Ke Kumu Hawaii, Volume I, Number 1, 12 November 1834 — Page 5

1835.) KUMU HAWAII.

                5. Ma ona la i loaa ma ai ia makou ka olelo. Ua alohaia mai o Paulo ma e ke Akua, ma o Iesu la, ua lokomaikaiia mai, ua hoomaikaiia mai ko loko, a pono, i like me ka poe a pau i paulele ia Iesu.
                A ma ka lunaolelo ana. Oia kekahi mea i loaa mai ia Paulo, ma ko Iesu makemake.
                No ka malama ana o ka manaoio. I mea hoi e hoolaha i ka pono, a e kokua aku mamuli o ka hoolohe a me ka malama o ka manaoio; mamuli o ka hana pono a ka poe i manaoio i ke Akua, ma keia aina kela aina; i mahuahua hoi ka malama o na kanaka i ka olelo maikai; nolaila i hooliloia'i o Paulo i lunaolelo.
                No kona inoa. I hoonaniia ai ko Iesu inoa i ka manaoio ana a me ke ola ana o ka poe lohe ma na lahuikanaka a pau.
                6. Iwaena o lakou no hoi oukou, o ko Roma kekahi, e aoia'ku, a e hoohuliia; a malaila hoi kekahi poe i manaoio, a i hana pono, ka poe a Paulo i palapala aku ai i keia palapala.
                Na mea i waeia no Iesu Kristo. O ko Iesu poe ohua i waeia a i hoohuliia nona. O ka Iesu poe aloha no keia. Ua heaia, ua kiiia, a ua hoomaikaiia e ka Uhane Hemolele, a lilo lakou no ka Mesia.
                7. I ka poe a pau ma Roma, i alohaia e ke Akua, a i mesia hoi i mau haipule.
                O ka poe Iudaio, o ka poe Helene, o ko Roma kamaaina, a me na malihini, e noho ana i Roma mamuli o Iesu, i alohaia e ke Akua, a i hooliloia i haipule maoli, o lakou ka poe a Paulo i palapala aku ai, a i aloha aku ai, hoi. He pono e hoopiliia keia pauku me ke kumu o ka pauku mua i akaka ke ano, penei, Na Paulo... i ka poe a pau ma Roma.
                Manao kekahi he pono ke hookomo i kekahi hua e, ma ke kumu o ka pauku ahiku i akaka ke ano penei. "Na'u aku nei," i ka poe a pau; - aka, ina e hoopiliia ka pauku hiku me ka pauku mua, he maopopo no, ke waiho aku i keia hua, hookomo, Na'u aku nei.
                Eia kekahi olelo, ke olelo pule, he olelo aloha a Paulo ia lakou. No oukou ke aloha a me ka pomaikai, mai ke Akua mai. E alohaia mai, e hoomaikaiia ko loko, e hoomaluia a hoopomaikaiia oukou e ke Akua, ko kakou  Makua, a me Iesu Kriso ko kakou Haku.

HE MAU NINAU.

1 Owai ka inoa ma ke kumu o keia palapala?
Owai kekahi inoa ona?
Ua kakauia kona inoa maanei i aha?
Ia wai ka olelo a Paulo ma keia palapala?
Heaha la o Paulo?
Ua waeia i aha?
Hookaawaleia o Paulo no ke aha?
Na wai ka olelo maikai?
2 Na wai i hoike e i ka olelo maikai?
Ma owai la ka hoike e ana?
Mahea?
Heaha ka palapala hemolele?
3 Nowai ka olelo maikai a ke Akua i hoike mai ai ma ka poe kaula?
Ua hoohanauia na wai?
He keiki o Iesu na wai ma ke kino?
Nowai ka noho alii i lilo ia ia?
3 He keiki nawai o Iesu ma kona uhane hoano?
Inahea i hoomaopopoia'i o Iesu o ke Keiki na ke Akua me ka mana?
Pehea la i hoomaopopoia'i?
Heaha ke ano o ia mau hua, o ke Keiki a ke Akua.
Ehia mea maopopo i kapaia'i o Iesu o ke Keiki a ke Akua?
Heaha ka mua?
Heaha ka lua?
Heaha ke kolu?
5 Heaka ka mea i loaa mai ia Paulo ma o Iesu la?
No ke aha la i loaa ia Paulo ka lunaolelo ana?
I mahuahua ka malama o ka manaoio nowai?
E ahuia kona inoa?
6 Iwaena owai ko Roma?
Heaha ke ano o ia hua "i waeia no Kristo?
7 Nawai ka olelo i ka poe a pau i alohaia a i waeia ma Roma?
Heaha ka olelo pule a Paulo i kakau ai ma keia pauku?
Heaha ke ano o ia pule?
Eia kekahi pono no kakou.
                No ka mea ua hooliloia e Paulo e ke Akua i lunaolelo e hoike i ka olelo maikai no Kristo mamuli o ko ke Akua makemake he pono no kakou e hoolohe, e manaoio, a e malama hoi i kana olelo, me ka noonoo pono i ke ano, a me ka paulele i ke Keiki a ke Akua. He ola ia no kakou.
 

