Kuokoa Home Rula, Volume VII, Number 50, 10 December 1909 — MAUI NO KA OI. [ARTICLE]

MAUI NO KA OI.

Ua hui makou me ia keiki halawai o "Moekololio-Kauahi-o-Kula-he-hau" Ed. H. Kekapai. He Home Rula oiaio oia mai kinohi a hiki no i keia la. Ua hai mai oia ia makou i ke ohohia o na makaainana o Kula Maui, i ka ohi i na apana aina aupuni Home Hookuonoono o 999 makahiki, a ua lilo pu oia i mea a'o aku i kona poe hoaloha, nolaila, e lawe koke i ka aina, mai kali, o hala ka wa pono. I ka wa i loaa ai ka aina e pono e mahi, alaila, loaa ke ola ame na pono o ka noho ana. Ina kakou e kakali a hala ka wa pono o ko kakou nele no ia i na aina Home Hookuonoono, a e lilo ana no i na haole, Pukiki ame na poe kupa makaainana Amerika e ae. No makou iho, ua mahalo makou a nui i kela mau a'o ana a Ed. H. Kekapai, he mau a'o o ke ano kanaka makua, a me ke aloha iaia iho, a i na nui na poe i like na ao ana me Ed. H. Kekapai, o Kula Maui, i na eia ka hapa nui o na Hawaii maluna o ka aina aupuni Home Hookuonoono kahi i noho ai, ola no o Kula ia oe e Ed. H. Kekapai, alaila, kohu pono ke olelo ae, o Maui no ka oi, o ko Kula poe kai hoolohe i na ao ana a ka nupepa Kuokoa Home Rula a me ka Elele Kahiliaulani o ko makou makemake o ke ala like o na kupa makaainana a hoohalike me ko Kula poe, mai kela pea a keia pea o ka Panalaau o Hawaii.