Ke Kiai, Volume I, Number 5, 18 September 1902 — Page 2

2  KE KIAI, SEPATEMABA 18, 1902

NA AHA HOOKOLOKOLO.

                Ua ae aku o Lunakanawai Robinson i ke noi e kuaiia na waiwaipaa o J. K. Kaunamano.

                Ua hookuu aku ka Aha ia R. Puhia, luna hooponopono o ka waiwai o Alonzo Puhia mai kona noho Lunahooponopono ana aku.

                Ua hooemi mai o Lunakanawai Gear i ka bona o ka hihia a ke Aupuni kue ia B. H. Wright mai ka $6000 a hiki i ka $4000.

                E uku ana o Mrs. Theresa Wilcox i ka huina o $102.10 no kekahi piano i lilo mai iaia mamuli o ke ko ana o ka hihia a H. G. Middleditch e koi ana iaia e uku mai ia huina imua o Lunakanawai Robinson.

                Ua noi ae o Geo. R. Carter, ke kahu malama waiwai o Wm. A. Hall i ka Aha e ae aku iaia e moraki i na waiwai paa o kana hanai no ka huina dala o $12,500; o keia huina dala, he huina ia e lawa ai na hoolilo ame ka uku ana i ka moraki o kekahi apana aina.

                Ua waiho houia aku he noi mai ka loio aku o George Ferris, ka pepehikanaka i kauia ka hoopai e liia, ia Judge Gear, no ke kali ana i ka wa e hookoia’i o ka hoopai. Aka, ua puka ka olelo hooholo mai ka lunakanawai aku, o ke Kiaaina wale no ka mea mana ma ka haawi ana mai i ka la e hookoia’i o ka hoopau.

                Ua haawiia ia David Kehoana, he keiki hanai na D. Kahanu i make, ka hooponopono ana i ka waiwai o ka mea i make, mai a Lunakanawai Robinson aku. Ua waiho mai o Kaeilaikai he kue i ka haawiia ana ia Kahoana ka hooponopono, ma kona ano, oia no ka hoahanau ponoi o ka mea i make; a ua hana pu ia hoi he palapala kauoha mai a Kahanu mai, e haawi ana i ka waiwai apau i ka hoahanau ma ka imi pono ia ana, ua ike ia he palapala kauoha keia i hanaia me ke kue i ke kanawai, nolaila, ua hooleia ka mana oia palapala kauoha.

KA NO’A HUNA—E IKEA ANA PAHA?

                Ua hele ae ka makai o ka hale C. H. Brown, no na Komisina Amerika, me na palapala kii hoike e huli hele i ka poe i kauoha ia e hiki aku imua o ke Komisina ke hoi mai lakou.
                Eia na inoa o ka poe i kii ia:
                Henry E. Cooper, Fred Wundenberg, F. W. McChessney, C. Bolte, Andrew Brown, Henry Waterhouse, William O. Smith, Theo. F. Lansing, L. A. Thurston, John Emmeluth, Wm. R. Castle, J. A. McCandless, S. B. Dole, S. M. Damon, J. O. Carter, Samuel Parker, Chas- B. Wilson, John E. Bush, Robert L. Wilcox, David Kawananakoa, Jonah Kalanianaole, Charles L. Hopkins, J. L. Kaulukou, Lot K. C. Lane, J. K. Prendergast, John A. Cummins, John F. Colburn, Abraham Fernandez.
                E ikea ana anei ka no’a huna? Pela iho.

                Ua hoopii hou ia o B. H. Wright no ka nalowale ana o $5000, a oi aku. He hihia okoa keia mawaho ae o ka h ihia mua.

                Ma kakahiaka Poakolu nei i holo aku ai ke Claudine a maluna ona i kau aku ai na Komisina Amerika.

                Ua hoomaka i ka Poakahi nei na kula a pau o Kapunahou. O na haumana o ke kula nui e halawai mau ana lakou ma ka Pauahi Hall, o na haumana o ke kulakumu mua, ma ke keena halawai o ko lakou hale kula hou; o na haumana keiki liilii, ma ke keena buke, na Miss Hall e malama ia lakou ma ka hora 8:35 a. m. E hoomauia ana keia kulana no ka makahiki holookoa, ke ole e hoololiia.

                O ka Moiwahine Liliuokalani, na Keiki Alii Kawananakoa ame Kalanianaole, na malihini hanohano mawaho ae o na Komisina i hiki ae i ka luau a ka Elele R. W. Wilikoki.

                Mahope o ka noho ana me ka hauoli ma Kalihi Camp no kekahi mau mahina elua make ano mahuka ua hopuia o Sam Paulo, ka lua o na keiki Hawaii o na keiki eha i kepaia iluna o ka mokukaua Mohicana no ka haalele i ka moku. I ka wa kinohi o ka noho ana o keia poe ma ka moku, ua makemake lakou i na hana, aka mamuli o ka ikaika loa o na rula hoomalu, ua mahuka elua, a koe elua iluna o ka moku. He sela ke kulana o keia wahi keiki, no ka papa ekolu.

“Ka Lima i Lehia,
Ka Puniu i piha i ka ike.”

G. Dietz

Mea Hana Uwati a me Hana Gula akamai loa
Kanakolu kumamalima Makahiki Iloko o ia
Oihana, a i Geremania kahi i ao ai a lawa
1066 Alanui Papu Kokoke i ke Alanui Hotele
HONOLULU H. T.
Ua ike no ko makou mau Hoaloha i kahi e Loaa ai o na WAI-MOMONA Maikai Loa o na Ano Like Ole, no ka mea, ua kamaaina ia lakou, Oiai, o makou ka Hui Hana Wai Momona kahiko loa
KA CONSOLIDATED SODA WATER WORKS CO., LTD.
691 Fort St., H. T. Mauka iho o ka Hale Dute

Hau—e! Hau—e!
HUI HANA HAU A ME UWILA O OAHU
(Oahu Ice and Electric Co.)

E loaa no ka Hau i hanaia mai ka wai i PUHIIA a MAEMAE, a e laweia ana ma na wahi a pau o ke KULANAKAUHALE. He oluolu ka Auhau. Ma ka Mahina ka hookaa ana.
Wahi Hana: Kewalo. Tel. Blue 151
HOFFMAN & MARKHAM

HE MAU BUKE KUPONO
I ka Heluhelu!

Nui a Lehulehu wale ka makou mau BUKE hou loa i loaa mai nei, a he maikai wale no. Hauoli loa makou ke kipa mai oe e makaikai i ko makou wahi nei. Eia iho kekahi o ua mau Buke nei:
The Thrall of Lief the Lucky, LILJEUCRANTS
The Blazed Trail STEWERT E. WHITE
Welsh Rarebit Tales CUMMINS
Dairy of a Goose Girl WIGGINS
The Valley of Decision EDITH WHARTON
Abroad with the Jimmies BELL
The Gate of the Kiss HARDING
HAWAIIAN NEWS CO., Ltd.
Alanui Kalepa, kokoke i ka Hale Leta