Kuokoa Home Rula, Volume VII, Number 42, 15 October 1909 — UA HALA MA KELA AO [Hoomauia] [ARTICLE]

Mai ka aoao elua mai. [No S.E. Kaiue] I ka pau ana o ka hana oia mau kau, ua hoi mai la oia no Wailuku a lawelawe i kana hana maa mau he mahiai, i ka M. H. 1905, lilo oia i Repubalika, a i na la mua ua koho ia mai la oia i Hope Kakauolelo no ke Kalana o Maui a noho lawelawe ma ia hana a hiki i ka hookohu ia ana mai i Lunahoomalu no ka Papa Hoopaa Inoa no ka mokupuni Hui o Maui, a i Novemaba 1906, ua waeia ae la oia i Lunakiai no ka Apana o Wailuku no ka aoao Repubalika, ua noho oia ma ia kulana no elua makahiki, o keia no hoi ke kulana luna aupuni hope loa ana i lawelawe ai a hala wale aku la no iloko o ke kowa o ka manawa o nei pii ana ae la a lawelawe ina hana iloko o kona apana ponoi iho ua hele kino maoli aku no oia ma kela ame keia wahi o na paha hana e makaala ponoi ai i ke ano o ka lawelawe ia ana o na hana, a o ka elua hapa-hiku o ka manawa iloko o keia elua makahiki o nei noho Lunakiai ana o ka wa wale no ia i loaa ai iaia o ke ola kino maikai me ka ikaika kupono o kona ola kino, a o ka elima hapahiku aku o nei wa me ka ma'i oia kahi i hoomailo pu ai a hala aku la. Ua hoomaka ka hoomailo ana ka ma'i iaia ma ka mahina o Ianuali 1907 a oluolu iki mai i ka mahina o Iune oia makahiki no, i ka mahina o Novemaba mai hua hoomailo hou mai la ka ma'i maluna o kona kino a ma ia mahina no o Novemaba, 1908 ua loaa hou iho la no oia i ka ma'i a okiia iho la elua iwi aoao ma ka aoao akau a lele mai ke kino aku, @ loaa iki hou ae la ka palekana a hoi mai la no Wailuku me ka manaolana hauoli aole liuliu mahope mai ua pii [?] hou aela ke kulana o ka ma'i, ua hoao hou ia ka huli ana i ke ola no ke kolu o ka manawa, aka, ua oi loa aku ka ikaika o ka ma'i mamua o ka ike a ke kanaka ke hana a hala wale aku la no. Aole i pau.