Ke Kumu Hawaii, Volume I, Number 8, 18 February 1835 — Page 61

1835.) KUMU HAWA II. 61

                Olelo no hoi kekahi, "Maanei, iloko o keia hale."
                Ua oiaio no ka olelo a lakou ekolu, no ka mea, Ma ka lani ke Akua, ma keia hale, a ma na wahie a pau loa.

HELU 14.
KA EPISETOLE A PAULO I KO
ROMA.
MOKUNA 4–5.—PAUKU 14-24—1–2.
Mar. 8—22.

                14 No ka mea, ina i lilo ka poe ma ke kanawai i poe hooilina, ina ua lilo ka manaoio i mea ole a ua ole no hoi ka mea i oleloia mai.
                15 No ka mea, o ke kanawai ke kumu o ka inaina, no ka mea, ma kahi kanawai ole, aole he ae ana maluna.
                16 Nolaila, ma ka manao ia, i haawi lokomaikaiia mai ia, i oiaio ai ka mea i oleloia'i,  na ka poe mamo a pau, aole na na mea ma ke kanawai wale no, aka na na mea ma ka manaoio a Aberahama kekahi, oia ka makua o kakou a pau,
                17 E like me ka mea i palapalaia, Ua hoolilo au ia oe i makua no na lahuikanaka he nui no, imua o ke alo o ke Akua ana i manaoio ai, ka mea i haawi i ke ola no ka poe make, a i olelo hoi i na mea i hana ole ia, me he mau mea i hanaia la.
                18 Oia ka mea, imua o ka manaolana, i paulele ai me ka manaolana e lilo ia i makua no na lahuikanaka he nui no, (e like me ka mea i oleloia; Pela no kau poe mamo.)
                19 A i kona nawaliwali ole ana ma ka manaoio, aole ia i manao i kona kino iho me he mea make la; (i kona kokoke ana i ka haneri o kona mau makahiki) aole hoi i ka make o ka opu o Sara:
                20 Aole hoi ia i kanalua ma ka hoomaloka  i ka olelo ana mai a ke Akua, aka ua ikaika ia ma ka manaoio, e hoonani ana i ke Akua;
                21 A ua maopopo lea kona manao e hiki no ia ia ke hooko mai i ka mea ana i olelo mai ai.
                22 No ia mea, ua hooliloia ia i pono nona.
                23 Aole nona wale no i palapalaia'i ua hooliloia ia nona,
                24 Aka, no kakou kekahi, ka poe o hooliloia mai ai ia, ka poe e manaoio ana i ka mea nana i hoala mai ia Iesu ko kakou Haku mai waena mai o ka pe make,
                25 Ka mea i haawi no ko kakou hewa a ua hoala hou ia mai i hooponoia'i kakou,
                Mok. v. 1 No ia mea, i hoaponoia mai kakou ma ka manaoia, he malu ko kakou me ke Akua, ma ko kakou Haku o Iesu Kristo:
                2 Ma o na la hoi i loaa mai ai ia kakou ka hookipaia ma ka manaoio, iloko o keia hoomaikaiia, kahi e ku nei kakou, a e hauoli  hoi me ka manaolana i ka nani o ke Akua.

KA HOOMOAKAKA ANA.

