Ke Kumu Hawaii, Volume I, Number 5, 7 January 1835 — Page 37

1835.) KUMU HAWAII. 37

kou ka poe Iudaio? Aole oi, ua pili ke kanawai i ka poe Iudaio, ua hewa pu lakou me ko na aina imua o ke Akua. Aole hiki i ka Iudaio ke hoopono ia ia iho imua o ke Akua, a e hoola ia ia iho ma kona pono iho, a pela hoi ka Helene, a me na kanaka a pau. Ua pau pu i ka hewa. Aka ua oi kekahi pomaikai o na Iudaio, o ka loaa ana ia ia ka olelo a ke Akua. Roma iii. 1,2.

HE MAU NINAU.

ii. 25. Ina malama ka Iudaio i ke kanawai,
he mea aha kona okipoepoe ana? Ina i malama ole ia, pehea la kona okipoepoe ana?
26 Ina malama ke kanaka e i ka pono, pehea kana okipoepoe ole ana?
27 Ina malama ke kanaka e i ke kanawai, e hiki ia ia ke hoahewa ia wai?
Ua hemolele loa anei kekahi kanaka, e hiki ole ai i ke Akua ke ike mai i kona hewa?
28 Heaha ka mea e Iudaio ana mawaho? Heaha ke okipoepoe ana mawaho wale no?
29 Owai ka Iudaio oiaio?
Heaha ke okipoepoe oiaio ana?
Nowai mai ka hoomaikaiia o ka Iudaio hookamani ole?
ii 2. He ninau ia awai; Pehea?
2 Na wai i hai aku? Pehea? Heaha ka mea nui i pomaikai ai ka Iudaio?
3 Ina manaoio ole, a malama ole kekahi poe Iudaio i ka ke Akua olelo, pehea ka oiaio o ke Akua?
4 Ina pau na kanaka i ka oiaio ole, pehea Akua?
Heaha ka mea i palapalaia no ko ke Akua hoahewa ana?
Heaha kona lanakila ana?
5 Nawai keia ninau? Heaha kona manao?
6 Heaha ka mea a Paulo e hoole nei?
7 Lilo ko ke kanaka oiaio ole i mea aha?
8 Pehea la i wahahee ai kekahi poe ia Paulo ma?
He pono ka hoohewaia owai?
9 Mahea ka like ana o ua Iudaio me ko na aina e?

NO KA LOAA ANA O KA WAIWAI.

                Nui wale ka poe makemake i ka waiwai. Pehea hoi ka loaa ana? O ka naauao ka mea e hiki ai. I ole he naauao, make hewa ka hooikaika ana ma ka hana a me ka imi. Auhea ka aina waiwai a naaupo hoi? Aole. O ka naauao ka mea mamua, alaila, ua loaa no ka waiwai ke imi , a e hana, a e hoomanawanui. O na aina waiwai a pau loa, he aina naauao no; o na aina ilihune, he aina naaupo no. Ehia tausani kala i lilo wale ma Hawaii nei no ka naaupo?
Lama Hawaii.

NO KA IONA HELE ANA I NINEVA.— E nana i ka aoao 20.

