Ke Kumu Hawaii, Volume I, Number 14, 13 May 1835 — Page 113

112 KUMU HAWAII. (MEI.

loaa ia oukou ka la Sabati ma ke ala, ina paha e pono ke noho malie me ka hoomana aku i ke Akua a noa ke kapu alaila hele hou.
                O ka hana lealea a pau, o ka paani, o ka heluhelu i na olelo no na mea olalo nei, i ka olelo honua paha, i ka helu paha, i ke ana honua paha, a me na mea like, aole pono ia, ua hewa, ua papaia mai e ke kanawai, mai hana ia mau mea ma ko ke Akua la.
                4. O ka molowa - oia hoi kekahi mea e papaia mai ma keia la.
                Ua hewa no ia ma na la a pau, a mahuahua e no ka hewa ma ka la Sabati. O ka noho wale, o ka manao ole, o ka hiamoe ana o ka poe ikaika ma ke ao, o ka lilo ana i ka puhi baka, a me ka uhauha. Ua hewa no ia. Oia ka hoole ana i ka la kapu. Haawi mai la ke Akua ia la, i la e hoomana aku ai ia ia a e imi ai i kana olelo, a e hoolohe ai i ka pono, a e hoomakaukau ai i ka uhane no ka lani. Pehea la ka molowa ma ia la? Ua papaia mai.
                Aole hiki, nolaila ua hewa ka poe hele ole i ka halawai, a me ka poe hele i kekahi manawa i ke kakahiaka paha, a ma ke ahiahi, noho ma ka hale a hiamoe paha, a hana paha i na mea lapuwale. Ua hewa hoi ka poe hele i na halawai a pau, a lohe ole, manao ole i ka mea a lakou e lohe ai, a hiamoe paha ma ka hale pule; a pau ka halawai, lilo paha lakou i ka molowa a me ka palaka. Ua akaka no na mea i papaia mai ma ka la Sabati.
                E na makamaka, na hoahanau, ua pale aku anei oukou i keia mau hewa a pau ma ko ke Akua la? i ka manao hewa, i ke kamailio hewa, i ka hana hewa, a me ka molowa? Aole anei i lilo ko oukou manao, a me ka oukou olelo ma na mea lapuwale, na mea i papaia mai ma ia la, aole anei i hiamoe kekahi poe ikaika oukou kekahi manawa ma ke awakea paha ma ke ahiahi paha? E hai pono mai oukou.
                E hilahila oukou ea, a e mihi koke i ko oukou hewa me ke kanalua ole, i pau ko oukou paumaele a i pakele ae hoi oukou i ka inaina o ke Akua e kau mai ana maluna o ka poe malama ole i ka la Sabati. L.L.

                May 1. Holo mai ka moku o kohola o Wiscasset, ka inoa, no Wisekaseta, 12 mau malama ka holo ana, 250 barela aila i loaa.
                5. Thomas Williams, Allen, Setonitona, 22, 750.
                Ana Parry, Ray, Potesemauta, 27, 1,200.
                7. Independence, Brayton, Nanetuketa, 18, 1,200.

KAHI MELE.

Ka leo hea i ka poe hoopanee mihi.

Auwe ka poe i hoopanee,
A mihi ole no!
Ua puni i ka wahahee,
A make mau lakou.

“Ano, e mihi ai oukou,”
Kauoha mai Iesu;
"Mamuli" - wahi a lakou,
"Alia, a huli no.''

Alia, alia! Mamuli no!
Me e na alalai!
He mau pahele a ka po,
E make nui ai.

O keia wa kaawale no,
Ka la e ola ai;
I keia la, e lelepau
Ia Iesu ka Mohai.

E mihi hoi, o make pu,
Mai kanalua hou;
Hoolilo io ia Iesu,
O lilo i ka po.

Mamuli pau ka leo nei,
I hea ia oukou;
Kokoke mai ka la hoopai,
E huli pu ano. H.B.

