Ko Hawaii Pae Aina, Volume XII, Number 33, 17 August 1889 — KA MAKE ANA O CHUN LUNG. [ARTICLE]

KA MAKE ANA O CHUN LUNG.

I ke ahiahi Poakahi nei, Augate 12, ma ka hale noho o ka makuakane ma Nuuanu Honolulu nei, make iho la o Mr Chun Lung keikane mua loa a C. Afong Esq. mai kekahi mai i loaa iaia. Ua hanauia oia ma Kina i ka makahiki 1852, aka ua holo mai oia i Hawaii nei, i kona wa he 14 makahiki. Ua hooaaauao mua loa ia oia ma ke kula olelo Enelani a Mr. A. T. Atkinson, a mahope iho ua komo loa i ke ku lanui o Punahou. Mahope o ka pau ana o kona noho haumana ana, ua holo loa aku oia e hoolawa i kona hoonaauaoia ana ma ke Kulanui o Iale ma America Huipuia, a oia kekahi o na haumana kiekie, a puka mai la me ka hanohano nui —-a-oia keknhi o na haumana ekolu i haawaiia na haiolelo aloha hope la i ke kula. Ua anoi aui ia kana haiolelo a ua hoolaha akea ia e na nupepa o Amerika Huipuia. Mahope koke o kona puka ana ua noho oia ma ke Keena noho o Kina ma Wasinetona ma ke ano maheleolelo. Ma laila aku ua hoounaia e ke aupuni o Kina i Peru Amerika Hema e hoopiha i kekahi kulana malaila. Ua mahaloia kona mau hookauwa ana no kona aupani malaila, a nolaila ua hooleiia mai iaia ke kea hanohano o ke "Pihi Keokeo" e ka Emepera me kekahi aina i haawi makanaia mai. Ua noho hookauwa oia no kona aupuni he mau makahiki, a ua kaahele i kekahi ma America, I kona wa ma Kina, ua mare oia he wahine pake, He elima paha i makahiki i hala aku nei, ua hoi mai oia Honolulu nei, a lawe i ka noho Luna nui ana no ka mahiko o kona makuakane ma Pepeekeo, Hilo. Ua waiho iho oia mahope nei he wahine a me elua mau kamaiki.

Ma ke kakahiaka Poalua nei, ua hoolimalima ia ka mokuahi “Iwalani” e kii i ka wahine, a ma ke kakahiaka Poakolu nei i hiki mai ai ka wahine kanemake. Ma ka hora 4 ahiahi Poakoiu no, ua hoolewaia kona kino kupapau me ka ukali nui ia e na makua, ka wahine, na pilikana na makamaka a me na hoaloha, a kanu ia ma ka iliaa o Maemae ma ka lawelawe haipule ana a Rev E G Beckwith kahunapule. O na hapai pahu, Hon. M. P. Robinson, Hou. W. O. Smitb, C. R, Hendry, W. S, Akana, C. Winan a me C. Ah Lee.