Ke Kumu Hawaii, Volume I, Number 4, 24 December 1834 — Page 29
l834.) KUMU HAWAII. 29
lakou ano: aole hoi oukou e manao iki i ko lakou hope. Aole oukou i manao e lilo ana lakou i ka hoohewaia e ke Akua i ka wa ana e hookolokolo mai ai i ka hana ana a kanaka. Ua haawi mai ke Akua i na keiki na kakou, i alakai aku kakou ma ka aoao e naauao ai i kona pono, i ao aku ai kakou ia lakou i kana olelo, i pule pu kakou me lakou i na la a pau, i papa aku kakou i ko lakou hewa a pau, a ina hookuli mai lakou, e hana eha hoi ia lakou me ka laau.
Ke i mai nei anei oukou, "Ua aloha i na keiki, aole e hiki ke hana eha aku o make? Ea, aole pela ke aloha io. O ke aloha no keia, aole ka eha ole o ke kino a make no ka uhane no ka hewa; aka, o ka imi i ka mea e ola'i ko lakou uhane. Oia ke aloha ia ia.
A, ina ma ka hooeha ana i ke kino e lilo ai na keiki i poe hoolohe a me ka malama i ka pono; o ka mea nana e hooeha i kana keiki i mea e huli mai ai ia ma ka pono, oia ka mea aloha io ia ia.
A o ka mea minamina i ke kino o ke keiki, a kuu wale aku ia e hele i ka hewa, a make kona uhane ilaila, oia ka makua aloha ole.
Auhea oukou, e na makua, o ka mea ia e koe ma keia pae aina, o ka hooponopono i na keiki, e like me ka ke Akua i kauoha mai ai. Aohe paha nui o ua keiki i malamaia pela. Aka, ina paha e manao ana kekahi o oukou e hooponopono i kana poe kamalii kolohe i hoolohe mai lakou i kona leo, ea, eia ka'u e ao aku nei ia ia: Mai hana eha ia lakou me ka huhu. E uumi i ka inaina. A hiki mai ke aloha iloko o ka naau, alaila, e hooponopono ia ia me ka laau. No ka mea, ina ike mai lakou ia oe e hahau ana ia lakou me ka huhu, e manao iho o ko lakou naau, no ka huhu oe e hahau ai ia lakou, aole no ka hewa. E hoomaikai no kau keiki ia oe, ke hooponopono oe ia ia i kona wa kamalii, aka, i ole, alaila e hoowahawaha wale mai no oia ia oe a me kau olelo i ao aku ai ia ia.
Na kekahi Kumu, A.B.
HELU 7,
KA EPISETOLE A PAULO I KO ROMA.
MOKUNA 1-2, - PAUKU 29-32-1-3.
Dek. 22-28.
29 Ua piha lakou i na hewa a pau, i ka moe kolohe, i ka opuinoino, i ka puniwaiwai, a me ka hana ino; ua paapu hoi i ka huahua, i ka pepehi kanaka, i ka hakaka, i ka hoopunipuni, a me ka manao ino:
30 he poe aki, he poe olelo hoohewa wale, he poe inaina i ke Akua, he poe kuamuamu, he haaheo, he haanui, he poe imi i na mea ino, he poe malama ole i na makua;
31 he poe hoohemahema, he poe lawehala i na mea i hoohikiia, he poe aloha ole, he poe makona, he poe lokoino;
32 ua ike lakou i ke kanawai o ke Akua, o ka poe e hana pela, he pono lakou e make, a ke hana nei no lakou ia mau mea, a ua mahalo no hoi i ka poe e hana ana malaila.
MOKUNA ii. 1. Nolaila hoi, e ke kanaka, ka mea nana e hoohewa aku, aole ou mea e hoaponoia'i, no ka mea, i kou hoahewa ana i kekahi, ua hoahewa oe ia oe iho; no kau hana ana i na mea au i hana hewa aku ai.
