Ke Kumu Hawaii, Volume I, Number 1, 12 November 1834 — Page 6

6 KUMU HAWAII. (MEI.

pono; aka e hooikaika a e hoakoakoa i ka hale pule e hoolea'ku i ke Akua.
                O ka la sabati ma ka honua nei, he hoailona no ia o ka la sabati mau loa i ka lani. He sabati wale no i ka lani. Aole po akahi, aole po alua, aole po akolu, aole po aha, aole po alima, aole po aono malaila. He sabati wale no.
                Aole kakaikahi ka poe i malama i ka la sabati i ka lani; he nui loa ka poe i malama i ka la sabati.
                O ka poe anela a pau, a me ka poe haipule maoli a pau, ua hoomanao lakou i ka la sabati, e malama hoi ia la, e hoano ia. Aole lakou e molowa; aole laki iki —aka ua ikaika loa lakou.—
                Ua ikaika loa lakou i ka malama i ke Akua, aole molowa kekahi poe, e like me na kanaka ma ka honua nei. Hoomana'ku la lakou i ke Akua me ko lakou naau a pau a me ko lakou ikaika a pau i ke ola pau ole. Pomaikai loa lakou. Aole kekahi mea ino ma ka lani; aole mai; aole pouli malaila; aole hoi make kukui, a me ka malamalama o ka la, no ka mea, na ka Haku na ke Akua no e hoomalamalama ia lakou, a e lilo i alii mau loa, i ke ao pau ole.'' Hoikeana xxii 5.
                O ka poe i malama ole i ka la sabati ma ka honua nei me ke pale wale aku i ka ke Akua kauoha, aole lakou e ola; aole lakou e lilo i ka lani e malama i ka la Sabati mau malaila. E lilo lakou i ka po i ke ahi pio ole.
                Heaha ka lakou hana ana malaila? E kuai aku anei lakou, ae kuai mai no hoi e loaa ka waiwai? Aole waiwai ma ka po! E hoakoakoa anei lakou i ka hale paani, e hana lealea? Aole hale i ka po. E halawai pu anei lakou i ka hale rama, e inu i ka rama, e puhi i ka baka, a e hoohiki ino kekahi i kekahi? Aole hale rama i ka po!
                Heaha ka lakou hana ana malaila? E hele anei lakou i ke kula, e heluhelu i ka palapala a e loaa ke ano o kela pauku keia pauku? Aole kula i ka po; aole kumu malaila; aole palapala.
                E hoakoakoa ai anei lakou i ka luakini ma ka la sabati? Aole luakini malaila, aole sabati; aole kahuna malaila; aole kekahi mea maikai malaila. He mea ino wale no.
                Pehea la uanei na kanaka e pakele ai i ka maka mau loa, ke malama ole lakou i ka la sabati! ke mihi io ole lakou i ko lakou hewa? a ke manaoio ole lakou ia Iesu Kristo?
                Aole paha lakou i pakele i ka make, mau ke malama ole lakou i ka la sabati, i ka la kapu loa no ke Akua.
                Nolaila ua pono i na kanaka a pau, ke malama pono i ka la sabati, a ke malama i ka ke Akua kauoha a pau no hoi; malaila e pakele ai lakou i ka make mau loa; malaila no hoi e loaa ia lakou ke ola mau loa.

NO KA HOOMALOKA O NA KANAKA I KA WA IA NOA.
[I kakauia'i e H. R. H.]

