Ke Kumu Hawaii, Volume I, Number 2, 26 November 1834 — Page 12
12 KUMU HAWAII. (Nov.
9 O ke Akua. Oia ka mea ike no Paulo. O ko Paulo hoomanao mau ana i ko Roma, ua maopopo ia i ke Akua, ka mea a Paulo i malama pono ai me ka oiaio, me ka hoike hookamani ole i ka olelo maikai a kana Keiki. Pil. iii.3. 11 Tim. i. 3. Ep. vi. 6. Rom. ii. 28, 29.
10 Nonoi aku Paulo i keia la i kela la, e hoawi mai ke Akua ia ia, ina he pono, ke hele pomaikai me ka maluhia, i kekahi manawa, aole paha liuliu loa aku e hiki aku i Roma me ka ae mai a me ke kokua mai o ke Akua.
11 He nui ko Paulo makemake e halawai ike me ko Roma, e kokua ia lakou, e hoomahuahua i ko lakou manaoio ana, a me ke kupaa ana, a me ka hauoli ana o ko lakou mau uhane, i palaka ole, i emi ole i hope, i nauweuwe ole ko lakou manaoio. Makemake no Paulo e hoomahuahuaia kona pono iho me ko lakou. Pil. iii. 13.
12 Makemake no hoi o Paulo, e hooluolu pu ia me lakou, i ka halawai ana me lakou, i ke kamailio pu ana, i ka manao hookahi ana, i ka imi pu ana i ke ola, me ka hoonani pu i ke Akua.
13 Aole o Paulo i makemake e noho ko Roma me ka ike ole i kona manao pinepine e hele io lakou la, e loaa ia ia kekahi hua iwaena o lakou, e like me ka loaa ana, o ka hua pono, o ka ulu ana o ka olelo a me ka hana a ke Akua iwaena o na lahuikanaka e ana i ao aku ai. Makemake no ia e ike lakou ia manao, a me kona kaohiia a hiki i ka wa ana i kakau ai i keia palapala. Ua paa paha i ka hana, a ke Akua i haawi mai ai ma kahi e; aole pau na kanaka i ka lohe koke. Na ka naau o Paulo ia manao e hele io lakou la, ina na ke Akua, ina ua hiki. Na ke Akua keia olelo oia ka i hiki aku.
14 He aie, he olelo hoohaahaa paha ia. Manao o Paulo he pono nona e hai aku i ka olelo maikai i ka poe Helene, ka poe naauao, me ka makaukau i na mea ma ke kino, a i ka poe hemahema hoi, ka poe naaupo me ka makaukau ole, a i ka poe i aoia, a me ka poe i ao ole ia i keia lahuikanaka i kela lahuikanaka. He kanaka hewa o Paulo mamua, a ua haawi mai ke Akua i ka pono nui, me ka lokomaikaiia mai a manao no ia he pono nona ke haawi aku, me ka lokomaikai aku ia hai. No ke aloha ka aie, a no ke kauoha a ka Haku kekahi. Roma, viii. 8.
He mau ninau, pauku 8—14.
8 Heaha ka mea mua a Paulo i hai aku ai i ko Roma?
Hoomaikai ia i ke Akua no ke aha?
Ma owai la ko lakou manaoio?
Mahea la i hookaulanaia ai ko lakou manaoio?
9 Owai ko Paulo mea i malama aku ai?
Pehea la kona malama ana i ke Akua?
Ma ke aha i malama ai ia ia?
Owai ka mea ike nona?
O ke Akua ka mea ike nono i ke aha?
10 Nonoi o Paulo i ke aha ma kana pule?
11 No ke aha la i makemake ia e like ia lakou?
12 Makemake ia e ahaia oia iho?
E hooluoluia mahea?
13 Makemake ole o Paulo e ike ole na hoahanau i ke aha?
Manao ia e hele io lakou i ke aha?
Heaha ka hua i loaa ia ia ma na aina e?
14 He aie ia nawai?
Heaha ke ano o kona aie ana ?
HELU 5.
MOKUNA I. PAUKU 15—21.
Dek. 8—14.
15 Pela hoi, ma ka mea hiki ia'u, ua makaukau wau e hai aku i ka olelomaikai ia oukou no hoi ma Roma.
16 No ka mea, aole au i hilahila i ka olelo maikai [no Kristo,] no ka mea, o ko ke Akua mana ia e ola'i, no keia mea, no kela mea manaoio, no ka Iudaio mua, a no ka Helene hoi.
17 No ka mea, ua hoikeia mai ilaila ko ke Akua hoapono ana mai ma ka manaoio, i manaoio [kakou,] e like me ka mea i palapalaia, O ka mea pono, ma ka manaoio, e ola ia.
18 A ua hoikeia mai no hoi, ka inaina o ke Akua, mai ka lani mai, i ka aia a me ka hana ino a pau a na kanaka i keakea me ka hana hewa, i ka olelo oiaio.