                Hiki hou mai la ka olelo a Iehova io Iona la, i mai la, "E ku ae oe, e hele aku i Nineva, i ke kulanakauhale nui, a e hai aku i ka olelo a'u e kauoha aku mai ia oe.'' Alaila, ku ae la o Iona, a hele aku i Nineva, e like me ka Iehova i kauoha mai ai ia ia. He kulanakauhale nui loa o Nineva, he ekolu la hele e hoopuni ai ia wahi. Ua oleloia, he kanaono na mile o kona apo. A hiki aku la o Iona ma ia walu, kahea aku la ia, i aku la, "A hala na la he kanaha, alaila e lukuia'i o Nineva."
                Alaila, manaoio iho la na kanaka o Nineva i ke Akua; hookeai iho ai lakou, a aahu iho la i ke kapa inoino, o na mea nui a me na mea uuku a pau. No ka mea, lohe ae la ke alii o Nineva ia olelo, ku ae la ia mai luna ae o kona noho alii, waiho iho la i kona aahu nani, a aahu iho i ke kapa inoino, a noho iho iloko o ka lehu ahi. Kena aku la oia e heaia ma Nineva a pau, "Aole e ai na kanaka a me na holoholona i ka ai, aole hoi e inu lakou i ka wai. Aka, e uhiia lakou i ke kapa inoino, a e kahea nui aku i ke Akua. Oia, e huli ae kela kanaka keia kanaka a pau mai hoi, ina no iloko o kona mau lima. Owai la ka ike e huli ae paha ke Akua e loli hou i kona manao, me ka waiho iho i kona inaina nui, i make ole ai kakou."
                A ike mai la ke Akua i ka lakou hana ana, i huli mai ai lakou mai ka aoao hewa o lakou; a hoololi hou iho la ke Akua i kona manao i ka ino ana i i mai ai e hoopai aku ia lakou. Aole ke Akua hana mai ia mea.
                Aka huhu iho la o Iona i ko lakou make ole. Hele aku la ia iwaho o ke kulanakauhale, a hana iho la ia i ka lanai malumalu ma ka aoao hikina o ia wahi, a noho iho la ia ilaila e nana i ka hopena o ua kulanakauhale la. Hooulu ae o Iehova i kekahi ipu, a kolo ae la ia, a kau mai la kona lau maluna o kona poo i malumalu nona, i mea e pau ai ka ehaeha o kona naau. A ike ae la o Iona i ka ipu, olioli iho la ia. Aka, aole ia i mihi i kona manao hewa i ke Akua i kona hoola ana i kanaka o Nineva. Nolaila, hoonoho ke Akua i ka enuhe ma ke kumu o ua ipu la, a ai iho la ia i ka ipu, a kakahiaka ae, hiki ka la maluna, mae iho la kona lau, a maloo iho la. A kau ka la maluna, wela iho la o Iona a maule iho la. Alaila, i iho la kona naau, "E aho ka make, aole pono ke ola.''
                I mai la ke Akua ia Iona, "Ua minamina oe i ka ipu au i hooluhi ole ai, aole hoi i hooulu, i ka mea i ulu wale i kekahi po, a make wale hoi i kekahi po iho; aole anei e minamina hoi au ia Nineva, i ke kulanakauhale nui, kahi e noho ana he kanaono tausani a keu aku o ka poe ike ole i ka inoa o ko lakou kuna akau a me ka lima hema, a me na holoholona he nui loa?''
                Heaha ia mau kaao no Iona ia kakou? He mau mea ao mai no laua ia kakou. Ke ao mai nei o Iona ia kakou, aohe wahi o ke Akua ole. Aia no ia ma na aina, a me na moana. Manao iho la o Iona e holo a pee i hele hou ole mai ke Akua ia ia. Aka aole i hiki. A aieia oia e ka ia nui, aole ia i nalo i ke Akua, nana no i olelo mai, a luai mai la ka ia ia ia. I mai la o Iesu, "Me Iona, ekolu po ekolu ao iloko o ka opu o ka ia nui, pela no auanei ke Keiki a ke kanaka iloko o ka opu o ka honua."
                Eia hoi kekahi, O ko ke Akua lokomaikai i ka poe mihi. He poe hewa loa ko Nineva, ua like paha lakou i ko Sodoma. Aka, "Ua mihi lakou i ka olelo ana a Iona," a kala mai ke Akua i ko lakou hewa. Ina i mihi hoi na kanaka o Sodoma ma ka olelo a Lota, ina ua koe lakou a hiki i neia manawa, Mihi ole lakou a make, a pakele hoi Lota. A. B.

                Mai hoopanee aku, a i ka la apopo, i ka mea au e hiki ai ke hana i keia la.
                Mai hoohana ia hai ina e hiki ia oe ke hana.
                Mai aie oe, ina aole ia oe ke kumu kuai, e hoomanawanui.
                O ka mea manao pinepine ole i ka lani, aole oia e hiki ilaila. O ka mea holo moku me ka manao ole i ke panana, aole oia e hiki i ka wahi ana i makemake ai.