Kuokoa Home Rula, Volume VI, Number 50, 11 December 1908 — E Hoomakaukau no Mua Aku Nei. [ARTICLE]

E Hoomakaukau no Mua Aku Nei.

Ma na ninau apau, na kumuhana, na kumumanao ame na hana i koiia ai ke kanaka noonoo e hana aku, e ku mua ana oia ma ke kahua e hoomakaukau ana iaia iho ma na anuu a ma na keeihina apau e loaa ai iaia ka makaukau no ka hooko ana aku i ka mahele hana i kau iho maluna ona. Aia a maikai me ka pololei ka hoonohonoho ana o ke kanaka i kona mau manao alakai hana, e hele auanei ua hana la me ka holopono. E ike e ana ua kanaka nei me ka hoihoi a hauoli hoi o kona noonoo, mamuli o ka loaa ana iaia o na hoomakaukau pono ana i ola-honua, e hiki ana iaia ke lawelawe i kana hana i hoolala ai me ka hololea. Aole e ioaa keia ano i ka mea hoohemahema wale i keia kulana hana. Ua komo keia loina alakai iloko o na oihana apau e lawelaweia nei e na poe holomua o ke ao nei. Ua komo iloko o ka oihana akeakamai o na ano apau; pela nohoi me na hana mekanika a mau hana e ae. Ua komo iloko o ka oihana politika ame ka oihana tiologia (olelo a ke akua). Ua komo pu iloko o ka nohona sosiologia, oia hoi, ka nohona makaainana ana o na kanaka maloko o kekahi poai aupuni. Ma ia ano nohona makaainana i hapai ae ai makou i keia hoeueu manao ana. He pono ia kakou, na makaaina na Hawaii, e noho nei ma ka poai lahui Amerika, ke kikoo aku i na kulana kiekie ae o ka holomua ma ke ano o ko kakou noho ana. E waiho a e kapae kakou i na hana uhauha a hoopau manawa wale iloko o na hana waiwai ole. E hooki kakou i ka nee ana iloko o ka nohona hoomaunauna wale ana i kakou mau wahi loaa liilii. E a'o kakou e hooholo i ke ano o ko kakou ola ana, ma ka ai, ka i'a ame kahi aahu, ma ka huina lilo e haule ana malalo iho o ka huina dala e loaa ana ia kakou ma ka la, ma ka pule, ma ka mahina a ma ka makahiki paha. Aka, ke ninau nei paha ke kanaka; Pehea la e hiki ai ia'u ke hana pela? Pehea la e loaa ai ia'u ka hoolaiki ana mai i ko'u mau lilo nohona home malalo iho o na hunahuna materia (dala) e loaa ana ia'u mai ka'u wahi hana mai? Ke manao nei makou, o ka pane kupono a makou e hoike ai ai ma keia wahi, oia keia: E hoomakaukau e ke kanaka i kana papa hoonohonoho hana i kupono no ka hoonee ana 'ku i ke ano o kana mau hoolilo a lawa maikai ma ka huina e haule ana malalo o kona mau loaa. Ina ike oia. he mau hoolilo kekahi ona no kekahi hunahuna i hiki ke kapaeia aku me ka hoopilikia ole maoli i ke ola kino, a he mea hoi ia e pakele ai kekahi mau lilo e ho-opaha ikaika ana i kona mau loaa mai, alaila, e hana oia i ka hana hoonele iaia iho ma ia mau hunahuna, a hoopakele ae hoi i na hunahuna materia (dala) i maa i ka hooliloia ana no ia mau mea no loko o kona waihona hoomahuahua kuonoono. O na hoomakaukau ana o keia ano, he hoonohonoho ana no ia i ke alahele e kikoo aku ana i ko mua aku nei nohona palekana a oluolu hoi. O ka hooululu ana a ka hone meli, He luhi no iaA akoakoa nae ka kona luhi, Kona luhi, ua kuu ae la ia— Hoomau a hoomau ka hooiliiii ana, He puu nui e loaa, Hoomau a hoomau ka uhauha ana. He neo nui no ke loaa, O ka mea i hoakoakoa i kana, He puuhonua kona e maha ai, O ka mea i hoohelelei i kana, He puu hoaa kana e lomaloma ai.