19 No ka mea, o ka mea e hiki ke ikeia no ke Akua, ua akaka ia ia lakou no ka mea ua hoakaka mai no ke Akua ia mea ia lakou.
20 [No ka mea, o kona mau mea i nana ole ia, mai ka hana ana mai o ke ao nei, ua maopopo lea ua mau mea la, o kona mana mau a me kona Akua ana, ma na mea i hanaia, nolaila aole o lakou mea e hoaponoia'i.
21 No ka mea, i ka wa i ike ai lakou i ke Akua aole lakou i hoonani aku ia ia i Akua, aole hoi i aloha aku, aka, ua lapuwale lakou i ko lakou manao ana a ua hooponoia hoi ko lakou naau hawawa.
KA HOOMOAKAKA ANA.
15 Pela hoi ma ka mea hiki ia'u, ua makaukau wau. Ina i hiki i ko Paulo ikaika, a i kona manao wale iho, a ina ia ia iho kona hele ana ilaila, ua makaukau no ia e hai aku i ka Iesu olelo, ma ke kulanakauhale pokela o Roma. O ka makaukau, o kona oluolu no ia, o kona lealea i keia hana, aole ia i makau i ka luhi, aole hoi me ka hoinoia mai e kekahi poe ku e.
16 No ka mea aole au i hilahila i ka olelo maikai. Aole ia i wiwo i ka hai aku, aole i makau i ka hoka, aole i manao he mea e pono ole ai, he mea e hunaia i kanaka. Aka o kona mea ia e hauoli ai koaa naau, o kona mea i paulele ai me ka mahalo, a i kaena ai me ka olioli, no ka mea o ko ke Akua mana ia e ola'i, no keia mea no kela mea manaoio. He mea mana ka olelo e huli ai, e maemae ai, e mihi ai, e manao pono ai, e naauao ai, a ala mau ke kanaka, ke lohe ia me ka malama pono. He mea mana ia e ola'i, na ke Akua no na mea a pau i manaoio, no ka Iudaio mua, alaila no ka Helene. Ua haiia ka olelo a Iesu i ka poe Iudaio mua, ma Ierusalema, a ma ia kulanakauhale aku, ia kulanakauhale aku, alaila i ko na aina e.
17 Ma ka olelo maikai na Kristo, ua hoikeia mai ko ke Akua hoapono ana mai i ka poe manaoio, ka poe i hilinai ia ia me ka hoomaopopo i kana olelo. Ua hoikeia mai ia mea i manaoio kakou, i kupono ko kanaka manao ia ia, i paulele hoi ia ia. Pela hoi i palapalaia e Habakuka. O ka mea pono, ma ka manao, e ola ia.—Ma ko ke kanaka pono manaoio ana i ke Akua, malaila ke Akua e hoola mai ai ia ia. No kona manaoio, ua hoapono mai ke Akua ia ia, aole e hoopai i kona hewa, ua kuu mai ia ia, a malama ia la me he mea hala ole la, a ola loa ia i ke Akua ma kona paulele ana. Oia kekahi mea i hilahila ole ia'i ka olelo maikai.
18 A malaila hoi, ma ka olelo maikai i hoikeia mai ai ko ke Akua inaina, kona manao e hoopai i ka aia, a me na hana hewa a pau a ka poe i keakea, i kana olelo, me ka lakou hana hewa ana.
19 No ka mea, o ka mea e hiki ke ikeia no ke Akua, ua akaka no ia i na lahuikanaka. Na ke Akua i hoakaka mea e hiki i kanaka ke ike aku.
20 O ko ke Akua mau mea i nana ole ia, aole ikeia e na maka, o kona mana mau, a me kona Akua ana, ua maopopo lea ia, ma na mea ana i hana'i, mai ka hana ana i ke ao nei. Mai ka wa i hana mai ai ke Akua, i ka lani a me ka honua, ka la, ka mahina, ka hoku, a me na mea a kanaka i ike ai, ua hoomaopopo lea ia mai ka mana mua o ke Akua. ma ia mau mea ana i hana'i, ua maopopo lea, ke nana aku, a ke noonoo pono. Ua akaka no i ko lakou manao, O ke Akua ka mea nana ka mea nana i hana. Aohe mea e hooponoia'i lakou ke malama ole lakou ia ia.
21 A ike lakou, aia no ke Akua, ke Akua ia, ka mea nana i hana ia mau mea, aole lakou i malama pono ia ia, me ka hoonani, a me ke aloha, aole lakou i hoapili aku ia ia i Akua no lakou, aka imi ko lakou manao i ka mea e, ua lapuwale i ko lakou manao hewa ana, a ua hoopouliia ko lakou naau hawawa.
He mau ninau.
I5 Heaha ko Paulo makaukau?