Ko Hawaii Pae Aina, Volume XIII, Number 32, 9 August 1890 — KA MOKUAHI HAWAII "CLAUDINE." [ARTICLE]

KA MOKUAHI HAWAII "CLAUDINE."

O keia mokuahi hao Hawaii hou maluna ae i kapiliia ma Glasgow, Sckotia, e Messrs Napier, Shanks a me Bell no ka Hui o W G Irwin & Co., a i haalele aku ia laila ma ka la 2 o Mei a holo mai ianei, ua ku mai ma Honolulu nei i ke kakahiaka nei Poakahi nei, Augate 4, 1890, mahope iho o kona halawai ana me kekahi mau ulia ma kona ala moana, Mahope o ka haalele ana ia Glasgow, ua kipa ae oia ma St Vincent i ka ia 15 o Mei, mamuli o ka pau loa ana o na epaepa o kona huila i ka hakihaki a me ka holo ana me ka pea wale no a pau na mile he 250 ku i ke awa. Ua hookomo hou ia he huila ma keia awa, a ma ka la 24 o Mei, haalele aku la ia St Vincent. Ma ke aumoa o ka la 11 o Iune, kalewa ae la pia mawaho o ke awa o Montevideo, Urugua, Amerika Hema, aka no ka nui o ka inoaole oia i komo iloko o ke awa ahiki i ka la 13 o ia malama. I komo oia i keia awa, i mea e loaa ai ona wai hou no kona mau ipuhao. Ma ka la 17 ae, ua haalele ia laila a holo mai la no Honolulu nei malalo mai o ka Lae Hao ma ke kowa mai o Magalelana. He eono manawa o kona hekau pinepine ana ma ke kowa, a ma ka la 1 o Iulai, akahi no oia a komo mai i ka moana Pakipika, e pakika ana no ke awa o Kou. Ma ka hora 4 wanaao Sabati, Augate 3 ikeia o Hawaii, a ma ke kakahiaka Poakahi mai, halulu ana i keia awa. He mokuahi hao kila o "Claudine" nona ka nui he 785 tona. O kona loa, he 184 kapuai, laula 32 kapuai, hohonu 17 kapuai. O ka ikaika o kona enegini mahu, ua like me ko na lio he 1000. He mokuahi keia nona ka holo he 12 mile i ka hora ma o ka l2 yona lapahu e pau o ka la. He 24 ka nui o kona mau keena moe, a ua hoolawa ia ka moku me na lako a pau o keia wa hou e holo mua nei ka naauao. Aole i maopopo kana huakai hoau ma keia mau kai.