2 Ua ike no kakou ma ka pono ka ke Akua hoahewa ana mai i ka poe e hana ana ia mau mea.
3 E ke kanaka, ka mea nana e hoohewa i ka poe e hana pela a ke hoohalike oe me lakou, ke manao nei anei oe e pakele i ka ke Akua hoohewa ana mai?
KA HOOMOAKAKA ANA.
29 Ua piha, ua paapu loa i na hewa na kanaka i malu ole i ka olelo a ke Akua.
I ka moe kolohe. Moe i ka hai. Haalele i kekahi, moe i kekahi - aole malama i ka oihana mare.
I ka opuinoino, i ka huhu, i ka inaina, i ka manao e kolohe ia hai.
I ka puniwaiwai, i ke kuko hewa i ka hai waiwai, me ka makemake nui i ke kala a me ke gula.
I ka huahua, ka pono ole o ka naau i ka pomaikai o kekahi.
I ka pepehi kanaka - i ka powa, i ke umi kamalii, i ka pepehi hala ole, i ka pepehi huhu, me ka manao hewa.
He nui hoi ka hakaka, a me ka wahahee a me ka manao hewa o ka poe malu ole i ka olelo a ke Akua.
30 Ua aki ia hai, ua wahahee malu i kekahi, a wahahee ma ke akea, a ua hoowahawaha me ka huhu ia Iehova, a ua hailiili i kanaka, he hookano, e nana maka kiekie ana, me ka hoowahawaha ia hai; haanui hoi me ka oiaio ole, aole hoi i lohe, a i malama pono i na makua; ua haalele a ua kiola kekahi i na makua e make.
31 Ua hoonaaupo, a me ka hoohemahema, a ua haalele i na mea i ae likeia'i, ua pale i na berita a lakou i hoohiki ai, - aole ku paa me ka oiaio o ka lakou olelo, he aloha ole, me he mau makuwahine la i pepehi i ka lakou mau keiki iho: he poe hoomauhala, huhu mau, aole e hoolauleaia a launa hou; aole lokomaikai me ke ahonui, o ka lokoino ka maopopo.
32 Ua ike hoi, maloko o ko lakou naau iho, i ka manao paa o ke Akua, peneia, "O ka poe i lilo ma ia mau hewa he pono lakou ke hoopaiia,'' a me ia ike, hana no lakou malaila, a ua hoapono aku i ka poe e hana hewa ana pela. Malaila ua maopopo lea ka hewa nui o ka naau o na kanaka malu ole i ke kanawai o Iehova.
ii 1. No ia mea, he hewa io keia kanaka kela kanaka, o ka Iudaio, a o ko na aina e, ke hoahewa ia mau hana, a hana pu hoi malaila, aole o ke kanaka mea e hoaponoia'i, no ka mea, ua ike ia i ka hewa, a hana no malaila, me ka ike.
2 He maopopo hoi ia kakou ka pololei o ko ke Akua hoopai ana i ka poe i hana hewa pela me ka ike.
3 A o ke kanaka ike, a i hoohewa aku ia mau hana, a hana hoi ia malaila, aole ia e pakele i ka hoopai ana, i ka wa e hoohewa mai ai ke Akua i ka poe hewa a me ka poe hookamani wale.
HE MAU NINAU.
O na kanaka hea i hoomaopopoia ma ia mau pauku?
29 Heaha ke ano o ka poe i malu ole i ka ke Akua olelo?
Heaha ko lakou mau hewa i kakauia ma keia pauku?
30 Heaha ko lakou hewa i hoikeia make 30?
31 Heaha ko lakou mau hewa ma ke 31?
32 Ike lakou i ke aha?
Mahea la ia kanawai o ke Akua, ia manao paa paha?
Mahalo lakou ia wai?
ii. l. Pehea la e hoaponoia'i ke kanaka nana i hoohewa aku i ka hewa a hana hewa no ia pela?
2 Pehea ko ke Akua hoopai ana ia mau hewa?
3 E pakele anei ka mea hoohewa, ke hana ia ma ka hewa?