Ke Kumu Hawaii, Volume I, Number 3, 10 December 1834 — Page 20

20 KUMU HAWAII. (DEK.

                Papa mai la na kanaka a pau ia ia, mai komo iloko o make, no ka mea, aole lakou i manao i ka ua kanaka la. Ikaika loa ka manao o ke kanaka, no ka mea, ua eha loa oia i kona hoohewa wale ia mai mamua, a maopopo no ia ia, oia no ka Elepani i lilo; nolaila, aole ia i makau, a hele koke aku no ia i ua Elepani la. A hiki aka ke kanaka ma kahi koloke, nana mai ka Elepani ia ia, a ike iho la; ekolu ke kulokulou ana o kona ihu, i mea e maopopo ai kona aloha, alaila kukuli ilalo, a ee ke kanaka maluna ona. Alaila kokua mai ia Elepani ma ka pa ana o na Elepani hihiu, a like no kona laka me ka manawa mamua aku o kona lilo ana. Ekolu ana keiki i loaa pu me ia, na keiki ana i hanau ai mahope mai o kona lilo ana, nolaila ua waiwai loa kona haku i ka lilo ana o kana Elepani, no ka mea ekolu Elepani hou i loaa mai ai i kona lilo ana.
                A maopopo no hoi ka pono o keia kahu i hoohanaia, a maopopo ka hewa o ka poe i hoohewa mai ia ia, a aloha nui aku la na kanaka a pau i ua kahu nei. A mihi iho la ka haku, a kii koke iho la i ka poe i hooliloia i kau wa, a haawi aku la i ke kala i kela makahiki i keia makahiki, i mea e oluolu ai ke kahu a me kona poe a pau. - Lama Hawaii.
 

KE KAAO NO IONA I ALEIA E KA IA NUI.

                He kaula no o Iona e noho ana ma ka aina o ka Iseraela. Hiki mai ka olelo a Iehova i ona la, i mai, "E ku ae oe, e hele i Nineva i ke kulanakauhale nui, a e hea aku ia ia, no ka mea, ua hiki mai ko lakou hewa iluna i ko'u alo.'' O ua Nineva nei, ke kulanakauhale alii ia o ke aupuni o Asuria, a he poe kaua nui ko laila poe alii a me na kanaka.
                Makau iho la o Iona i ka hele malaila, o make. Ku ae la ia me ka manao e holo aku i Taresa, mai ke alo aku o Iehova. Iho iho la ia i Iopa; he kulanakauhale ia o ka Iseraela ma kahakai, he awa no na moku. A loaa ia ia kekahi moku e holo ana i Taresa, ee aku la ia maluna e holo pu me lakou i Taresa.
                Aka, huai mai la ka makani nui, mai o Iehova mai ma ke kai, poi mai na ale, a ane poho ua moku la. Alaila, makau ae la ka poe hooholo moku, a kahea aku la keia kanaka kela kanaka i kolia akua iho, a hoolei aku la i ka ukana o ka moku iloko o ke kai, e hoolana ai i ka moku.
                Auhea o Iona ia manawa make? E kahea ana ka poe hoomana kii i ko lakou mau akua. Aole anei o Iona kekahi e kahea ana ia Iehova ia manawa? Aole. Aia no ia ilalo e hiamoe ana. Aohe ona manao, ua kokoke e make. Haalele kela i ke Akua, a ua haalele mai hoi ka Uhane o ke Akua ia ia; aka, aole ia i nalowale. Nona no ia makani i pa mai ai. Hele ae ke kahu moku ilalo io na la, i aku la, "Heaha kou manao, e ka mea hiamoe? e ala'e oe, e kahea i kou Akua; malia palia e manao mai ke Akua ia kakou, i ole e make kakou.''
                I ae la lakou i kekahi i kekahi, "Ina kakou, e hookohokoho kakou, i ikeia ka mea nana i hiki mai ai keia ino maluna o kakou.'' Hookohukohu ae la lakou, a ua kohoia o Iona. Alaila, i ae la lakou ia ia, "Ea, e hai mai oe a makou, Nowai la e kau mai ana keia ino maluna o kakou. Heaha kau oihana? Nohea mai hoi oe? Owai kou aina a me kou hanauna kanaka?" I mai la o Iona, "He Hebera no wau, a ke makau nei au ia Iehova i ke Akua o ka lani, nana i hana ke kai a me ka aina maloo.'' Alaila, makau loa iho la na kanaka o ka moku, i aku la ia ia, "No ke aha la oe i holo mai nei ke alo o Iehova?"
                I aku la hoi lakou ia Iona, "Heaha ka makou e hana aku ai ia oe, i malie ai ke kai no kakou?'' I mai la o Iona. "E kaikai oukou ia'u iluna, a e hoolei aku iloko o ke kai; pela e malie ai ke kai no oukou: no ka mea, ke ike nei au, no'u nei no keia makani nui maluna o oukou.'' Aka, hoe nui ae la lakou e pae hou iuka, aole nae i hiki, no ka mea, ua nui loa ka ale i ka makani ikaika. Nolaila, kahea aku la lakou ia Iehova, i aku la, "E Iehova, ke nonoi aku nei makou ia oe, mai kuu oe ia makou i ka make no ke ola o keia kanaka, aole hoi e hooili maluna o makou i ke koko hala ole." Alaila, kaikai ae la lakou ia Iona, a kiola aku la ia ia iloko o ke kai, a malie iho la ke kai i kona aleale ana. Alaila, makau nui loa iho la ua poe kanaka la ia Iehova, mohai aku la hoi lakou nana, a hoohiki aku la ia ia. Aka, hoomakaukau iho la o Iehova i kekahi ia nui, a ale iho la ia ia Iona: a e waiho ana o Iona iloko o ka opu o ka ia nui, ekolu ao ekolu po. Pule aku la o Iona ia Iehova mailoko mai o ka opu o ka ia nui, i ka pule mihi. Alaila, olelo mai la o Iehova i ka ia nui, a luai mai la ia ia Iona ma ka aina.
A.B.
 

