Ke Kumu Hawaii, Volume I, Number 5, 7 January 1835 — Page 36

36 KUMU HAWAII. (IANUARI,

ua maopopo anei ka pono a me ka hewa i ko lakou manao?
                Ina i maopopo ole ka pono a me ka hewa, heaha ka mea i maopopo ole ai ia?
                16 I ka la hea? Pehea la e uku mai ke Akua i kanaka ia la? O ka lakou hana ana mawaho wale no anei ke hoopaiia?
                Ma owai la e hoopai pololei mai ai ke Akua i na hewa a pau? E like me ka olelo hea?
                17 Owai ka inoa a na Hebera i makemake ai?
                Mahea ko lakou oi i ko lakou manao?
                18 Mahea la na Iudaio i ike ai i ko ke Akua makemake, a e hoomaopopo ai i ka pono a me ka hewa?
                19 Manao ka Iudaio, he alakai ia nowai?
                He malamalama nowai?
                20 He kumu ia nowai? Loaa ia ia ke aha? Mahea?
                21 Heaha ke ano o keia ninau a Paulo i ka Iudaio?
                22 Pehea la i hana i kekahi poe kumu Iudaio ma ka moe kolohe? Ma na kii? Ma na mea laa?
                23 Mahea la i hoino ai na Iudaio i ke Akua ?
                24 Nawai i hemo i ka inoa o ke Akua?
                Ua kakauia ia e ke kaula e Ezekiela pehea?

HELU 10.
MOKUNA 2 - 3. - PAUKU 25 - 29 - 1-9.
Ian. 20 - 31. Feb. 1-3.

                25 O ke okipoepoe ana, he mea ia e pono ai, ke malama oe i ke kanawai, aka, ina haihai oe i ke kanawai, ua lilo kou okipoepoe ana i okipoepoe ole ana.
                26 A ina o ka mea i okipoepoe ole ia e malama i na kauoha o ke kanawai, aole anei e manaoia kona okipoepoe ole ana, me he okipoepoe ana la?
                27 A o ka mea i malama i ke kanawai mamuli o kona hanau ana a me ke okipoepoe ole, e hoahewa ia ia oe i ka mea i loaa ka palapala a me ke okipoepoeia a i lilo hoi i mea haihai i ke kanawai.
                28 No ka mea, o ka mea e Iudaio ana mawaho, aole ia he Iudaio; aole hoi ka mea mawaho [walo no] ma ke kino, ke okipoepoe ana.
                29 Aka o ka mea e Iudaio ana maloko, oia ka Iudaio, a o ke okipoepoe ana, no ka naau ia, ma ka uhane, aole ma ka hua palapala, aole no na kanaka kona hoomaikaiia, no ke Akua mai no.
                Mok. iii. 1. No ia hoi, heaha anei ka mea e oi aku ai ka Iudaio? Heaha hoi ka pomaikai o ke okipoepoe ana?
                2 He nui no ma kela wahi, ma keia wahi, eia hoi ka mua, ua haawiia mai ia lakou na kanawai o ke Akua.
                3 Heaha hoi i manaoio ole kekahi poe? E hiolo anei ka oiaio o ke Akua i ko lakou hoomaloka?
                4 Aole loa ia, aka, e hooiaioia'ku ke Akua ke hoopunipuni na kanaka a pau; me ka mea i palapalaia, I hooponoia'i oe i kau olelo ana mai, a i lanakila hoi oe i kou hoohewa ana mai.
                5 A ina e hoakaka ae ko kakou hewa i ka pono o ke Akua, heaha ka kakou mea e olelo ai? He pono ole paha ke Akua ke hooili mai i ka inaina? (ke olelo nei au ma ka ke kanaka.)
                6 Aole loa; ina pela, pehea la e hoopai mai ai ke Akua i ko ke ao nei?
                7 A ina i lilo ka oiaio o ke Akua i mea e nui ai kona nani, no ko'u hoopunipuni ana, no ke aha la e hoohewaia mai ai au e like me ke kanaka hewa?
                8 A olelo anei kakou, (e like me ka makou i olelo ino ia mai ai, a e like me ka kekahi poe i olelo ai, ua olelo makou,) E hana hewa kakou e hiki mai ai ka maikai? He pono ko lakou hoohewaia.
                9 Heaha hoi, ua oi aku anei kakou? Aole loa; no ka mea, ua moakaka makou mamua, O na Iudaio a me na Helene, ua pau pu lakou i ka hewa.

