Ke Kumu Hawaii, Volume I, Number 4, 24 December 1834 — Page 30
30 KUMU HAWAII. (DEK.
HELU 8.
MOKUNA 2. - PAUKU 4 - 11.
Dek. 29 - Ian. 4.
4 A ke hoowahawaha nei anei oe i ka nui loa o kona lokomaikai, a me kona ahonui, a me kona hoomanawanui ana, aole hoi oe i hoomaopopo, o ko ke Akua maikai, o ka mea ia e alakai ia oe i ka mihi?
5 Aka mamuli o kou paakiki a me ka naau mihi ole e hoahu ana oe nou iho, i ka inaina no ka la e inainaia mai ai, a e hoikeia mai ai hoi ka hoahewa pono ana mai a ke Akua,
6 nana no e uku mai i keia kanaka i kela kanaka e like me kana nana ana;
7 i ka poe e imi ana i ka nani, a me ka mahalo, a me ka make ole, ma ka hooikaika mau ana i ka hana maikai, i ke ola loa;
8 aka, i ka poe i hoopaapaa, me ka malama ole i ka olelo oiaio, a malama hoi ma ka hewa, ia lakou ka huhu a me ka inainaia;
9 O ka poino, a me ka ehaeha maluna o ka uhane o keia kanaka o kela kanaka e hana ana i ka hewa, o ka Iudaio mua, a o ka Helene hoi;
l0 aka, o ka nani, a me ka mahalo, a me ka pomaikai, no na mea a pau e hana ana i ka pono, no ka Iudaio mua, a no ka Helene hoi.
KA HOOMOAKAKA ANA.
4 Ninau hou Paulo i ke kanaka, Ke hoowahawaha nei anei oe i ka lokomaikai nui loa o ke Akua, me ka hoomaopopo ole i keia, o ke aloha a me ke ahonui o ke Akua, o ka mea ia e huli ai oe mamuli ona, me ka mihi io i kou hewa?
5 O ka mea i aloha ole i ko ke Akua lokomaikai a i mihi ole i kona hewa iho, ua hooikaika oia mamuli o kona paakiki a me kona naau mihi ole, e hoomakaukau e ia i ka make nui nona iho i ka la o ke Akua, ka la e hoike mai ai ke Akua i kona huhu i ka hewa, a me kona hoopai pololei ana. i ka poe hewa mihi ole.
O ka noho ana o ke kanaka ma ka hewa mahope iho o kona ike ana i ka pono, o ka mea ia e huhu nui mai ai ke Akua ia ia, o ka mea ia e nui ai kona make ke huli ole ma ka pono me ka mihi i kona hewa nui.
6 E haawi ana no ke Akua i ka uku pono i keia kanaka, a i kela kanaka, mamuli o kana hana ana.
7 Eia ka hana a me ka uku o kekahi poe, o ka poe ma ke ahonui i ka hana maikai e imi ai i ka nani oluna, a me ka mahaloia e ka Haku, a me ke ola mau loa me ia, e hoawi ke Akua ia lakou i ke ola loa, i uku no lakou.
Ina hana mau ke kanaka malaila e imi pono ana e like me ka ke Akua olelo e loaa no ia ia ke ola i ka lani. Mat. vii. 7,8; Iakoba i. 5,6.
8 Eia hoi ka hana a me ka uku o kekahi poe, o ka poe ku e i ke Akua, me ka pale i kana kauoha, me he poe paio la ia Iehova, aole i malama i kana olelo pololei, aka ma ka hewa e hoolohe ai a e malama ai, e loaa ia lakou ka huhu o ke Akua a me ka inainaia mai, oia ka uku mamuli o ka lakou hana.
9 O ka poino a me ka ehaeha, o ka popilikia a me ka make maluna o na mea a pau i hana ma ka hewa aole haalele, oia kekahi uku, o ka hua ia o kela huhu, a me ka inaina o ke Akua. A ua kapaia no hoi ia hoopai ana, o ka inaina o ke Akua, [i. 18]. Ane like ke ano o ka pauku 9 me ka pauku 8.
