malu o na luna senate Ripubalika e hapai kokeia ka noonoo e ka Ahaolelo nui Helu 49 no ka hookaawale ana no ke koho ana i ke pani no na Peresidena e ulia ana e ka poino. Ua hoouna ae o Samuela J. Tilden i kekahi palapala i ka luna hoomalu Democarata Carlisle e paipai ana no ka pono e hoolako ia na kapakai o America Huipuia me na papu pale aku i ka enemi, a me ka hilinai o kona manao e kau ia ona dute no na waiwai komo mai i kulike me ko ka aina. Ua nui ka huhu o na poe kilo aupuni Democarata i ka hoala ia ana mai o keia manao i ke kanaka i koho ia i Peresidena a ma ke apuka i haule ai. I ka po o ka la 4 o Dekemaba a me ka la 5 ae, ua pa ae kekahi makani ino ikaika loa ma Colon, America Waena a ua hoopoino iho la i na ola kino, na moku ma ke awa, na uapo pili moku a me na waiwai aohe i kana mai.

O kela alakai kipi o Peru, nona ka inoa Caceres, nona na koa a me na aliikoa i oleloia mai ai ua haalele iaia, ua lawe ae la i ka hoomalu ana o ke aupuni, oiai ka Peresidena a me na kuhina a na mana nui i ae mai ai e haalele ana i ka aina. O na poe keia i hoopaahao ia ma Lima no ke kue i ke aupuni o ka Peresidena mua iho i pau aku la i ka naholo, ua hookuu laelaeia aku e keia Peresidena hou i kaili ae la i ka mana aupuni. O Col. Frias, he mea pipili loa mahope o Peresidena Yglesias ua hopu ia a hoopaahaoia ma Kalio. Ua hao ae na aupuni o Kile a me Agentine o America Hema, i kela aina nui o Pategonia e moe la a hiki aku i ka lae Kepohoni. O ka hapa ma na kapakai o ka Pakipika, a oia hoi ka hapa waiwai loa, ua lilo ia Kile. O ka hapa ma na kapakai o ka Pakipika, ua lilo i ke aupuni o Agentine. NO EUROPA. Ladana, Dec. 5.—O ke kulana kilo aupuni i keia po no na mea pili i ke koho balota, o kekahi ia o na mea hoouluhua i na aoao kilo aupuni like ole ma Enelani. I ka pau ana o keia pule ua pai na poeikohoia o ka aoao kuokoa me ko na aoao pili alii a me na Ailiki ke huiia laua. Aka he nui no nae na apana koho i koe e maopopo lea ole ai ke kulana ma keia wa. Ua eo i ka aoao kuokoa na poeikohoia, he 313, na poe pili alii, 243 a o na Ailiki he 70. Oiai, he 70 ka oi o ko Pohakuhauoli i mua o ko ka aoao pili alii, aka pa-i nae a pa-i ina e huki like ana ka aoao pili alii me ko na Ailiki. He kanahiku na apana koho i koe aole i koho. Mailoko mai o keia heluna, he 22 no Enelani iho, 1 no Wale, 4 no Sekotia a he 17 Ailiki. Ma na koho a ka poe i maa i ka nanaina o keia koho balota, e like ana ka mahelehele ana o ka Ahaolelo penei: na poe kuokoa 331, na poe pili alii 225 a o na Ailiki he 84. Ma ka lono waea olelo i ka nupepa Taribiune o Nu Ioka o ka la 6 o Dekemaba, ua ike ia iho, ua hoole o Serevia i na kumu a Bulagaria i waiho aku ai, oia na lilo kaua Bulagaria a me ko na koa Bulagaria noho paa ana ma ke kulanakauhale o Pirot ma Serevia, a me he mea la ua hoomaka hou mai la ke kaua. Ina e hoomaka hou ke kaua, alaila e kauo ia ana o Auseturia e komo e kokua ia Serevia, a e kono pu ia ana o Rusia e komo mai e kokua ia Bulagaria. Ekolu mau halawai pinipine ana a ka aha kuhina o Serevia no ka noonoo ana i na kumu hoopau kaua a Bulagaria, a ua lokahi lakou i ka hoole ana i ua mau kumu la, aka mamuli o ko Serevia kena ia ana mai e ka aha uwao o na mana nui e kapae i ke kaua, nolaila ua kauohaia na Alihikaua o Serevia e kali no na lele kaua aku a Bulagaria. Ua hiki ae ka lono i Viena mai Serevia ae e hoike ana ua hooholoia e kuahaua aku i ke kanawai koa ma na palena a pau o Serevia.