KA HOOMOAKAKA ANA.

                ii. 25, O ke okipoepoe ana, a o ka Iudaio ana, ane like pu ia mau mea. A ina malama ka Iudaio i ke kanawai a ke Akua i haawi mai ai ia lakou, alaila loaa ia ia ka pomaikai i hoakaka e ia mai no ka poe malama pono. Ina malama ole na Iudaio i ke kanawai o ke Akua, ua lilo ko lakou okipoepoe ana a me ko lakou Iudaio ana i mea ole. Aole oi ka pomaikai o ko lakou hope, i ko na kanaka e.
                26 Ina e malama ke kanaka o na aina e i ka pono, e hoaponoia ia e like me ka Iudaio malama pono.
                27 O ke kanaka aole i okipoepoeia, aole hoi i ike i ka olelo a ke Akua, e noho ana mamuli o kona hanau ana, aole i aoia ma ke kanawai, ina i malama ia i ka pono, alaila e hoahewa oia i ka Iudaio i hana hewa me ka ike i ka palapala hemolele. Aole i olelo mai o Paulo, Ua hemolele io ka mea kanawai ole, aole hoi ia i olelo mai, ua hemolele io ka Iudaio, no ka mea ua pau pu na kanaka i ka hewa, aka, ina ua hana keia paha, kela paha, ma ka pono wale no, ina ua pono ia, a e hoaponoia e ke Akua. A ina ua pono loa ka mea i okipoepoe ole ia, ina ua hiki ia ia ke hoahewa i ka Iudaio pono ole.
                28 O ka mea e Iudaio ana mawaho wale no aole ia he Iudaio oiaio, aole ia he ohua io mamuli o Aberehama, a me Mose; a o kona okipoepoe ana mawaho wale no aole me ka manaoio, aole ia ke okipoepoe oiaio ana.
                29 O ka Iudaio e manaoio i ke Akua maloko o kona naau oia ka Iudaio oiaio, a o ka hoolilo ana i ka naau i ke Akua, o ke okipoepoe oiaio ana no ia, ma ka uhane, aole ma ke kino, aole ka hoailona wale ana mamuli o ka hua palapala. O ka oiaio o ka naau, oia ka ke Akua mea i nana mai ai a i hoomaikai mai ai, aole pela kanaka, ua nana lakou ia waho, a mahalo kekahi i ko na Iudaio hookamani ana.
                iii. 1 Me he ninau la ia a kekahi, peneia. Ina pela, heaha la ka mea oi o ka Iudaio? Heaha ka pono o kona okipoepoe ana? Heaha ka pomaikai o ka Iudaio ana?
                2 Hai aku ia Paulo. He nui na mea e oi aku ka Iudaio, eia ka mua, ka mea nui loa, ka palapala hemolele, ia lakou, i ka wa i nele ai na lahuikanaka e.
                3 He ninau keia, Ina i malama ole kekahi poe Iudaio i ka ke Akua olelo, aole hoi i loaa ka pomaikai mau loa a ke Akua i hoakaka mai ai no lakou pehea la hoi ilaila? e lilo anei ka oiaio o ke Akua i mea ole, ma ko kakou malama ole ana?
                4 Hoole aku la Paulo, Aole loa ia. He pono e manao ia ke Akua he oiaio mau loa ia, ina wahahee wale no, keia kanaka, kela kanaka, a lilo na kanaka a pau i oiaio ole. He pololei ka ke Akua olelo ke hoahewa mai ia i ka poe hewa, a ina hoopaapaa kekahi mea ia a ku e ia ia e akaka no ko ke Akua pono; e hihia ole, e lanakila ke Akua, ke manao ia e hoohewa mai, a e hoopai mai hoi - e like me ka Davida olelo mihi ma ka Halelu ii. 7. "I hoaponoia'ku oe i kau olelo ana, a i maemae hoi oe i kau hoahewa ana.
                5 Me he ninau ia ia a kekahi, peneia, Ina lilo ko kakou hewa i mea e maopopo ai ka pololei a me ka nani o ke Akua, e hiki paha ia kakou ke olelo, aole pono ko ke Akua hoopai ana i ka hewa? He olelo kanaka ana keia; me ia i olelo ai kekahi poe i ae ole mamuli o ka Paulo.
                6 Hoole hou Paulo i kela ninau, Aole loaa i hewa ke Akua malaila, no ka mea, ina hewa ia, pehea la ia e hoopai pono mai ai i kanaka hewa a pau? Ua ae maopopo na Iudaio i ko ke Akua hoopai ana i ka poe kanaka hewa i ka la mahope.
                7 He ninau ia a kekahi. Ina e lilo ko'u oiaio ole i mea maopopo ai ka oiaio o ke Akua i kana olelo, a e hoonaniia ia malaila, no ke aha la e hoopaiia'i ko'u hewa, ka mea e hoonaniia'i ke Akua?
                8 Ua wahahee kekahi poe ia Paulo ma, me ka hai ana'ku penei. Na Paulo ma i olelo mai, "He pono ke hana hewa kakou, i hiki mai ai ka pono." Aole o Paulo i hooiaio malaila. Ninau mai la ia, He pono anei ke olelo kakou pela? O ka poe i hooili i kela olelo hewa maluna o Paulo ma, he pono ke hoohewaia lakou, a e hoopaiia hoi.
                9 Ninau hou kekahi, Ua oi anei kakou