                Kuhi iho la ka nui o kanaka i ka wa ia Noa e hiolo ana ka ke Akua olelo i ko lakou hoomaloka. Nolaila huli lokahi ae la mamuli o ka hewa. Haalele aku la na kanaka a pau loa i ka pono. O ke kanawai o ke Akua maoli, ua hehiia malalo iloko o ko lakou mau wawae. O kana mau kauoha apau ua paleia'ku e lakou; o Noa ke kaula maikai, ua hoomaewaewaia ia e lakou.
                Nana mai la ke Akua i ko keia ao a pau, ua lilo loa mamuli o ka hewa; pauaho iho la oia; manao ae la oia e luku mai ia lakou. Hai mai la ke Akua i kona manao ia Noa, i mai la, "Ua hiki mai i ko'u alo nei ka hope o na io a pau; no ka mea ua piha ka honua i ka lakou hana ino ana: aia hoi, e luku ana au ia lakou mai ka honua aku.'' Oia ka ke Akua i olelo mai ai ia Noa. Kauoha mai la oia ia ia, i mai la, E hana nei halelena nou. No ka mea, e lawe mai ana au i ke kaiakahinalii maluna o ka honua, i mea e lukuia'i na mea ola a pau malalo o ka lani; a e make ana na mea a pau o ka honua.
                A lohe ae la o Noa ia manao o ke Akua hoomaka koke ae la i ka halelana. Aia no mauka loa kona wahi i noho ai, malaila oia i kapili ai i ua halelana la. Eia no ke ano. Ehiku no umi anana ka loa a me na anana keu elima. – Ehiku apana ke kiekie. Ekolu no kanaha makahiki ka hana ana a paa.
                A ike ko Noa poe hoalauna ia ia e hana ana i halelana, ninau aku la paha lakou ia ia, No ke alii la keia au, e hana nei? I mai la kela, He halelana keia. Ninau mai lakou ia ia, Auhea la ka wai e lana'i kela, hale? I mai la kela, Na ke Akua e lawe mai i ke kaiakahinalii maluna o ka honua; i mea e luku i na kanaka a pau. Nolaila, ke hana nei au i keia. A lohe lakou i kana akaaka aku la paha ia ia. Kupa aku la paha lakou ia ia he kanaka lapuwale; no ka mea, hoomaloka loa lakou i kana olelo. Hoike pinepine mai la oia i a lakou i ka pono, aole nae i huli mai no ka nui o ko lakou hoomaloka. A pau ka halelana; alaila olelo mai la ke Akua ia Noa, "E komo oe iloko o ka halelana," a komo io no ia - a ike kona poe hoalauna ia ia ua komo iloko o ka halelana, ana i hana'i, hoomaewaewa paha lakou ia ia - kuamuamu aku lakou me ka i ana'ku, E! he kanaka lapuwale ua Noa nei - aia no ke paa la iloko o ka halelana - eia ia mauka nei, ua kuhi oia e hiki mai ana ke kaiakahinalii he mea e luku ma ia kakou a pau – he lapuwale kona manao, aole kakou makau; auhea ka ua? auhea ke kaiakahialii? Pela no paha ko lakou ohumu ino ana ia Noa a pau ka la mua o kona noho ana iloko o ka halelana, aole ua ia la; nolaila hoopaakiki iho la lakou I ko lakou mau naau meka i ana iho, Auhea ke kaiakahinalii a ua kaula nei i olelo mua ai? ua paa ka halelana – a ke kali nei kakou i ka ua, aka aole ua. Pela paha, ko lakou olelo hoomaloka ana - a i ka lua o ka la o ko Noa noho ana i ka halelana. Aole nae i hiki mai ka ua i ala - nolaila akaaka nui lakou ia Noa, i kona noho pio ana iloko o ka halelana; aole nae he wai e lana ai. I aku la paha lakou ia ia, Auhea ua na nui nei au i olelo mai ai? Ua hala na la elua o ko noho pio ana i kou halelana, aole no e lana, ku wale iho la ua hale la i ka maloo. Pela no i ka po ekolu; aole ua; aole no i ka po aha; aole i ka lima o ka la; aole no hoi i ke ono. Nolaila o na kanaka a pau mawaho o ka halelana, ua hoowahawaha lakou ia Noa, a i ka hiku o ka la - alaila ua hoholaia na ao eleele malalo iho o na lani; ia la no huahuai mai la na wai a pau o ka honua, a naha'e la na kiowai o ka lani. Oia no ka maka mua o ko lakou makau ana; weliweli loa iho la na kanaka hoomaloka a pau. I aku la paha lakou kekahi i kekahi, Ke! he poe lapuwale loa kakou. Eia no ua na nui la a Noa i olelo mua mai ai ia kakou. Hoomaloka nae kakou i kana; kuhi kakou he wahahee kana i i mai ai; he olelo ka! a ua make nei kakou no ko kakou hoomaloka ana i ka olelo a ke Akua a ua kauia nei i olelo mai ai. Auwe! auwe! pehea la kakou e pakele ai? Ahea lae pau ka ua? Pela paha ka ohumu ana o ka nui o na poe hoomaloka la, a nui ae la ka wai; ua nalo ka aina, ua nalo na hale; aole paepae wawae no na kanaka, o na kuahiwi wale no kou; pu aku la na kanaka a pau ma na mauna, manao lakou e ola malaila. Kuhi ae la paha aole no e hiki ka wai ma kuahiwi loa. Ua kuhi hewa no - no ka mea i ko lakou pii ana i ke kuahiwi; hahai koke mai la ka wai ia lakou a uhi loa ia na kuahiwi a pau, aole wahi koke. Alaila ue lokahi ae la ka poe