Ke Kumu Hawaii, Volume I, Number 2, 26 November 1834 — Page 9

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 1. HONOLULU, OAHU, NOV. 26, 1834. Pepa 2.

KE KAIKAMAHINE A KA MEA HANAI BIPI.
"O ka hoomanao ana i ka poe pono he mea pomaikai no ia." Solomona. 10; 7.
MOKUNA 1.

                He wahi hana maikai i ka nana aku, a ike, a hookolo aku no hoi ka ka Uhane Hemolele hana ana ma ka naau o kana poe keiki ponoi, i hoomaopopoia mai ma ka noho ana o lakou. He mea hauoli loa i ka ike ana aku i ko ke Akua poe ma ka honua nei, he poe hune kekahi o lakou. Ua hanaia ka naau o lakou ma ke ano o Kristo e ka Uhane Hemolele, a ua ikea iloko o lakou. Iloko o lakou ua akaka ka oiaio a me ke akahai o ko ke Kristiano noho ana. Aole no lakou hihia, a kaumaha i na mea o keia ao, na mea i palaka pinepine ai kekahi o ka poe waiwai. Ua nui na mea pilikia no ka poe malama i ka pono iloko o ka waiwai, a me ke alii ana, a me ka noho ana'ku mahope o ko keia ao pono. Ina no kekahi poe hihia ole ilaila. No ka lokomaikai o ka Haku ua lanakila lakou maluna o ko ke kanaka naau, ka naau hookano, ka naau hookiekie, a me ke kuko aku i na mea o ke kino. Ua ikea kekahi poe alii, a me kekahi poe waiwai, ua kahikoia e ka uhane hune, a me ka naau haahaa, ka naau hoole i ko ke kino, a me ka ikaika loa o ka malama i na mea o ka uhane.
                Aka i makemake kakou e ike i ka poe e malama io ana, i ka ke Akua pono iloko o ka oiaio, a me ka maikai, ina no lakou mawaena o ka poe waiwai ole o keia ao ka poe lako i ka manaoio. Ka hale o ke kanaka ilihune; Elua lilo pinepine ia i luakini no ke Akua. Ua nui no ka poe ka i olelo mai, malaila i ike makou i ka manaolana, a me ka manaoio, malaila no makou i ike i ka hoomaopopo ana o ke akamai, a me ka mana, a me ka maikai o ke Akua.
                O ka wahine i hoakakaia iloko o keia  olelo ua noho no oia ma Beritania; a, o ka hoomaka ana o ko'u ike ana'ku ia ia, ina no iloko o keia palapala, ana i palapala mai ai ia'u.
 
                "E KE KUMU,—
                "Ke palapala aku nei au ia oe. E aloha mai oe ia'u; no ka mea, aole a kaua i kamailio pu. Ua lohe nae au ia oe, i kau pule ana iloko o ka halepule, ma o mea la. Ke manao nei au, he kumu pono oe, e ao aku ana i kanaka hewa, e holo lakou, e pakele i ka inaina e kau mai ana maluna o na mea a pau e noho ana iloko o ka hewa, a ua make iloko o ka mihi ole.
                "E! iloko o ka Haku, e hooikaika aku oe; i hoopomaikaiia mai oe e ia, a e hoopauia mai kau hana aloha iloko o ka lako; i haawiia mai hoi na uhane i uku nau. Ua olelo mai la ka Haku, oia pu no me lakou, ana i hea mai, a hoouna aku, e hai aku i kana olelo, a hiki aku i ka hope o keia ao. No ka mea, aole e hiki ia kakou e hana i ke kahi mea, ke pili ole aku la ia.
                "Ua hauoli loa au i kuu lohe ana aku i kau olelo aloha i ke kanaka hune o ka poe koa, o mea la. He oiaio no na ke aloha o Kristo oe i hoouna mai ia ia. I mau keia aloha iloko ou, me ka lako o ka manaoio ana. I koiia aku oe e ia e imi i na uhane e hele hewa ana me ka makemake ikaika, i lilo aku oe, a e hooliloia hoi oe, no kona maikai. I kauia mai la ka malu ma ka olelo aku ai, me ka mana o ka Haku, e o aku ana i ka mihi iloko loa o ka naau o ka poe e hoolohe mai. I nui lakou ka poe i hoohuliia mai a lilo i mea hou iloko o Kristo.
                "E ke kumu e, e ikaika oe i ka pule aku i ke Akua no ka mihi, a me ka huli ana mai o kanaka hewa. Ua nui kona mana. Owai la ka mea e pale aku ia ia? Ua olelo mai no ia, nana no e hoolohe i ka pule oiaio ma ka inoa o kana Keiki. 'E noi aku oe i kau mea e makemake aku ai, a e haawiia mai nau.' He mea hooikaika no keia i ka manaoio o kakou, ka poe i aoia e ka olelo, a me ka Uhane, e pule.
                "E! o ka manaolana maikai! aia ike kakou i ka olelo ana i olelo mai ai, ua kaikaiia na uhane luhi o kakou. He pono ia kakou ke ike kakou ia Kristo; a me ka mana o kona alahou ana iloko o ka naau o kakou. Iloko o ka manaoio ia Kristo, e hauoli ai kakou ma ka manaolana, a hopu aku kakou me ke kuko aku i ka manawa e ike ai na mea a pau loa i ka Haku, i ka manawa hoi e hanauia ka lahuikanaka i ka la hookahi.
                "E! o ka manawa hauoli no ia, ke hiki mai ko Kristo aupuni! A ilaila 'e hanaia'i kona makemake ma ka honua nei i like me ia i hanaia'i ma ka lani la.' E hanai mau ia mai na kanaka i ka ai a kona aloha; a makemake wale aku lakou i ka Haku i ka po a me ke ao.
                "E! a ilaila ka Paredaiso maikai no lakou ilalo nei! Ua pihoihoi, a ua malamalama ko'u uhane i ka hahai ana aku ma na alanui o ke Akua. Oia hoi, ano la ke lawe iki au i ka hana e hoonani aku i ke Akua a me ke Keikihipa.
                "Auhea oe! ma ka la pule ka'u kakau ana i keia palapala. Ua hoonohoia mai nei au, aole e hiki i ka pule, no ka mea, he mai ko'u kaikaina, a e noho ana au me ia ma ka hale o mea la. Ua hele mai nei au, e kokua ia ia. Aka, ua make no ia.
                "Ua manao no wau e palapala aku ia oe, e noi aku ia oe e palapala mai i kuu kaikaina. Ua ike no ia i ka hewa o kona noho ana mamua a me kona hele ole ma na aoao o ke Akua. Mamua, aole no ia e imi e hooluolu aku ia