Ke Kumu Hawaii, Volume I, Number 14, 13 May 1835 — Page 112

1835) KUMU HAWAII. 111

paulele i ka mea e ola i; aka o ka paulele ana i ka ka Uhane i kauoha mai ai he mea e pakele ai i ka make a e loaa ai hoi ka pomaikai o ke ola mau ma ka lani.
                7 O ka naau ma ke kino he mea ku e ia i ke Akua, aole launa, aole i makemake ia ia, aole i malama i kona kanawai hemolele, aole hiki ia ia ke noho pono malalo iho o ko ke Akua kanawai. Ua huhu, ua inaina, ua hoowahawaha ia naau i ke Akua.
                8 I ka noho ana mamuli o ko ke kino manao aole hiki ke hooluolu i ke Akua. Ua inaina mai ke Akua ia noho ana, aole oluolu ke Akua i ka hana a ka poe i noho mamuli o ka naau ku e ia ia. O ka huli mamuli o ka Uhane ka mea e oluolu ai ke Akua.
                9 He poe ma ka Uhane oukou ke noho ka Uhane ma ko oukou mau naau, aole ku e oukou ia ia. Rom. viii 14.17. Ina nele kekahi kanaka, aole hoi noho ka Uhane a Kristo i hooana mai ai, maloko ona, aole no Kristo ia kanaka. He mea ku e ia, aole lilo nona. Ina aole i alakaiia ke kanaka e ka Uhane o ke Akua, aole ia ke Kristiano, aole he ohua oiaio no ka Mesia.
                10 Ina i alakai pono ia oukou e ka Uhane o Kristo, ua uumiia ka manao hewa o ke kino, i make ia, ola hoi ka uhane, olioli ia no kona hoohuliia ma ka pono.
                11 Ina e noho ka Uhane o ke Akua iloko o oukou, ka mea i hoala ia Iesu, e hoola hoi oia i ko oukou mau kino maoli, e lilo ia i mea e hana ikaika me ka oluolu, mamuli o ka pono.
                12 Nolaila, aole pono ke malama hou i ka hewa o ke kino i makemake ai.
                13 Ina hookauwa ma ka hewa, e make oukou, aka i na ma ka Uhane o ke Akua i uumi ai oukou i na manao ma ke kino e ola no oukou.
                14 He poe keiki na ke Akua ka poe i alakaiia e ko ke Akua Uhane, ua lohe lakou ia ia me ke aloha.
                15 O ka naau hou i loaa ia oukou, aole like ia me ke kauwa pio hooluhi e haalulu ana i ka makau i kona haku, o eha hewa, o make hoi ia ia. aka, he naau aloha no ia me ko ke keiki aloha, e kapa ana i ke Akua he Makua. Ina i hoolilo ke Akua ia kakou i mau keiki nana, e hiki ia kakou ke olelo aku ia ia, me ke aloha a me ka paulele, e Aba, e ka Makua. O aba, he inoa ia o ka makua ma ka aina Kaledaia.
                16 Ina i haawi mai ka Uhane, i keia manao aloha iloko o kakou, malaila i maopopo ai ko kakou lilo ana i mau keiki nana.
                17 Ina he mau keiki kakou nana, e ili mai kona waiwai ia kakou, e waiwai pu kakou me Kristo i ka waiwai o ka lani. Ina e pilikia pu kakou me ia no ka malama ana i ko ka Maua makemake, alaila, e pomaikai pu me ia i kahi e ola mau ai.

HE MAU NINAU.

1, 2 O ka poe hea e lilo ole i ka hoopaiia? Pehea la i kaawale ai lakou i pili ole mai ai ka hewa a me ka make?
3 Heaha ka mea hiki ole i ke kanawai o ka hana?
Ina aole malaila e oki ai ko kakou hewa aole hoi e kaawale ai ka make, e hiki anei ia ia wai?
Mahea la i hoahewa mai ai ke Akua i ka hewa iloko o kakou i ulu hou ole, a i hoopai ole ia hoi?
4 E malamaia ke kauoha e ka poe hea?
5 O ka poe ma ke kino, lilo ko lakou manao mahea?
O ka poe ma ka Uhane, mahea ko lakou manao?
6 Heaha ka hope o ka manao ma ke kino? Heaha ka hope o ka paulele ana ma ka ka Uhane?
7 O ka manao hewa o ke kino, ua ku e ia ia wai? E hiki ole ke malama ia naau i ke aha?
8 Owai ka poe hiki ole ke hooluolu i ke Akua? Pehea la e oluolu ai?
9 Mahea kakou ke noho ka Uhane o ke Akua iloko o kakou?
Owai ke kanaka i lilo ole no Kristo?
10 Ina ua loaa ia kakou ka Uhane o Kristo, pehea ko kakou naau hewa? Pehea ka uhane o kakou?
11 O ke kino maoli o ka poe pono, pehea la ia?
12 He pono ole ke malama i ke aha?
13 Ina malama kakou ma ke kino heaha ka hope?
Ina ma ka Uhane i hoopau ai ka manao hewa heaha ka hope?
14 Owai ka poe keiki na ke Akua?
15 Like ko lakou manao me ke aha?
16 Ina na ka Uhane mai ia manao, maopopo ke aha malaila?
l7 Ina he poe keiki kakou nana, heaha ka hooilina?
Ina i pilikia pu kakou me Kristo, heaha ka hope?

