Ko Hawaii Ponoi, Volume I, Number 26, 10 December 1873 — E ola ka Moi i ke Akua. [ARTICLE]

E ola ka Moi i ke Akua.

E Hawaii o Keawe! Mai na kapakai a na kuahiwi ! E haliu mai i ka leo O kou Lahui makamae E Kona kai opua ! nou ka lai,— Ka malie ; waiho wale na kuahiwi, Na ka eka aheahe o kou ehu kai E hooluolu; kbna hiolani ana. E Mauna Kea ! kelakela oe ; Nou ka hoopulu ia e ka hau anu, Na kou mau kehau huihui, E hōoluolu ; i kona noho ana. E Mauna Loa ! kuahiwi loa oe ; Nou ka loa paa na ino hikina, A na ka inalie molale maikai, E hooluolu ; i kona hele ana, E Hualalai hoi ! kuahiwi lai ʻoe Nou na ea maikai o ka lewa, Na onaona hoi o ka Waokele Ooe kona ukali ma na wahi apau. A, e na kupa ! na Puuwai Hawaii ; Malama, kiai, i kona kino, Hiipoi me ka maluhia, i kona ola, Ma kana mau huakai hele apau. Kona ola, kona lanakila ; ' Ka leo nu o kona Lahui! Mai na kihi apau eha E ola ka Moi i ke Akua ! _ Kahikina Kelekona. Honolulu, Dec. 1, 1873.