Ke Kumu Hawaii, Volume I, Number 3, 10 December 1834 — Page 23
1834.) KUMU HAWAII. 23
1. Ma ka hale o ke Akua i lohe ai lakou i ka leo o ka pono e naauao ai.
2 Ma ka hale o ke Akua e halawai ai lakou me ka mana o ka Uhane Hemolele.
3 Ua haawiia mai ia lakou e nonoi pu i ke Akua malaila, i ko lakoa mea e makemake ai.
4 O ka hauoli io o ko lakou naau i ka hoolea ana i ke Akua.
5 Malaila kahi e loaa'i ke ola o ka uhane, no ka mea, he puka ia o ka lani no ka poe lohe pono.
Oia na mea e pomaikai ai ka poe e noho ma ka hale o ke Akua me ka hoolea ia ia, no ia mau mea, ua maopopo ka pono o ka hana i hale no ke Akua a me ka hoolaa aku, a me ka hele pinepine ilaila, e hoomana io aku ia ia.
Pela ka olelo, alaila haawi aku makou ia hale ia Iehova, i ka Makua, i ke Keiki, i ka Uhane Hemolele, i luakini hoano nona, kahi e hoomana aku ai i ko kakou Akua maoli. A pau ia, kula lakou i "Ka ai o ka la,'' elua paha haneri haumana a keu, a ninau na kumu ia lakou i ke ano ma ke Kumu Hawaii.
A i ke alualu, i ke kolu o ka hora, hai hou aku wau i ka olelo a ke Akua, Hebera xiii. 7,8. "E hoomanao i ko oukou mau alakai nana i hai mai i ka olelo a ke Akua ia oukou, e noonoo pono i ka hope o ka lakou hana ana, e hele hoi mamuli o ko lakou manaoio: o Iesu Kristo, he oia mau no la, inehinei, a i keia la no, a i ka wa pau ole.''
I keia olelo ana, ua Emesona kekahi pule, na Pareka kekahi.
A ia po, aa iho la ke kukui iloko o ka halepule, halawai hou na kanaka e kokoke mai ana, 5 paha, 6 paha kanaha; na Emesona i hai aku i ka olelo a ke Akua ia lakou, me ka hoike i ke aloha nui o Iesu i kona poe kanaka. Eia ke kumu o kana olelo, ma Ioane x. 11. "O ke kahuhipa maikai ke waiho aku i kona ola no ka poe hipa.''
Owau hoi kekahi i hai aku ia po i ko ke Kahu kahea ana ia kakou, "E hele mai oukou a pau loa io'u nei."
Ua mai la ka ua ia po.
A hoi ae makou, pahee kuu wawae, pakika, a hina au ilalo, ma ke alanui, a haule iho la kuu pahi peni maikai loa; aole hoi i ikeia ka haule ana. A kakahiaka nui hoi makou i ka halepule i ka halawaipule, loaa ia'u kuu pahi e waiho ana ma kahi i haule ai; pomaikai au. He wahi pomaikai uuku, he olioli nae. A ina i mihi kekahi kanaka ma Kaneohe, a huli io i ke Akua i ko makou hoike ana i ka olelo a ke Akua malaila, he nui ia pomaikai no makou, a he nui loa nona; a e hauoli ko ka lani i kona huli ana a i kona ola mau loa ana.
A hiki makou i ka hale pule, pule aku la makou, a heluhelu Emesona i ka olelo a ke Akua, a hai aku la ia i ke ano o keia poo olelo, "Pomaikai lakou ke pololi, ke makewai, a no ka maikai, no ka mea, e hoomaonaia lakou.''
A i ka iwa o ka hora, halawai hou makou me ko Kaneohe, ma ka halepule, a hoike hou au i keia olelo, "Mai haohao mai oe i ka'u olelo aku ia oe, e pau oukou i ka hanau hou i pono ai." Oia paha ka mea koe i ko Palikoolau. Ua loaa ia lakou ke Kumu maopopo. Ua loaa ia lakou ke kula kumu, a me ke kula wahine, a me ke kula kamalii. Ua loaa ia lakou ka luakini hoano. Ua loaa ia lakou ka olelo hemolele a ke Akua. Ua loaa ia lakou ka lokomaikai nui ia mai. Ua makaukau hoi na mea a pau, o ka naau hou paha koe. Oia ka kakou mea e pule nui aku ai i ke Akua, e haawi mai ia i naau hou no lakou, i lilo maopopo ko Palikoolau a pau loa i kanaka hou no ka Mesia.
