Ke Kumu Hawaii, Volume I, Number 7, 4 February 1835 — Page 56
56 KUMU HAWAII ( FEB.
KAHI MELE.
KA MANAOLANA.
I ka wa poino ana,
Poi mai na ale ia'u,
Iesu oia kuu mea lana,
Poho ole ka manao.
Lana nui, lana nui.
Ma ka peno o Iesu.
Oia no ka mea hoola,
I ka lawehala nei,
Kona koko hala ole
I haniniia ae,
Ke hoola, ke hoola
I ka mea i make nae.
Ma ka lani e noho ana
Iluna lilo o ke ao,
O Iesu, e haawi ana
I ke ola, ola mau:
Malu io, malu io,
Ma ka mana o Iesu.
Hele oukou hoi io na la,
Aole kanalua hou,
Haawi aku i ke kino,
'Ka uhane, ka naau;
Nona wale, nona wale
Kakou, me na mea a pau.
A.B.
NO KA POE KU E KA PONO.
O ka poe ku e i ke aupuni o ka pono ma keia pae aina, me ka manao e hoohuli i kanaka ma ka hewa, he poe enemi lakou i ke Akua, a ua kinai iho hoi lakou i ke kukui a ke Akua maloko o ko lakou naau. O keia poe no, ke imi nei lakou e hookahuli i ke aupuni malu, a e hoihoi mai i ke aupuni hewa e malu ole ai.
NO KA HANA E HOIHOI MAI AI I KE AUPUNI O KA DIABOLO.
E nana aku kakou i ke ano o ka hana ana e hoihoi mai ai i ke aupuni o ka diabolo ma keia pae aina. Penei oukou e hana'i. E haalele mua oukou i ka pule malu, a me ka pule ohana. Mai malama i ka la hoano o Iehova. E lealea, e paani, e hooholo lio ia la. E haalele hoi i ka palapala a ke Akua, aole ao hou aku ia. E wawahi i na hale kula, a e hoolei i ka oukou mau palapala iloko o ke ahi. E akoakoa oukou i na aha inu rama, malaila e kuamuamu aku ai i ka olelo a ke Akua, a me kona poe haipule. E hookuke aku oukou i na kumu a ke Akua i hoouna mai nei, a e huli hou ae oukou i ka paani, i ka hula, i ke kake, i ka piliwaiwai, i ka inu rama, i ka moe kolohe, a me na mea e ae a pau e lealea ai ka naau.
A pehea aku ilaila? Pehea? E malu anei ko oukou aupuni e noho nei? Aohe malu! E aho ka manawa kahiko! He uuku ka oukou hewa ana ia manawa naaupo, e nui loa auanei keia hewa hou mahope. No ka mea, ina hewa hou oukou mahope o ka hoonaauao ana mai a ke Akua ia oukou, he hewa ia me ka ike i ke kanawai a me ka mea e ola'i. A o ka poe e hana ana pela, o lakou ke kau hou ia Iesu ma ke kea, i ko lakou haalele ana ia ia e like me ka ka poe nana ia i kaulia'i. A ua hewa loa ka hope o ia poe, i ka hewa o ko lakou noho ana mamua.
Ke haohao nei anei oukou ia mea? E hoao e ikea ka oiaio. E haalele oukou i ko ke Akua pono ma keia pae aina, o na alii, na luna, na konohiki, na haipule a me na kanaka. E hehi iho maluna o kona kanawai, a e hana aku i ko oukou lealea i kona la Sabati: a, e oiaio no e lilo auanei oukou i aupuni malu ole, e noho kulanalana ana, me ke kaua, ka pepehi kanaka, ka powa wale, ka aihue, a me ke kanawai ole. Aole e noho ola oukou i ke ao, aole e hiamoe lea i ka po no ka makau i ka make wale.
No ke Akua wale mai no ka malu e noho oluolu ai na kanaka o ka honua. O ko Iehova kanawai ka mea nana e hoomalu i na aupuni o na alii a me na kanaka malama ia ia. Ma na aina i ikaika ai na kanawai o ke Akua, a me ka olelo a Iesu, ua malu io ke kino a me ka waiwai o na kanaka e noho ana. Ma ia mau aina aole e hiki i na kanaka ke hoowahawaha i ka olelo a na alii, aole hoi e hiki pono i na'lii ke hookoikoi maluna o na kanaka. Ua noho oluolu lakou me ka malu a me ka makau ole: no ka mea, o Iehova ko lakou mea e malu ai. Aole pela ma na aina malama ole i na kanawai o Iehova. Ua oolea loa na kanawai ilaila, ua noho pilikia no na kanaka a pau me ka makau a me ka pili wale. Pela oukou i noho ai mamua, a pela auanei hoi oukou e noho ana, ke haalele oukou i ka aoao pono a ke Akua i hoike mai ai ia oukou. Mai hoowahawaha oukou i ka oukou mea nui e pomaikai ai, o lilo hou auanei oukou i aupuni kulanalana, e like me na aupuni hewa o keia ao. A. B.
O KEKAHI HUA O KA INU RAMA
Waiawa, Dek. 27, 1834.
O kekahi kanaka ona rama, o Umi kona inoa, ua puhi oia i kona hale i ke ahi. No ka huhu i kona hoalauna i ona pu me ia. Aiwa mau kanaka, a me na wahine, a me na kamalii paha iloko o ka hale, aka ua pakele lakou i ke ahi. Oia kekahi hua o ka ona rama.
O KEKAHI HUA O KA PUHI BAKA
Ma ka malama o Ianuari 1835, ua pau kekahi hale i ke ahi ma Honolulu nei. He ahi haule o ka moki baka.
Ua paiia KE KUMU HAWAII ma ka mea Paipalapala a na Misionari, HONOLULU; elua hebedoma hookahi pepa, o Wenede ka la e pai iho ai.
Eia ke kuai ana, HOOKAHI MAKAHIKI $1.00, a na mea e lawe ka Pepa a pau
Oahu, Mission Press.—R. TINKER, Editor.
E.H. ROGERS, Printer.