                14 Ina o ka poe i ike i ke kanawai Iudaio, a o ka poe i malama ia kanawai wale no i hoaponoia a i hoopomaikaiia, alaila lilo ka manaoio i mea ole, aole e loaa i kekahi kanaka ka pomaikai a ke Akua i olelo mai ai ia Aberahama ma, ma ka manaoio.
                15 O ke kanawai, he kumu ia no ka inaina, no ka mea, no ko kakou pale ana i ke kanawai, e inaina mai ai ke Akua ia kakou a e hoopai mai ai hoi. Ina aole kanawai, ina aole kakou hehi i ke kanawai. Aka ma ke kanawai ua pau kakou i ka hoahewaia.
                16 Nolaila, ina e hoaponoia kekahi, he mea haawi lokomaikaiia ma ka manaoio,  a malaila i oiaio ai ka olelo ia Aberahama, a e pomaikai io ai na mamo  a pau mamuli o kona manaoio. He makua ia no na kanaka a pau i manaoio.
                17 Ma Kinohi xvii. 5 keia palapala. "Ua hoolilo au ia oe i makua no na lahuikanaka he nui no." He nui no na lahuikanaka noloko mai o ko Aberahama  puhaka, he mau mamo lakou ma ke kino, a noho ma Kanaana kekahi, a he nui no na lahuikanaka mamuli o ko Aberahama manaoio ana i ke Akua, he mau mamo lakou ma ka manaoio, a ua pomaikai ia ia. Gal. iii. 7. Rom. ii. 28, 29 iv. 11, 12, 16. Oia kona makua ana i ka manao o ke Akua ana i paulele ai. E hiki no i ke Akua ke hoala i ka poe make; e hiki no ia ia ke haawi ia Aberahama i ke keiki i kona wa elemakule,  a e haawi hoi ia ia i mau mamo he lehulehu loa. Ua olelo hoi ke Akua i na mea i hiki ole mai me he mau mea la i hiki io mai. I mai la, "Ua hoolilo au ia oe i makua no na lahuikanaka he nui loa,'' i ko Aberahama manawa keiki ole, a me he kino make la kona kino.
                18 i ka noho pu ana o Aberahama a me Sara he kanahiku paha makahiki, a ua elemakule la a ua luwahine Sara, aole kumu o ka manaolana e hanau keiki laua, aka i ka olelo ana mai o ke Akua e hanau o Sara i ke keiki, alaila  manaolana o Aberahama e lilo ia i makua nona mamo he lehulehu loa, e like me na hoku i ka heluhelu ole ia.
                Pela no kau poe mamo Kinohi xv. 5.
                19 Ua ikaika ko Aberahama manaoio, aole ia i kanalua no ka pa ana o  Sara, aole hoi i ka ikaika ole o kona kino elemakule me he mea make la.
                20 Aole hoi ia i kanalua i ka ke Akua olelo, mamuli o ka hoowahawaha a me ka paakiki o kona naau, aka ua kupono  kona manao ikaika, a ua hoonani i ke Akua, i kona manao ana i ka oiaio a me ka mana o ke Akua.
                21 Ua maopopo io no kona manao e hiki i ke Akua ke hooko mai ia mau mea ana i hai mai ai ia ia, he mea hoi e hiki ole i ke kanaka.
                22 Nolaila, ua hooliloia kona manaoio i pono nona.
                23 Aole no Aberahama wale no i kakauia'i keia hoolilo ana o ka manaoio  i pono nona.
                24 Ua kakauia no kakou kekahi, a e hoolilo mai hoi ka manaoio i pono no kakou ke manaoio kakou i ke Akua. He mea ia e oluolu ai a e hooikaika ai ka poe a pau i manaoio i ke Akua ana i hoomakaukau i ke ola a nana hoi i hoala mai i ko kakou Kalahala: e pau no lakou i ka hoaponoia mai, e like me Aberahama.
                25 Ua haawiia o Iesu e make no ko kakou hewa, a ua hoala hou ia e hoaponoia  mai kakou a e ola loa ia ia.
                v. 1 Ua haawi lokomaikaiia ka hoaponoia  ma ka manaoio, a ua malu, ua kalaia, ua launa hoi kakou i ke Akua, mamuli o ka mohai mana. O Iesu ke kumu maoli o ka hoapono ana.
                2 Nana no i hookomo i kana mau haumana iloko o keia pomaikai, kahi e noho maluhia'i. Malaila i hauoli ai o Paulo ma me ka manaolana i ka nani a ke Akua e haawi mai ai.

HE MAU NINAU.

14 Ina ua ukuia ka poe ma ke kanawai u'aha la ka manaoio?
15 Heaha ke kumu o ka inaina? No ke aha la e hoopai ai ke Akua ia kakou?
Ina aole kanawai pehea la ka hehi ana?
16 O ke aha ka mea ma ka manaoio? I aha?
I oiaio, a i paa loa ka olelo a ka Haku na wai?
17 Heaha ka mea i palapalaia no Aberahama?
He makua ia mamua o wai?
Heaha ka haawi ana i ke ola i ka poe make?
Ua olelo ke Akua i na mea i hana ole ia pehea?
18 Pehea ko Aberahama manaolana ana?
E like me ka olelo hea?
19 Aole o Aberahama i manao i ke aha?
20 Ua ikaika o A. i ke aha?
21 Maopopo ke aha?
22 Heaha ka mea i hooliloia i pono no  Aberahama?
23 Aole nona wale no ke aha?
24 No wai kekahi Ka poe i manaoio ia wai?