Ke Kumu Hawaii, Volume I, Number 1, 12 November 1834 — NO KA HOOMALOKA O NA KANAKA I KA WA IA NOA. [ARTICLE+ILLUSTRATION]

NO KA HOOMALOKA O NA KANAKA I KA WA IA NOA.

[I kakauia'i e H. R. H.] Kuhi iho la ka nui o kanaka i ka wa ia Noa e hiolo ana ka ke Akua olelo i ko lakou hoomaloka. Nolaila huli lokahi ae la mamuli o ka hewa. Haalele aku la na kanaka a pau loa i ka pono. O ke kanawai o ke Akua maoli, ua hehiia malalo iho o ko lakou mau wawae. O kana mau kauoha a pau ua paleia'ku e lakou; o Noa ke kaula maikai, ua hoomaewaewaia ia e lakou. Nana mai la ke Akua i ko keia ao a pau, ua lilo loa mamuli o ka hewa; pauaho iho la oia; manao ae la oia e luku mai ia lakou. Hai mai la ke Akua i kona manao ia Noa, i mai la, "Ua hiki mai i ko'u alo nei ka hope o na io a pau; no ka mea ua piha ka honua i ka lakou hana ino ana: aia hoi, e luku ana au ia lakou mai ka honua aku." Oia ka ke Akua i olelo mai ai ia Noa. Kauoha mai la oia ia ia, i mai la, E hana oe i halelana nou. No ka mea, e Iawe mai ana au i ke kaiakahinalii maluna o ka honua, i mea e lukuia'i na mea ola a pau malalo o ka lani; a e make ana na mea a pau o ka honua. A lohe ae la o Noa ia manao o ke Akua hoomaka koke ae la i ka halelana. Aia no mauka loa kona wahi i noho ai, malema oia i kapili ai i ua halelana la. Eia no ke ano. Ehiku no umi anana ka loa a me na anana keu elima.—Ehiku anana ke kiekie. Ekolu no kanaha makahiki ka hana ana a paa. A ike ko Noa poe hoalauna ia ia e hana ana i halelana, ninau aku la paha lakou ia ia, No ke aha ia keia au e hana nei ? I mai la kela, He halkiana keia. Ninau mai lakou ia ia, Auhea ia ka wai e lana'i keia hale? I mai la kela, Na ke Akua e lawe mai i ke kaiakahinalii maluna o ka honua, i mea e luku i na kanaka a pau. Nolaila, ke hana nei au i keia. A lohe lakou i kana, akaaka aku la paha ia ia. Kapa aku la paha lakou ia ia he kanaka lapuwale; no ka mea, hoomaloka loa lakou i kana olelo. Hoike pinepine mai ia oia ia Iakou i ka pono, aole nae i huli mai no ka nui o

ko lakou hoomaloka. A pau ka halelana; alaila olelo mai la ke Akua ia Noa, "E komo oe iloko o ka halelana," a komo io no ia—a ike kona poe hoalauna ia ia ua komo iloko o ka halelana, ana i hana'i, hoomaewaewa paha lakou ia ia—kuamuamu aku lakou me ka i ana'ku, E! he kanaka lapuwale ua Noa nei—aia no ke paa la iloko o ka halelana—eia ia mauka nei, ua kuhi oia e hiki mai ana ke kaiakahinalii he mea e luku mai ia kakou a pau—he lapuwale kona manao, aole kakou makau; auhea ka wa? auhea he kaiakahinalii? Pela no paha ko lakou ohumu ino ana ia Noa a pau ka la mua o kona noho ana iloko o ka haleiana, aole ua ia la; nolaila hoopaakiki iho la lakou i ko lakou mau naau me ka i ana iho, Auhea ke kaiakahinalii a ua kaula nei i olelo mua ai ? ua paa ka halelana—a ke kali nei kakou i ka ua, aka aole ua. Pela paha ko lakou olelo hoomaloka ana——a i ka lua o ka la o ko Noa noho ana i ka halelana. Aole nae i hiki mai ka ua ia la—nolaila akaaka nui lakou ia Noa, i kona noho pio ana iloko o ka halelana; aole nae he wai e lana ai. I aku la paha lakou ia ia, Auhea ua ua nui nei au i olelo mai ai? Ua hala na la elua o ko noho pio ana i kou halelana, aole no e lana, ku wale iho la ua hale la i ka maloo. Pela no i ka po ekolu; aole ua; aole no i ka po aha; aole i ka lima o ka la; aole no noi i ke ono. Nolaila o na kanaka a pau mawaho o ka halelana, ua hoowahawaha lakou ia Noa, a i ka hiku o ka la—alaila ua hoholoia na ao eleele malalo iho o na lani; ia la no huahuai mai la na wal a pau o ka honua, a naha'e la na kiowai o ka lani. Oia no ka maka mua o ko lakou makau ana; weliweli loa ihola na kanaka hoomaloka a pau. I aku la paha lakou kekahi i kekahi, Ke! he poe lapuwale loa kakou. Eia no ua ua nui la a Noa i olelo mua mai ai ia kakou. Hoomaloka nae kakou i kana; kuhi kakou he wahahee kana i i mai ai; he oiaio ka! a ua make nei kakou no ko kakou hoomaloka ana i ka olelo a ke Akua a ua kaula nei i olelo mai ai. Auwe! auwe! pehea la kakou e pakele ai? Ahea la e pau ka ua? Pela paha ka ohumu ana o ka nui o ua poe hoomaloka la, a nui ae la ka wai; ua nalo ka aina; ua nalo nahale; aole paepae wawae no na kanaka, o na kuahiwi wale no koe; pii aku la na kanaka a pau ma na mauna, manao lakou e ola malaila. Kuhi ae la paha aole no e hiki ka wai ma kuahiwi loa. Ua kuhi hewa no— no ka mia i ko lakou pii ana i ke kuahiwi, hahai koke mai la ka wai ia lakou a uhi loa la na kuahiwi a pau, aole wahi koe. Alalla ue lokahi aela ka poe

hoomaloka, no ka mea, ua nalo ka aina a pau, aole mea i ikeia maluna iho o ka wai, oka halelana wale no. He ake lakou e pii maluna o ua halelana ia, aole loa e hiki. Kahea aku la lakou ia ia, aole ona lohe. A pau loa lakou i make, oia no ka hope o ko lakou hoomaloka ana i ka olelo a ke Akua. Pela i make ai kela poe hewa he nui loa. Aka aole i pau ka hoomaloka malaila. Ua ala hou mai, a i neia manawa e noho nei kakou, ua hohola ia maluna o ka honua a pau—he kamaaina ka hoomaloka no na aina a pau loa. Ua hai mau ia no ka olelo a ke Akua; aka o na kanaka ua hoomaloka, aole manao he oiaio. Ke hoakaka mua mai nei ke Akua i kona manao e luku i ke ahi a me ka luai pele i ka poe mihi ole a pau. Aka he lohe wale no ko kekahi poe—aole manao he oiaio, a make io no lakou alaila akahi no manao o lakou he oiaio ka olelo i haiia mai e ke Akua.