Ke Kiai, Volume I, Number 5, 18 September 1902 — Page 3

KE KIAI, SEPATEMABA 18, 1902  3

NA KOMISINA—NO MOLOKAI.

                Ua ae aku o Senetoa Mitchell i ke kono a Dr. Sloggett Peresidena o ka Papa Ola no ka hele maikaikai ana i ke kahua Mai Lepera a ua hooholo  ia e holo aku ana na Komisina no Kalaupapa, Molokai ma keia Poalua ae. Aohe ae ia o na poe kakau nupepa e ae e holo pu koe wale no ka poe kakau nupepa puka la.

OPIO HAWAII HOLOMUA.

                E huli hoi mai ana o David B. Lyman kekahi opio Hawaii e noho nei ma ke kula ao kumu o na Puali Koa o ke Ola ma Oakland, California. Ua hookohuia oia i, Kapena i keia wa a o kona makemake o ka hoi mai i kona one oiwi e hooikaika a e hana ai ma na hana Karistiano. Ke mahalo nei “KE KIAI” i keia Opio Hawaii Holomua.

KE KOI PAUAHI A NA PAKE.

                Ua waihoia ae he noi na ka Hui Pake i na Komisina e hoike ana i ko lakou poino ma ka pauahi nui o ka la 20 o Ianuari, 1900, mamuli o ke ahi a ka Papa Ola, no ke pale ana aku i ka ma’i bubonika e laha ana iloko o ia mau la. Mamuli o ia ahi, ua pau mauale iho la ko lakou mau pono. He noi keia i na Komisina e hooikaika aku i ka Ahaolelo o Amerika e hooholoia i Pila Haawina e lawa ai no ka uku piha ana i na poino o kela pauahi.

ELUA KANAKA E LI IA ANA.

                O ka hoopai a ka Aha ma o Lunakanawai Gear la, no ka hihia pepehi kanaka o Geo. Ferris ia Watson ma ka la 16 o Aperila, i ka Poalima nei, e li ia oia ma ka puana-i a pau kona ola ma ka Halepaahao ma Kawa, a na ka Ilamuku Nui e hooko i keia hoopai. Ma keia ano hoopai no o Kimura, no ka pepehi ana i kekahi wahine Kepani ma Waialua.

HE LEI—UA HALA.

                ME ke kaumaha makou e hoike aku nei, ma ka mokuahi Kauai i loaa mai ai ka lono luuluu, ua lalau ae la na lima palanehe o ka make i ka hanu ola o Erwin ke keiki muli loa a ka Ilamuku J. H. Coney o Kauai. E hoolana i ka manao, e na makua i hoonele ia i ke keiki, no ka mea, ua oleloia, “no lakou ke aupuni o ka lani.”

NA MOHO REPUBALIKA O MAUI.

                Senatoa: Dickey; na Lunamakaainana, Joel Nakaleka o Molokai, S. Keliinoi o Wailuku, Pilipo Pali o Lahaina, S. E. Kalama o Hamakuapoko, L. von Tempsky o Makawao ame W. P. Haia o Hana.

                Ua hala aku la ke keiki Alii Kuhio no ka hooikaika Balota ma Hilo, a hiki aku i Mahukona, Kohala, Hamakua a ma na Kona ame Kau, maluna o ke Claudine i ke kakahiaka Poakolu nei.

                Ua malamaia he halawai nui e ka aoao Repubalika ma ka Hale Keaka Opiuma ma ka po Poakahi nei. Nui ke ohohia ia e ka poe i hiki ae. Ua haiolelo ae ke keiki Alii Kuhio, a na Toomas Fitch ka haiolelo nui o ia ahiahi.

                Ma ke ahiahi Poalua nei ua hele aku na lala o ka Ahahui Imi Pono Karistiano Kane, ame na lala o ka Ahahui wahine i ka auau ma Waikiki, malalo o ka malamalama hopipi o ka mahina. Ea, e akahele mai hoi oukou. Aohe no hoi e pono ka oukou auau la i ke ao i ka wa ike ia aku e ke kanaka. “Kau po o Kaneahua a hui kalo i ka na wao.”

                Ma ka hoike helu o ka poe i make iloko o ka mahina o Augate i hala iloko o ke kulanakauhale nei, he 71. He 30 o keia huina he poe Hawaii. O keia heluna make iwaena ou e Hawaii, he heluna make ia i oi aku i ko na lahui e ae, a he heluna make ia e hiki ai e kohoia aku kou manawa e o ai keia inoa Hawaii maluna ou. E manaoia o na bebe ka hapanui o keia poe make. Ma ka helu kanaka o ka makahiki i hala, he 39,306 wale no. O ka nui o na paa male i beritaia i ka mahina i hala, he 32, a o na hanau he 53.

MA KE KAUOHA

HOOLAHA HOOPAA INOA.

                E halawai ana ka PAPA HOOPAA INOA o ka Mokupuni o Oahu ma “Honolulu Hale” ma Honolulu, i kela a me keia la, koe na La Pule, no ka nieniele ana i na poe noi e lilo i poe koho balota ma ke Kau Koho e hiki mai ana, me ka hooholo ana i ko lakou kupono, mawaena o na hora 7 a me 10 o ke kakahiaka a me ka hora 4 a me 7 o ke ahiahi ma na Poaono.
LORRIN ANDREWS,
Lunahoomalu
M. A. GONSALVES,
W. J. COELHO.
till Oct. 10th

JOHN M. KEA

HE NOTERI NO KA LEHULEHU A HE MEA HANA I NA PALAPALA KANAWAI.
Keena Hana: Ma ke Keena o ka Loio Kuhina, ma ka Halealii.
Teleona: Main 42 P. O Box 593
3m.

J. M. KANEAKUA

LOIO A HE KOKUA MA KE KANAWAI A HE NOTARI NO KA LEHULEHU
Keena Hana: Ma ke Alanui Betela, pili pu ana me ka Hale Leta, ma Honolulu.
3m.

KAUKA SLOGGETT
KAUKA LAPAAU MAKA A ME PEPEIAO
Hora Hana—9 a. m. a 3 p. m.
Keena Hana—Alanui Alakea

NA KUKUI: A-a Maikai Pahu Ole

He AILA MAHU no ka Aila
O ka A-a nae, HE HUILA HOI KAU
500 Ihoiho Kukui kona Ikaika Hoomalamalama
HOOKAHI KENETA ka Lilo Aila i ka Hora
Kupono no na LUAKINI, na HOME a pela aku
E loaa no ke ninau ae i ka
WASHINGTON LIGHT & CO.
C. W. MACFARLANE, Luna Nui.