HELU 6.
KA EPISETOLE A PAULO I KO ROMA.
MOKUNA 1. - PAUKU 22-28.
Dek. 15-21.

                22 I ko lakou hoakamai ana, lilo lakou i poe naaupo.
                23 Kuai lilo aku lakou i ka nani o ke Akua make ole, a lilo mai ke kii e like me ke kanaka make, a me na manu, a me na holoholona wawae eha, a me na mea kolo.
                24 Nolaila hoi kuu iho la ke Akua ia lakou ma na kuko hewa o ko lakou mau naau i paumaele, e hoinoino iho i ko lakou mau kino iho, ia lakou lakou lakou.
                25 Haalele aku la lakou i ke Akua oiaio, no ka mea apaapa, a hoomana aku la lakou, a malama hoi i ka mea i hanaia, aole i ka Mea nana i hana, oia ka mea hoomaikai mau loa ia! Amene.
                26 No ia mea, kuu iho la ke Akua ia lakou i na kuko ino, no ka mea, ua hoololi ae ko lakou poe wahine i ka aoao maoli i ka mea ku e i ka aoao maoli.
                27 Pela no hoi na kane, i haalele ai i ka aoao maoli o ka wahine, a ua wela i ke kuko hewa i kekahi i kekahi; na kane me na kane, e hana ana i ka mea hilahila, a e loaa ana iloko o lakou ka uku pono no ko lakou lalau ana.
                28 A no ko lakou makemake ole e hoopaa i ke Akua ma ko lakou ike, kuu iho la ke Akua ia lakou i ka naau hewa e hana aku lakou i na mea e hilahila ai.
 

KA HOOMOAKAKA ANA.

                22. I ka imi ana i na akua e, i ka manao hookiekie mamuli o ko lakou makemake iho, me ka hilinai i ko lakou akamai iho, ua hoakamai na lahuikanaka, aole mamuli o ke Akua, a ua lilo lakou i poe naaupo. Ua hawawa maoli lakou.
                23 Ua haalele lakou i ke Akua nani o ka lani, ia Iehova ka mea