Ke Kumu Hawaii, Volume I, Number 6, 21 January 1835 — Page 42
42 KUMU HAWAII. (1835.
hiki no ia kakou ke olelo, I mea ao mai ai ke kanaka.
Ua oi aku ka maikai o kona kino mamua o ko na holoholona a pau. He kakaikahi ke kino maikai e like me kona.
Aka, o kona ano, o ke ano ino loa ia o na holoholona a pau. I ka ike ana aku i ke Tiga, ua maopopo keia, aole ma ke kino ka maikai io, ma ka manao wale no. Ua ino loa ke kino o ke Kamelo, aka, he mea waiwai loa, he kino nani ko ka Tiga, aka, ua io aku kona ino mamua o ko na holoholona a pau.
Ua hoike mai no hoi ke Akua i kona manao malama, i kona haawi ana i ka Tiga i ke ku e kekahi i kekahi. Ina i holo pu na Tiga he nui loa, e like me na hipa, a me na bipi, a me na hoki, alaila, pau loa na holoholona i ka make ia lakou, pau pu no me kanaka. Ina pela, Aole hiki ke kanaka ke hele makaukau ole, e noho loa no ka pono maloko o na kulanakauhale i paa i ka pa. Aka, no ko ke Akua haawi ana ia lakou i ke ku e, kekahi i kekahi, nolaila, aole i nui na holoholona i make ia lakou, aole hoi i make nui na kanaka.
HE MAU NINAU.
Ua like kekahi ano o ka Tiga me ko ke aha?
Ua like ka hui o ka Tiga alii me ke aha?
Ehia kapuai kona kiekie a me kona loa.
Pehea kona helehelena? Pehea kona pepeiao a me kona waha?
Pehea kona niho a me kona maiuu?
Pehea kona ano ke nanaia'ku?
He iliohae anei ka Tiga?
He ilio pepehi anei?
Ina maona pehea ia?
He kamaaina ka Tiga ma ka aina hea?
He ilio hoolaka anei?
Ina lokomaikai aku ke kahu pehea?
Pehea ia i kona wa i huhu ai?
E holo anei ka Tiga me ka makau i ka Liona?
Noho kumu anei ka poe Tiga?
He mea waiwai anei ka Tiga?
Heaha ka maikai o ka Tiga?
Lama Hawaii.
HE UI MISIONARI.
HAKINA 1.
No na Kanaka.
1 Ehia kanaka i keia manawa ma ka honua nei?
Ua manaoia, ehiku haneri me kanakolu miliona kanaka. Hoikehonua, ka aoao 10.
2 Ehia lakou ma Europa?
Hookahi haneri me kanawalu miliona.
3 Ehia ma Asia?
Eha haneri me ke iwakalua miliona.
4 Ehia kanaka ma Aferika? Kanawalu miliona.
5 Ehia ma Amerika?
He kanaha a me kumamahiku miliona.
6 Ehia ma na moku o ka moana Pakifika?
Ua manaoia ekolu miliona.
7 Ehia makahiki e pau ai ka hanauna hookahi i ka make?
Ua manaoia, he kanakolu makahiki.
8 A ina he oiaio ia manao, ehia kanaka make i kela makahiki i keia makahiki?
He iwakalua miliona a keu.
9 Ehia e make ana i kela la i keia la?
Kanahiku a me kumamakolu tausani.
10 Ehia hoi i kela minute i keia minute?
Kanalima a keu.
11 Pehea ka hopena o keia mau kini kanaka?
"O ka poe hewa, ua hele aku lakou i kahi eha mau loa; aka, o ka poe maikai i ke ola mau loa.'' Mat. 25. 46.
HAKINA 2.
No na Pule.
1 Ua pau anei kanaka mamuli o kekahi pule?
Ae. Ua pau no; o kela hanauna keia hanauna, aohe lahuikanaka ma kahi pule ole.
2 Ua like anei ke ano o ka lakou pule a pau?
Aole loa i like, he lehulehu wale ke ano o ka kanaka pule.
3 Ua manamana anei ka pule oiaio?
Aole. Hookahi wale no pule oiaio; no ka mea, hookahi wale no Akua oiaio, a i hoomanaia kekahi mea e ae, he pule wahahee no ia.
4 Mahea la i ikea mai ai, hookahi wale no Akua?
Ma ka olelo a ke Akua; peneia:—"O Iehova, oia no ke Akua, aohe mea e ae." Kanl. 4. 35. "Hookahi hoi Akua, ka Makua o na mea a pau." Ep. 4. 6. "O oe no ke Akua, o oe wale no." 2 Na'lii 19. 15.
5 Ua papaia mai anei kakou aole e malama i na akua e?
Ae. Penei mai Iehova:—"Aole ou akua e ae imua o ko'u alo.'' Puk. 20. 3. "Aole ou akua e ae, owau wale no." Hos. 13. 4. "E hoomana aku oe ia Iehova i kou Akua, a e malama aku oe ia ia wale no."
Mat. 4. 10.
6 E pono anei ke malama ia Iehova me na kii?
Eia ke kanawai:—"Mai hana oe i ke kii i kalaiia nou, aole hoi i ke ano o ko ka lani iluna, a me ko ka honua ilalo, a me ko loko o ka wai malalo i ka honua" Puk. 20. 4. "He Uhane ke Akua, a o ka poe hoomana aku ia ia, he pono no lakou e hoomana aku ia ia ma ko lakou uhane, a me ka oiaio.'' Io. 4. 24.
Owau no Iehova, oia ko'u inoa:
Aole au e haawi i ko'u hanohano ia hai,
Aole hoi i ko'u nani i na kii i kalaiia." Isa. 42. 8.
7 Ehia pule nui ma ka honua i keia manawa e noho nei?
Eha pule nui:—O ka ka poe Iudaio, o ka Mahomeda, o ka Kristiano, a me ka Pagana.
8 Ehia kanaka mahope o ia mau pule pakahi?
Elima miliona o na Iudaio; akahi haneri me ka umi miliona o ka poe Mahomeda; elua haneri a me he umi miliona o na Kristiano; a me na Pagana, eha haneri a me kumamalima miliona.
L. A.
O na mea a pau e kahea aku i ka inoa o ka Haku e ola ia. A pehea lakou e kahea aku ai i ka mea a lakou i manaoio ole ai? pehea hoi lakou a manaoio aku ai i ka mea a lakou i lohe ole ai? a pehea hoi lakou e lohe ai ke ole ka mea nana o hai aku? A pehea lakou e ahi aku ai, ke hoouna ole ia'ku lakou? Paulo.