NO KA SABATI.
[I kakauia e L. S.]

                Kauoha mai la ke Akua i ka poe Isaraela, E hoomanao i ka la Sabati e malama hoi ia la e hoano ia."
                Aole nae ia i kauoha mai i ka poe Isaraela wale no. E hoomanao i ka la Sabati, no ka mea, he mea mau loa no keia kanawai o ke Akua, no na aina a pau loa, a hiki loa aku i ka hopena, aole loa hoi e pau.
                He la maikai keia; he la hemolele no hoi; he la kapu loa no ke Akua.
                Aole ke Akua i kauoha mai; e hoomanao i ka la Sabati, e hana hewa – e hana ma ke kino; e kiai aku, a e kuai mai; e loaa'i ka waiwai; e paani no hoi; e lealea; e hula, e moe kolohe; e aihue; e wahahee; e hoopunipuni; e hoohiki iho; a e kuko wale i na mea a ko lakou hoalauna.
                Aole ia i kauoha mai penei; e hoomanao i ka la sabati, e hoakoakoa ai I ka hale paani e hoomaewa 'ku i ka ke Akua olelo, a me ka pono o Iesu.
                Aole ia i kauoha mai penei; E hoakoakoa ma ka hale paani, e nana i ka poe paani - a me ka poe haakei, a me ka poe lealea. No kamea, ua hana ino wale no kela mau poe a pau. Ua makemake lakou i na mea ino; ua kamailio pu lakou ma na mea ino; ua hoike aku no hoi lakou i na mea ino; ua hookauwa lakou i ka Diabolo; ua hahai lakou mamuli o ka Diabolo – ua hele lakou i ke ala e hiki aku ai i ke ahi pio ole. He poe kina wale no lakou.
                Aole ke Akua i kauoha mai i na kanaka e hoomanao i ka la sabati e halawai pu i ka hale rama, e inu i ka rama, e puhi i ka baka - e hana ino kekahi i kekahi, a e hoohiki ino no hoi i ka inoa o Iehova, e ko lakou Akua. Aole loa.
                Aka, kauoha mai la ke Akua i na kanaka a pau, ma na aina a pau, "E hoomanao i ka la sabati, e malama hoi ia la, e hoano ia."
                Ua pono i na kanaka a pau ke hele i ka pule i kela sabati keia sabati, e hoolohe pono i ka ke Akua olelo.
                He nui loa kanaka ma Hawaii nei i hele ole i ka pule. Aole lakou malama iki i ka la Sabati. Ua noho wale lakou i ka hewa. Aloha ino lakou!
                Kekahi poe hele i ka hele i ka pule i ke kakahiaka; aka, aole lakou hele i ka pule i ke ahiahi. Ua manao lakou penei, paha; ua pono e malama i kekahi hapa o ka la sabati - i ekolu hora paha; alaila, ua oki, a e hana e like me ka lakou hana ana i na la eono.
                Aka, aole ke Akua i kauoha mai pela. Ua kauoha mai oia i na kanaka a pau ma na wahi a pau e hoomanao i ka la Sabati, e malama ia la - e malama ia la a pau.
                Aole pono ke malama i ke kakahiaka wale no. Eia ka pono. E malama i ke kakahiaka, a me ke awakea, a me ke ahiahi, a me ka po no hoi. E malama i ka la Sabati a pau.
                Auhea oukou? Mai haalele oukou i ka oukou hoakoakoa ana e like me ka hana ana a kekahi poe. Aka, e hooikaika oukou i kela Sabati keia Sabati. No ka mea, "Ina e hana hewa oukou me ka ae o ka naau, mahope iho o ka loaa ana mai ia oukou ka ike ana i ka olelo oiaio, aole mohai hou no ka hala; aka o ke kali weliweli ana i ka hoopai ana mai, a me ka huhu wela, e pau ai ka poe enemi."
                Mai hopalaleha i ka hana ana ma ka