Wailuku, Mei 4, 1835.
                I keia la, ua hoikeia na kula mai Waihee a Waikapu. Eia ka papa i kakau iho nei.
wahine kane a pau,
Owaihee, 40 28 68
Napoko, 3 5 8
Waiehu, 13 13 26
Waikuli, 11 10 21
Wailuku, 43 42 85
Waikapu, 63 36 99
Ke kula o makou, 43 32 21 kam.
A pau loa 403.

                Ua nawaliwali ka makou mau kula i keia manawa. Mamua, nui na haumana. I keia manawa, aole. Mamua, nui ka makemake o kanaka i ka palapala; i keia manawa, aole. Ua hooemiia mai ka poe ike i ka olelo a ke Akua. E hoi hope ana lakou. Aloha ino lakou. Ua koia ka Iesu olelo. "Ua hiki mai ka malamalama iloko o ke ao, a makemake na kanaka i ka pouli, aole i ka malamalama, no ka mea, ua hewa ka lakou hana ana." Heaha ka mea e pono ai, i keia wa popilikia? Elua mea paha. O ka hoolako ana i kekahi poe kumu, i hele lakou ia wahi aku, ia wahi aku e ao aku i ka poe naaupo; a o ka ninini ana mai o ka Uhane Hemolele. Pono kakou ke hooikaika ma ke kula i ke ao ana i na kumu, a pono no hoi ke pule pinepine i ke Akua nona ka mana, e kokua mai mamuli o ka kakou hana ana, i ninini mai ia i ka Uhane Hemolele maluna o kanaka, a pau lakou i ka hanau hou e pono ai.
                Hookahi mea e hina iki ai ko'u manao, i keia manawa. Ka mahuahua iki ana o ka naauao ma ke kula a'u i ao aku, a me ka maikai iki o ke kula kamalii. Ua huipuia kekahi poe makua me ka manao paa e kaohe i ka lakou poe kamalii ma ka pono. Eia kekahi mea a lakou i hana'i. Hoouna lakou i ka lakou poe kamalii i ke kula i kela la i keia la. O ka hora eiwa, komo lakou, a i ka hora umikumamalua, puka lakou iwaho. Eia ka mea e pono lakou, ke hoonawaliwali ole lakou. J.S.G.

                SUMATERA. - O ka pepehi ana i na Misionari. Ua pepehiia na Misionari elua e na kanaka o Sumatera. He mau misionari, mai Amerika mai, Rev. Henry Lyman, (o Heneri Laimana) kekahi, a o Rev. Samuel Munson, [Samuela Munesona] kekahi. Holo pu mai me ka laua mau wahine a Iava: waiho iho la i na wahine ma Batavia, i Iava, a holo i kekahi mau aina e imi i na kanaka i nalowale, i ike hoi i kahi e hiki ai ke hoolaha i ka olelo a ke Akua. A hiki ma Tapanuli, halawai laua me kekahi mau alii me na kanaka, launa mai no lakou ia laua—Anahulu laua malaila, aole koloheia mai.—A i ko laua hele ana iuka nia kahi i launa ole mai na kanaka i ka haole olelo kekahi poe, mai hele olua i kela poe Bataka, o make olua ia lakou. Aole laua makau i ka make o ko laua kino, manao no e hele e launa aku i kela poe ku e. A hiki, puni laua me ko laua huakai, i na kanaka kii e, elua paha haneri. Aloha aku na misionari ia lakou, haawi i ko laua mau papale, a me ka waiwai e.—Aole laulea lakou, a lele mai lakou ia laua, pepehi a make, a hemo na lala. Make hoi kekahi o ka laua huakai. pakele ka nui he 15.- A lohe no hoi keia poe, ua pau kela mau mea a ekolu i ka aiia e kela poe pepehi kanaka. - Pilikia ka laua mau wahine. Ehaeha pu kakou. Aole kakou ike pu i ke ano o keia mea kaumaha. E hiki no i ke Akua ke hoopuka mai i ka pomaikai mai loko mai o ka popilikia.

                Make aku la ma Kanetona, Rev. Robert Morrison, ko Beritania missionari ma Kina, Aug. 1, 1834. He 53 kona mau makahiki.