Ke Kumu Hawaii, Volume I, Number 1, 12 November 1834 — HE KAMAKAMAILIO. [ARTICLE+ILLUSTRATION]

HE KAMAKAMAILIO.

Elua kanaka ma ke kau wahi. o Kekahiko ka inoa o kekahi, a o Wahou ka inoa o kekahi; holo kahiki o Wahou a hoi mai, halawai pu laua, i aku la o Wahou, Aloha oe ea! Kekahiko, O oe noka ia, aloha! Inahea kou hoi ana mai? Wahou. Ano niai la no, ma ka moku mai i ku iho nei; aloha. K. Aole paha o ke aloha ea! E hele mai kaua a noho pu ea. W. Ae no paha; ua pau ka makemake i ka holo ina ka aina. E noho pu kau a hoike aku au ia oe i ka pono o kela mau aina. Noho pu iho la lakou ma ka hale o Kekahiko i kekahi mau la, a i ko laua hele pu ana ina ke alanui, kamailio pu laua penei: W. He pa lepo ko Kaiwi, no ke aha la e hana ole ai oe i pa lepo nou? K. Aole pela e hana'i ka poe kahiko; he pa laau wale no ko lakou, a he pohaku kekahi. Nui na mea hou i keia wa, aole hoi au e paulele malaila; eia no wau mamuli o na kanaka kahiko a me na makua. W. Mai hoopili wale oe ia lakou, ma ka pono e koho ai oe. 0 ka pa lepo he paa loa ia, aole e hina wawe i na makahiki he nui loa, aole e komo ka

puaa, a me kailio, a me na holoholona hou, ka bipi, ame ka lio, ke uhauia a kiekie. O ka pa laau he popo wale ia, a he hina wale; aole e malu iki na mea kanu maloko. O ka pa pohaku, he pono oia ma kahi pohaku, aka, i ole e maikai ka hana ana, he hiolo wale ia. K. Oia, paha; oko'u mano he luhi loa ka pa lepo, he nui ka hana, he eha ke kua. W. Aole. E hana liilii i keia la a i kela la, e imi e i ka pahu a loaa, a i ka mauuhoi, (o ka makuekue ka pono loa) alaila kaawili, ina paha he koena la, o ka paahao paha, a hoi mai he pono ke kaawili i kekahi mau lepo a waiho; pela e malama ai i na manawa liilii a pau. Ina e pii ae ma ke kuahiwi no ka laau pa, he luhi ia, a lilo ka la okoa malaila. He paa ka pa lepo: ina ua ku pono ka hana ana; he pono no hoi i mea e hookaawale ai ka mala kanu, aole e komo mai ko hai holoholona a ai i kau mea kanu, he kumu ia o ka hakaka a me ka hihia. K. Oiaio no la Ina hoi kaua, e hana pu kaua i ka pa a puni, alaila e hoike mai oe ia'u i na mea pono ke kanu maloko. W. Ae; a i paa ka pa e imi oe i ka laau, a na'u no e hana i ke pani e paa ai ka puka komo, o make hewa ka kaua hana, no ka waiho hamamaia o ka puka. Aole e pono ke alapii e komo ai, aole ke pani helelei e like me ko kekahi. E hana pono kaua me ka naau ao. K. Ae; malaila kaua.