Ke Kumu Hawaii, Volume I, Number 12, 15 April 1835 — Page 96
96 KUMU HAWAII. (APERILA,
KAHI MELE.
Ahaaina Euanelio.
E ko ke ao, hoolohe mai,
Hauoli nui no;
Ua kani mai ka pu maikai—
"E hele mai oukou."
Ka poe e ai makani nei,
A maona ole no;
E na pololi, me na mai,
E hele mai oukou.
Hoomakaukau mai nei Iesu
I ahaaina mau,
He ai, he waina, he waiu;
E hele mai oukou.
Ka poe maule makewai,
Mai lilo i ka po.
Maanei ke kumuwai maikai,
E hele mai oukou.
Na Iesu no i wehe mai
Ka puka e ola'i;
Eia makou ke hele nei
E komo pomaikai.
He ola e hauoli ai
Na uhane i ke ao;
He ahaaina nani nei--
E hele pu kakou.
H. B.
Waioli, Kauai, Ian. 23, 1835.
Aloha oukou, e ka poe misionari mai Hawaii a Kauai. Ua pau kuu manawa i noho ai me Mr. Wini. Eia au, i keia makahiki o ka Haku 1835, ma Waioli me Mr. Alekanedero. Owau no kekahi haumana ana e ao nei i ke kula. Eia na olelo ana e ao mai nei ia makou, he mau Huina Hawaii, ka Hoikehonua, ka Helunaau, ka Helukamalii, ka Palapalaaina, Huina Tahiti, o Asia, o Europa, o Aferika, o Amerika Akau, o Amerika Hema, o Amerika Huipuia, a me ka Moana Pakifika ma Hawaii nei, a me kekahi mau poepoe iho. Ke hoike nei ia i ke ano o ia mau palapala ia makou.
Ua paa ka hale pule o makou me Alekanedero i ka malama o Detemaba, ka paa ana, i ka la 29. He umikumamalima anana ka loa a me ka iwilei hookahi a me ke kapuai hookahi; elima no anana ka laula a me ka iwilei hookahi. Eha no kia maloko; eha anana ke kiekie. He manele ka laau a he laau e no kekahi, ke ahakea, ka lehua, ka ohiaha, ka lama, ke koa, a me ka akupa.
Eha no puka nui;--elua ma ke alo; hookahi ma kela kala, hookahi ma keia kala;--hookahi puka aniani ma ke kua he wahi ia e hoikeia ai ka olelo a ke Akua, a me ka nani, a me ka oiaio, a me ke kauoha a ka Haku ia ia, e hoike i kona makemake maanei. Olioli na kanaka a pau i ka Haku ia Iesu Kristo, i ka la mua o Ianuari, pae mai o Mika Wini mai Waimea mai i ke ahiahi loa, kokoke e napoo ka la, hiki ia ma ka hale o Alekanedero o ka po iho la no ia, na Alekanedero no i palapala aku, a o ka lua o ka waa o Daniela ma, holo hewa lakou i ka poaha la lakou i Kalihiwai, ike lakou ia Mokuaeae, hoi hope mai la lakou, a malamalama i Haweanui, he lae no ia makai o Puupaoa, pae lakou ma Waioli i kahi i nahaha ai o Haaheo moku; i ka lua o ka la Feraide 2, ka pae ana o Daniela ma.
I ke kolu o ka la Ianuari, hoike makou ma Waioli, na kumu, na haumana, na hale kula a pau loa mai Kalalau a Kealia na aina ia ma ke kihi; hele mai lakou a pau loa, a me Koolau, he hale kula ka'u malaila i Koolau, Pilaa ka inoa o ka aina Kapuka manienie. Hoike nui makou ma Waioli;--48 haumana a Alekanedero ka poe kumu, 57 a kana waihine. Aha la o Mika Wini ma Waioli me makou. Ka ahaaina a ka Haku i ka la Sabati. Hana lakou i ka oihana o Iesu me ka manao aloha i ka make ana o ka Haku. Olioli na kanaka a me na wahine, makou pu a pau loa. O ka lua ia o ka ahaaina maanei. Ke pule nui nei na kanaka me na wahine i ke Akua ke halawai pu nei me ia i kahi mehameha, a me kana kauwa no hoi e ulu paha uanei ka pono o ka Haku maanei i kekahi manawa aku; aole nae i ike pono ia, aia no i ka Haku mai.
Eia ko'u manao ia la, o ke aloha ko'u mea nana i hookupaa mai ka makemake a me ka olioli iloko o ka Haku o Iesu. Ike aku la au ia ia ma ke kea e wawahiia ana kona kino, a me kona koko e hookaheia ana no ka poe mai. Manao no hoi au o ko'u uhane kekahi e ola ma kona koko.
He lalani hale ko makou i Waioli, o Betelehema ka inoa, no Davida Papohaku. He umikumamakolu hale hou i paa. He kauhale pono ko makou ma Waioli nei. He oluolu ka noho ana. He maikai ke kuahiwi. He kupu na mea uliuli.
He puia ka nahelehele makee, okoa no i ka nani o ka pua. Eia na pua o ka nahelehele o keia aina; pua hala, pua hinalo, pua hau, pua koolau, pua kokio, pua kaioe pua iliau, a ame ka lau o ka Asia, ula i ka la, iula ma ka pua i ka wai aliali.
Eia kekahi ke manao nei au; ke emi nei na kanaka o keia aina; 48 kanaka i ka make i keia mau malama i hala aku nei, no Koolau kekahi, no Halelea kekahi; aole mea e paaai ko lakou hakahaka; koe mai ka nui a loaa ka makahiki hou o ka Haku 1835. Kuahaua o Kapuniai i na kanaka o Kauai nei, hele aku o Puna a me Koolau a me Halelea koe makou, hele aku la o Davida ma, kauoha iho la i kona hoahanau ia Mareko e malama i ka hale pule o puhi maluia e ka poe kolohe, ka poe kipi i ke aupuni o ke Akua. Kiai iho la o Mareko ma i ka po, a kakahiaka nui hele aku la au ma kona hale, i mai la kana wahine ia'u, o Makakeokeo kona inoa. "Pau no paha oukou i ka hiamoe i ka po nei, aole oukou ala, ilaila o Mareko ma, e kiai i ka hale pule, o puhiia, i ke ahi." I aku la au ia ia, "Owau ka mea nana e puhi?" I mai la ia ia'u, "Ua ike aku hoi oe, he po moe ka hoi kou." I aku la au ia ia, "Aole e hiolo keia aupuni ia lakou ua kupaa loa." I mai la ia, "He ike ole paha nou i ka luhi, ina paha oe e pii ana i ka laau iuka ina paha ua ike oe i ka luhi."
N. KEOAHU.
MAKE.
Ua make aku la, ma Lahaina, Aperila 9, o Korenelio Ogedena, he keikikane a Mr. Polena.
Oahu:—Mi ssion Press.