A pau ia mau hana ma Kaneohe, hoi aku la o Emesona a me Kuokoa ma i Waialua, a hoi mai au me kuu mau hoahele i Honolulu nei. A i ko makou pii ana i ka pali ma Nuuanu, ma kahi i make ai na kanaka auhee ia Kamehameha, manao iho la au he pono e kalai anuunuu i ke alanui ma ka Ipuolono, kahi i make ai ke kanaka ona lama, i ka haule ana. I ko makou nana ana, pii mai kekahi kanaka launa ole, he omole eleele maloko o kekahi lima, he walaau nui ano ole maloko o kona waha, he aha la hoi ko loko o kona naau? He aha la hoi ka hope o kana hana ana? I aku la au iaia, "E malama oe o make.'' Aole hiki ia ia ke hoomaopopo mai i ke ano o ka'u olelo. Ua hoopouliia kona naau. Aloha ino ka poe e hele ana ma ka pali, me ka noonoo ole.
Na'u na kou kaikaina, H.B.
NO KA POE HIAMOE A ME KA POE MOLOWA.
Auhea oukou, e ka poe hiamoe, Ua hoakakaia mai, iloko o ke ao, he umi ka hora a me kumamalua, oia na hora e hana ai ke kanaka, aole pono e hiamoe ia mau hora; iloko hoi o ka po, he umikumamalua hora, oia na hora e hiamoe ai. aole hoi e pono e ala. O ka hiamoe i ka la sabati kekahi hewa nui. O ka molowa no, oia ke kumu o ka hiamoe, nolaila hoi i waiwai ole ai keia pae aina, no ka molowa o na kanaka, a me ka hiamoe.
Lama Hawaii.
Aole he hana hooluhi ke oluolu kakou malaila.
MAKE.
Waialua, Augate 16, 1834. Ua make o Ioba Kanehailua. He kanaka kahi ko ia; 65 kona mau makahiki paha. I Waimea i Hawaii kona wahi i hanau ai. Ua ike aku oia ia Lono malaila, i kona wa opiopio.
I ka manawa o Kamehameha i lanakila ai, holo mai la ia i Oahu nei. Ua noho ia i kela manawa, mahope o ka lealea, o ka hula, a me ka puhenehene. A hiki mai na misionari, aole ia i huli koke mai, ma ka noa kona makemake. A mahope iho, ua huli maopopo mai oia. A i kona wa elemakule, powehiwehi ana na maka, hooikaika no ia, ma ka ike i ka palapala. I mai la na hoahanau, aole i ike aku kekahi i kona hihia, mai kela manawa mai a hiki i kona hopena. Ua loaa ia ia i kona wa elemakule ka ike ma ka helu kamalii, ma ka palapala-lima a me ka olelo honua. Ma ka Palapala Hemolele nae kona manao nui. Ua manao ia, aole he ola, ke make ia mamuli o ka naaupo.
Ua hookomoia oia iloko o ka ekalesia, ma Waialua nei, i ka malama o Maraki, l834. Ua olelo pinepine mai ia, ua ikaika kona manao mamuli o Iesu. A i kona mau la e mai ai, manao iho la makou, ua hoolana oia i kona manao maluna o Iesu la. "Pomaikai ka poe make, ke make iloko o ka Haku, ma keia hope aku: e hoomaha lakou i ko lakou luhi, a ke hahai nei no hoi ka lakou hana ana mahope o lakou.'' Ua hoakaka aku au i keia, i lohe na kanaka oo, a me na kanaka elemakule, o manao lakou he mea hiki ole ia lakou ke ao i ka palapala me ka malama i ka ke Akua pono. J.S.E.
Oahu: Mission Press. - R. TINKER, Editor E.H. ROGERS, Printer.