E nana i ka aoao 78.
NO KA LA SABATI.
PUKAANA xx. 8.

                3. Ua papaia mai no hoi ka hana hewa ma ka la Sabati.
                Heaha la ka hana hewa ma ia la? -O ka hana ma ke kino ua hewaia, ua pono ole. Ua papaia mai la ia e ke kanawai I mai la ke Akua, penei; i na la eono e hana'i oe i kau hana a pau aka o ka hiku o ka la he Sabati ia no Iehova no kou Akua. Aole loa e hana ia la, aole oe, aole hoi ko keiki kane, aole hoi ko kaikamahine, aole hoi kau kauwa kane, aole hoi kau kauwawahine, aole hoi ka uholoholona, aole hoi kou kanaka e, ma kou wahi. Pukaana 20:9, 10.
                E pono ia oukou ke hoopau i ka hana o ke kino ma ka poaono. E hoomakaukau i ka ai a me ka wai, a me ke kapa aahu, aole pono ke hoomakaukau i ka ai a me ke kapa komo ka la Sabati. O ke kalua ai a me ke kumu - a me ka pulehu a me ke koala, a me ke hoolapalapa, aole paha he pono o ia mau hana ana ma ko ke Akua la.
                I mai la ke Akua i ka poe Iseraela mamua loa ia lakou i auwana ai ma ka waonahele, peneia, "Aole oukou e kahu i ke ahi ma ko oukou wahi e noho ai (no ka kana ai) ma ka la Sabati''
                "Eia hoi ka mea a Iehova e olelo mai ai, o ka la apopo, he la hoomaha ia oia ka la Sabati laa, no Iehova, ka mea a oukou e kalua'i e ka lua, a o ka mea a oukou e hoolapalapa'i e hoolapalapa (ma la e hoouluulu ai — o ka hiku o ka la - o ka la Sabati ia ia la, aole. Ua haawi aku la o Iehova ia oukou i ka la Sabati, no ia mea ua haawi aku la ia na oukou ma oukou a pau, o kela kanaka o keia kanaka, ma kona wahi iho, mai hele ke kanaka mai kona wahi aku (e kii i ka ai) i ka la Sabati. Hoomaha iho la na kanaka ma ka hiku o ka la.'' Pukaana 35:3. 16:23, 26, 29.
Ua pili no ia mau olelo ia kakou e noho nei.
                Aole pono ke kuai aku a kuai mai ma ia la. Aole pono ke lawaia a me ka hooholohololio no ka lealea paha no kekahi mea pono ole e ae paha. Aole pono ke hele aku ma kahi e e ike i ka makamaka paha e hana paha, e imi ai paha.
                Aole hoi e pono ke hoi mai ma ia la - aole pono ke kau i kauhale e ike aku a e kamailio aku i ka poe hoahanau a me ka poe hoalauna a me ka poe kahuna e hai mai i ka manao. Aole hoi e pono ke hooholo moku a me ka waa ma ka la kapu. Ina holoka moku ma kekahi la e ae a hiki ka la Sabati ina aohe wahi e ku pono ai ka moku aole e hiki no ke holo aku, aole paha hewa.
                Ina paha e holo ana oukou ma ka moku, a ku ia ma ka la Sabati a pae oukou ma ke kahakai - a ma uka loa ko oukou wahi e noho ai - aole paha pono ke pii, e noho no ma ke kaha. A ina he halawai malaila e halawai oukou a e heluhelu palapala, e pule hoi a noa ke kapu, alaila pii. Aole hoi oukou e hanai ke kau ko oukou kauhale ma kekaha ma kahi loihi aku, aole koke mai i ka wahi e ku ana ka moku. Ina paha e hele aku ana oukou a e hoi mai ana paha a