Kuokoa Home Rula, Volume X, Number 52, 26 December 1912 — Ka Leo Aloha Hope loa o ka Hiwahia ka Nupepa Kuokoa Home Rula IMUA O KONA POE HELUHELU O KEIA TERITORE Pau Ko Oukou ike hou ana i Kona Kino Lahilahi me Kona mau Kolamu i Luhiehu me na Mea Hou o na Aina E ame Kuloko, na Hana Ahaolelo o keia Makahiki ae, e Nele ana ko Oukou ike ana [ARTICLE]

Ka Leo Aloha Hope loa o ka Hiwahia ka Nupepa Kuokoa Home Rula

IMUA O KONA POE HELUHELU O KEIA TERITORE

Pau Ko Oukou ike hou ana i Kona Kino Lahilahi me Kona mau Kolamu i Luhiehu me na Mea Hou o na Aina E ame Kuloko, na Hana Ahaolelo o keia Makahiki ae, e Nele ana ko Oukou ike ana

I keia la a makou e puka aku nei o keia no hoi ka helu hope o keia Makahiki, a iloko no hoi o ka piha ana o na Makahiki he 11 o kona oili mau ana aku imua o kona poe heluhelu, a ua paio keia Nupepa me ka wiwo ole ame ke kuokoa ma na ano apau no ka pono nohona o keia Lahui ma ke ano Kalaiaina, ua alakai aku kona mau manao no ka pono a me ka oiaio o na mea apaue huna ole ana i kekahi mau hana e hana ia ana no ka poino o keia Lahui Kanaka, ame kekahi mau hana ewaewa i ike pono ia ma ka hookele ia ana o ke aupuni, paio aku ka Nupepa KUOKOA HOME RULA no na kanawai kapakahi a kaulike ole e hana ia ana e na poe kiu kanawai, no ka pono o Hawaii, ua ike oukou e kona poe heluhelu mai kinohi mai o kona paio ana, a hiki mai nae i keia la, aole loa ka Lahui i hoolohe mai i kana mau alakai ana, a ma ia ano la, ua hiki ole loa ia makou ke ku hou aku a alakai imua o oukou no keia mua aku, a no ka mea, ua hoolohe ole mai oukou ka Lahui i na a'o ana a keia Waha Olelo o oukou a o kakou, a he mea pono ia makou ke hoomaha no keia hana o ka Hoolaha Nupepa, a o ko oukou ike hope ana keia i ka Nupepa KUOKOA HOME RULA e oili aku ana imua o oukou ka poe Heluhelu no ka manawa mau loa. O keia kona Helu hope loa a o ka pau no ia me ke ala hou ole ae o keia Nupepa, e nele ai oukou i ka ike ana i na hana o keia makahiki ae e hoea mai ana, ka makahiki ano nui a makou i manao ai, e ike a e maopopo ai ia oukou na kanawai a ka poe kau kanawai e noho mai ana ma Feberuari 20 1913, oia hoi na han ahaolelo. Ua puka mau aku keia nupepa iloko o 11 makahiki, me ka haule ole o hookahi o kona mau Helu, e hiki ole ai i ka mea heluhelu ke nema mai no ko makou hoopau ana i kona puka ana aku. Ua minamina nui loa ia makou no ka hoea mau ole ana mai o ka manao hoopau o ka Ona nana keia nupepa i ka wa kupono, oiai he mau Manao Alakai Naauao ko makou no ko kakou pono o ka Lahui ame ko kakou Aoao Kalaiaina no keia mua aku, me ko makou manao e mau ana no ka nee ana o keia nupepa imua no ke ku mau ana aku e paio a hiki i ke kanaka hope loa, aka, iloko o na hora hope loa i maopopo mua ole ia makou, ua loaa mai ke kauoha e hoike aku makou imua o ka Lehulehu, ua pau ka hoopuka o a ana aku o keia Nupepa Home Rula no 1913. Aloha no ka Lahui i ka nele i ka waha olelo ole. A ke haawi aku nei makou i ke Aloha Hape Nuia i na poe heluhelu o keia nupepa i pau iho la no ka wa mau loa. Aloha hou oukou.