10 Ane like ke ano o ka pauku 10 me ka pauku 7. O ka poe e hana oiaio ma ka pono, e loaa ia lakou ka nani, a me ka mahalo, a me ka pomaikai, e loaa ia lakou na mea a lakou i imi ai me ka pule, a me ka hooikaika mau ma ka hana maikai ana. Na Iesu lakou e hoonani, a e hooiaio, a e hoopomaikai imua o ke alo o kona Makua a me kona poe anela.
Nolaila, owai la ka mea e hoomalowa, a e hoonawaliwali, i ka imi aku ia pomaikai?
HE MAU NINAU.
4 Ninau Paulo i ke kanaka i ke aha?
Hoowahawaha ke kanaka i ke aha,
Hoomaopopo ole ia i ke aha?
He mea aha ka maikai o ke Akua?
5 A i aloha ole ke kanaka i ke Akua pehea aku la ia?
I ka wa hea kona make nui?
I ka la e hoopai mai ai ke Akua i ke aha?
No ke aha la e nui ai ka make o ka mea mihi ole?
6 Pehea la i uku mai ai ke Akua i kanaka?
He pololei anei ka hoopai ana mamuli o ka hana?
7 Imi kekahi poe i ke aha?
Mahea la e imi ai lakou?
Heaha ka uku e haawiia mai ia lakou?
Nawai e haawi wale mai i ke ola loa?
8 Heaha ka hana a kekahi poe?
Ku e lakou iawai?
He aha ko lakou uku?
9 Heaha ka hua o ia huhu?
Maluna owai ka poino a me ka make?
10 Heaha ke ano o ia poe?
Imi lakou i ke aha?
Heaha na mea e loaa ia lakou?
Nawai e hoonani a e hoopomaikai ia lakou?
He pono anei ke hoomanaka i ka hana maikai?
NO KA WAIWAI MOKU ILI.
Auhea oukou e na haumana? Aloha oukou. He olelo ka'u ia oukou.
Ina kahuli ka waa, me ka ukana, a kii mai na kanaka i ka waiwai, a lawe mauka, nowai ia waiwai? no ka mea waa paha? no ka mea nana i hoopakele paha? He pono no ke kokua ana.
A ina holo kekahi alii mea moku o Hawaii nei, me kona moku a me kona waiwai i kahiki, a ili kona moku malaila a kii mai na kamaaina e hoopakele i ka waiwai, a lawe mauka, nowai ia waiwai? No ka me moku anei? no ua poe kamaaina la anei? Ina e olelo ko laila alii i kona poe kanaka peneia, Eia ka waiwai pio o ko Hawaii moku ili, e kii, e lawe no oukou iho, a lawe lakou, no lakou ponoi anei ia waiwai? ea, no ka mea moku anei? Aole anei e pono ke hoihoiia mai nona, a nana e uku i ka poe hooikaika mamuli ona?
Pela hoi ma Hawaii nei. O ka poe hooikaika e hoopakele i ka moku ili nahaha, a me kona waiwai a pau, a hoopakele io i ka waiwai no ka mea moku, a hoihoi aku, he pono e ukuia mai ua poe hooikaika la e malama pono i ka waiwai o ka mea moku ili. Aka, ina manao lakou, ma ke aloha wale no e hooikaika'i, a hoihoi pau loa me ka uku ole ia mai, e hiki no pela: aia no ia lakou ia wahi. He pono ke kokua aku i ka poe poino no ke aloha: a he pono hoi ke ukuia mai ka poe hana. He mau pono lua ma ka malama waiwai moku ili. Aole pono ka waiho wale.
Eia ka uku pono. Ina nui ka lakou hana me ka ikaika, a me ke akamai, a me ka luhi, i ka malama i ka hai waiwai o ka moku ili, a manao lakou e ukuia mai e pono ai, eia ka pono, o kekahi mau kala paha, a i ole ia, o kekahi puu waiwai a lakou i hoopakele ai. Ina puunaueia ka waiwai i eha puu; hookahi puu ka uku, ekolu ke hoihoiia. A i ole ia, a ina puunaueia ka waiwai i ekolu puu, alaila, hookahi puu ka uku, elua ke hoihoiia'ku. Ina ma ke kala ka uku, alaila e hoohalike ke kala me ke kuai pono ana o ka puu hookahi. Ina ua like ka waiwai i hoopakeleia, me