Ke Kumu Hawaii, Volume I, Number 6, 21 January 1835 — Page 48

48 KUMU HAWAII. (IANUARI.

KAHI MELE.

HE KANIKAU,

He kaniau aloha ko'u ia oe, e ka Haku a, e.
He kanikau aloha he u, manao mihi.
He manaolana i ka make ana o ka Haku;
I kaulia ai ma ka laau kea,
Ma ka puu o Kalavari.
Makiaia na wawae a paa i ke kui.
I kia ia i ke meki, oia i ka ihe,
Makini kona aoao.
Make ai ke Keiki hipa a ke Akua.
Ka mea laha ole, ke kupanaha ka newenewe
A kini akua, a na anela o ka lani;
Hoalaia 'ku iluna, kau ai i ka la
Nakinaki 'i ke kiaha a paa i ka ohe,
Ohi'a na mea awaawa a pau;
Ke au o ka ia, ka huahuakai, ka wai vinika,
Oia iluna i ka Mesia.
Inu Iesu i ka wai vinika awaawa,
Hoi ka eha ma ka naau.
Pule Iesu i ka Makua,
"E ko'u Makua, E ko'u Makua,
Heaha hoi oe i haalele mai nei ia'u?''
Ua hae iho nei ka paku o ka luakini,
Mai luna a lalo.
Nauwewe ai ka honua,
Nakaka ka pohaku,
Kuku ka pali haakoae,
Ala mai na ilina a pau.
Puka mai na kanaka kawalawala,
No loko mai o ka ilina.
Hele aku la i ke kulanakauhale lehulehu,
He lehu, he kini, he mano.
Ka make ana o ka Haku ia kakou e ka honua,
No kakou ka hala make ai ka Haku.
 

2.

Kani uina nakolo ka pihe,
Uina nakolo ke auhee,
Pilikua waha ka opeope,
Hii ke keiki ma ke alo.
Ue alala i ka nahele;
Kani aaina ka leo o ka hekili iluna,
Kani na kolokolo i ke kulu aumoe,
Kani oleole mai ka waha o ka uila.
Kani holoholo i ke kahakai;
Ku pi nai i ke kaha ke one,
Ke auhee a ka lanakila.
Mo ka pawa wehe ke alaula.
Puoho leleopeapea ka hanauna manu mai kahiki;
Ka auna manu o ka lewa,
No ka lewanuu ke Akua.
No ka lewalani ke kanaka,
He kanaka Iesu he Akua ia,
He ulalele Iesu mai ka lani,
He hiwahiwa na Iehova,
He keiki makahiapo na ke Akua,
Ulu ka paku ka Uhane Hemolele,
Lele hoanoano i ka imo o ka lani
Nana i ka pono i ka hewa, ua hewa ka honua,
Kani ai ka pu leo nui ma ke kuahiwi o Sinai,
He leo no kekahi iloko o ke ao,
O paipai ka lani e pili ilalo,
Pipili ka ua me ka makani;
Pili ka la me ka mahina;
Pili ka hoku me ke ao kalelewa.
Uhi ka lani poeleele, pouli ka honua,
Uhi ka pohina nalowale ka moku,
Ku ke kia ahi, ke kia lani,
Ke kia po a me ke kia ao,
Pouli ke kua malamalama ke alo;
Papapau Parao ma i ke kai ula,
I hana e Mose i kona kookoo.
Ku e ke kai me ka wai, ala, ala, make,
Ua make ka honua i ka lele mua ana,
He hope ka ke Akua o Iehova.
 

3.

Oili ke ahi mai ka lani, mai ka lima o Iehova,
Me ka luaipele, make ai ka aina o Sodoma.
Ua napoo ilalo, pau ai na kulanakauhale i ke ahi,
Lapalapa make mau, he hoailona no ka hewa,
Imi ke ahi i na lawehala,
Hahai a holo me kanaka,
Ahai ai Lota i ka mana o ka Haku;
Kuihe ka wahine ua kanalua,
Nana i na mea ike maka ai,
Paulele i na waiwai o ke kino,
Hooliloia i io paakai, ala, ala, make,
Ua make ka honua i ka lele mua ana,
He hope ka ke Akua o Iehova.
 

4.

Niniu ka lani, kaa ka honua;
I ka inaina o Iehova e kau mai ana maluna ia kakou.
Maka ai ka aina o Gomora,
A me ke kulanakauhale nui o Babulona,
A o Betasaida, O Turo, o Sidona, Kaperenauma,
Ua huli i ka po i kahi make mau.
He make kahiko mai keia
Mai ka hookumu ana mai o ka honua.
O Adamu laua o Eve i ai i ka ai i lahuiia.
Pepehi Kaina ia Abela, olelo ke koko i ke Akua,
Hookau ka hewa o ka honua mai kinohi mai.
Mai kela hanauna mai a hiki loa mai i keia hanauna.
I ke au ia Noa hana'i Noa i halelana.
Olelo mai la o Iehova,
"E luku ana au i na kanaka a pau,
A me na kamalii, a me na manu,
A me na mea kolo, mai ke alo aku o ka honua.''
Alaila haule mai la ka ua maluna o ka honua,
Hookahi kanaha la a me na po,
I ua mai ai o ka ua, maluna o ka honua,
O ka ua maluna, o ka wai malalo,
Wai kahe uka, kaikoo kai;
Kai hanee, pulawa ka moku,
Uhi ke kaiakahinalii;
Nalowale na moku i ke kai, ala, ala, make.
Ua make ka honua i ka lele mua ana,
He hope ka ke Akua o Iehova,
 

5.

Ohaoha, lia halialia, he aloha o ka Haku a, e,
Kuu hoa u, o ka po me ke ao,
Kuu hoamihi o ka wahi mehameha,
Kuu paku, kuu alakai,
Kuu hoikeike o ko wahi ikea ole ia.
Kuu hoa, hoolau, kanaka o ko wahi kanaka ole,
Kuu hoahele o ka la kikiki a; e,
E alo ai i ka ua me ka makani.
E helu ai i na alanui a pau,
He alanui makai, he palahalaha,
He ala iki mauka he ololi,
A he ala oki hoi kekahi mau ala;
He ala hau peepee me o'u hoa,
Me na hoaaloha iloko o Kristo Iesu.
Ku kamakemake ka hauoli moloko a; e,
He makemake mawaho, aole iloko,
He hoopaakiki no i ka naau.
He naau lolelua, ua kuihe,
He hookohukohu, hoiimaka wale no.
He hookoikoi.
Puahi wale no mawaho aole iloko a; e.
Na Kaeleowaipio.
 

                MAKUISI. Ua holo ilaila na Misionari ekolu mai Tahiti ae; elua o lakou mai Beritania mai, o ke kolu he Misionari kahiko i noho ma Tahiti, o Daleni kona inoa. Ua holo pu ka wahine a kekahi o lakou, o Rogesona ka inoa. Ka la 11 o ka malama Sepatemaba ka manawa i holo ae ai.
 

                Ua paiia KE KUMU HAWAII ma ka mea Paipalapala a na Misionari, HONOLULU; elua hebedoma hookahi pepa, o Wenede ka la e pai iho ai.
                Eia ke kuai ana, HOOKAHI MAKAHIKI $1.00, a na mea e lawe ka Pepa a pau.
 

Oahu, Mission Pres.—R. TINKER, Editor.

E. H. ROGERS, Printer.