Ke Kumu Hawaii, Volume I, Number 9, 4 March 1835 — Page 70

70 KUMU HAWAII. (MARAKI

mea ua pau na kanaka i ka hana hewa mai Adamu mai. Na Adamu ma i hana hewa, i kinohi, a ua pau ka laua mau keiki, a me ka laua mau mamo a pau loa i ka hele hewa, a o ka make ka uku no lakou a pau.
                13 He hala, he hewa io ko na kanaka a pau mai ka wa ia Adamu a hiki i ka manawa i haawi mai ai ke Akua i ke kanawai ia Mose, aka o kanaka ike ole i ke kanawai i kela manawa, aole lakou i manao maopopo i ko lakou hewa iho. Ma ke kanawai ka maopopo ana o ka hewa.
                14 Aka hoi ua make na kanaka mai ka wa ia Adamu a hiki ia Mose, na kanaka hewa, aole hoi i like ka lakou hana hewa, me ko Adamu. Ua papa maopopo mai ke Akua ia Adamu a ua pale a ua hehi oia i kana olelo, aole hoi i lohe maopopo kela poe kanaka i ka olelo a ke Akua. He hoailona o Adamu no Kristo, Ua alakai kekahi ma ka hewa a ma ka make, a ua alakai kekahi ma ka pono a ma ke ola.
                15 O ka hala o Adamu, aole ia i like loa me ka lokomaikai ana o Iesu. Ma ka hana hewa o ka mea hookahi o Adamu i make ai kanaka o ke ao nei, ua hanau mai lakou me ka hemolele ole, a maloko o ka pilikia no hoi, kahi e hele hewa ai a e make. Aka ua nui io, ua oi loa ka lokomaikai mai o ke Akua i kanaka o ke ao nei, o kona makana i haawi lokomaikaiia mai ai ma o Iesu la, ke kumu hookahi o ka pono a me ka pomaikai. E hiki no i kanaka malaila ke lanakila loa maluna o ka hewa a Adamu i hookumu ai.
                16 O ka hoahewa ana ma ka hana hewa hookahi ana e make, aole like ia me ke kala lokomaikai ana i na hewa he nui wale.
 

HE MAU NINAU.

                3 Hauoli kakou i ke aha?
                Heaha ka mea e nui ai ke ahonui?
                4 Hana ke ahonui i ke aha?
                Heaha ka hua o ka hoaoia?
                5 Heaha ka mea e hoka ole ai?
                Hoonuiia ke aloha ia wai?
                Hoonuiia wai?
                6 Heaha ko kakou nawaliwali?
                Make ka Mesia no wai?
                7 E oluolu anei kekahi kanaka ke make no kekahi kanaka?
                8 Mahea la i hoomoakaka mai ai ke Akua i kona aloha ia kakou? Heaha ko kakou ano maoli?
                9 Ina hoaponoia kakou ma ko Iesu make ana, heaha ka mea maopopo loa hou aku?
                10 I ko kakou manawa hea i hoolauleaia'i kakou?
                Ma ke aha?
                A i malu kakou ma kona make e ahaia kakou ma kona ola. Auhea ka mea paakiki a me ka mea oluolu o ua mau mea la?
                11 Hauoli kakou ia wai? Ma o wai la?
                12 Heaha ka mea i puka mai i ke ao nei ma ke kanaka hookahi? Nawai i hookumu i ka hewa ma keia ao? Heaha ka mea i puka mai ma ka hewa? No ke aha la i kau mai ai ka make maluna o na kanaka a pau? Ina e make mau loa na kanaka, ea, no wai ka hewa e make ai lakou?
                13 Heaha la ka mea nui mawaena o kanaka mai ka wa i kinohi, a kakauia'i ke kanawai i ka wa ia Mose?
                I kela wa kanawai ole na wai i manao maopopo ole i ka hewa?
                14 Lanakila ke aha i ka wa ia Noa a me Lota, aia manawa a pau mai Adamu a ia Mose?
                Mahea ka like ole o ko lakou hewa me ko Adamu?
                He hoailona o Adamu no wai?
                15 Like ole ka hala me ke aha? Ehia ka poe i hanau me ka hemolele ole, maloko o ka pipilikia ma kahi e hele hewa ai a make, ke kokua ole ia mai? O wai ke kokua lokomaikai mai no na kanaka a pau?
                O ke aha ka mea oi, o ka poino a Adamu i hookumu ai, a o ka pomaikai paha a Iesu i hookumu ai?
                16 Like ole ka hoahewa ana me ke aha?
                No ka hala ehia ka hoahewa ana? Heaha ka hope?
                No na hala ehia ka lokomaikai ana? Heaha ka hope?
 

                "Mai hoohiki ino oe i ka inoa o Iehova o kou Akua; no ka mea, aole e hoapono o Iehova i ka mea e hoohiki ino i kona inoa."
 

"Mai pepehi kanaka oe.''
 

NO KA MALAMA ANA I NA KEIKI.

                Ua kupu wale mai ka hewa iloko o ka naau o na keiki. O ka hewa ka lakou makemake, aole makemake i ka pono. Nolaila, ina waiho wale aku na makua i ka lakou mau keiki, ua like na keiki me ka aina i waiho wale ia. Kupu nui mai ka nahelehele, a hua nui mai i ka hua ino. Pehea la e pono ai? E nana i ka mahinaai. Pehea la e pono ai ai? Ina palaualelo ke kanaka nona ka aina, paapu ka aina i ka nahelehele. O ka hana, oia wale no ka mea e pono ai. Ka malama pono ia ka aina, a e hukiia na mea ino e kupu wale ana, a kanuia ka hua maikai, a e kipulu hoi i ka aina; alaila hua nui mai ka aina i ka hua maikai.
                Pela no na keiki. Ina molowa na makua, a waiho wale aku i na keiki pau lakou i ka hele hewa, a hua nui mai lakou i ka hua ino, a poino pu na keiki a me na makua. O ka malama pono i na keiki me ke ao aku ia lakou i ko lakou wa uuku, oia ka mea e pono ai. Olelo mai o Solomona, "E alakai i ke keiki ma ka aoao e pono ai ke hele ia, a hiki i kona wa e oo ai, aole ia e haalele aku.'' I mai hoi o Paulo, "E na makua, mai hoonaukiuki aku i na keiki a oukou: aka, e aloha ia lakou ma ka hoopono a me ka hoonaauao a ka Haku.'' He hana nui no keia. Ina naaupo na makua, a hemahema hoi, aole hiki pono ia lakou ke hana i keia hana, aka, ina naauao na makua a akamai i keia hana, pono pu na makua a me na keiki. O ka wa uuku loa ka manawa pono e hoomaka ai i keia hana.
                1 Eia kekahi mea nui e pono ai na keiki; O ka hoolohe mai o ke keiki i ka ka makua, mai ka wa uuku loa.
                O ka pono e malama ka makua i kana keiki ponoi me ka hanai pono ia ia, aole haalele, aole haawi wale aku, aka, e alakai ia ia ma ka pono me ka molowa ole. Ina huhu ke keiki, aole pono e waiho aku ia ia, e ao aku a pono kona manao, a pau ka huhu. Ina hookiekie ke keiki, aole hoolohe i