Ke Kumu Hawaii, Volume I, Number 15, 22 July 1835 — Page 115
1835.) KUMU HAWAII. 115
na mea a lakou i heluhelu ai, ua mau loa ko lakou naaupo. Pela, o ka makemake ole i ka olelo a ke Akua, o ka noonoo ole ana i na mea e pono io ai, o ka naaupo no ia. Oia ka mea e nawaliwali ai, a e poino nui ai kanaka.
1. O ka naaupo, oia ka mea e hooemi nui ia mai ko ke kanaka pomaikai.
Heaha ka mea e lilo ai ka mea i kanaka? O ka manao. O ka noonoo ana i kona hopena: O ka noonoo ana i na mea e pono io ai kona noho mau loa ana. O ka noonoo ana i na mea a ke Akua i kauoha mai. I ko kekahi kanaka lilo ana i mea naauao, noonoo, ike a me ke akamai i kona wa opiopio; i kona lilo ana i kanaka ui naauao, a i kanaka makua naauao, a i kanaka elemakule naauao, ua nui loa kona pomaikai. Aka, o ka naaupo, oia ka mea e hooemi nui ia mai kona pomaikai.
E nana i ke kanaka naaupo. Heaha kana mea e manao nui ai? Ke manao nui ia i na mea e pili ana i ke kino. E like me na holoholona, ka puaa, ka pipi, ka lio, a me ke kao, pela ua kanaka la. Nui kona manao i ka ai, a me ka ia, i mau mea wale no e pono ai ke kino. Ina e hiki ia ia ke ai a maona, alaila e moe ilalo, a hiamoe; e ala, a ai hou, a hiamoe hou aku, manao ia ia ia iho, i pomaikai. Aole makemake ia i kekahi mea hou aku. Pela, hoohalike ka poe naaupo ia lakou iho me na holoholona, a me na mea kolo. Aole lakou ike i ka pomaikai o ka poe manao, a me ka poe noonoo. Aole lakou ike i ka pomaikai o ka poe ike—o ka poe heluhelu ma ka olelo a ke Akua. Aole hiki ia lakou, ma ka palapala, ke kamailio pu me ke Akua, a me ka poe kahiko, a me kanaka e noho ana, ma na aina a pau loa, i keia manawa. Pehea, aole hooemiia mai anei ka pomaikai o ua kanaka la? Aole nawaliwali anei ia i kona noho naaupo ana? J.S.G.
Ua hoouna mai ke Akua i kana Keiki i ke ao nei i ole e hoohewa mai i ko ke ao, i ola la hoi ko ke ao ia ia.
HE UI MISIONARI.
[E nana i ka aoao 109.]
HAKINA 10.
No na wahi i noho ai ka poe misionari.
NO KINA.
21. Heaha ka mea i mahaloia ma Kina?
O ka nui o kanaka malaila, ua manaoia, Ekolu haneri miliona o lakou; a ua paakiki loa ko laila olelo, ina i hoikaika ka mea malihini a hala na makahiki he umi aole i loaaia'i, a ua naauao iki lakou a akamai i kekahi hana.
22. Aole anei lakou i ike i ka mea e pono ai o ka uhane?
Aole; ua ike no nae i ka mea e pono ai ke kino, aka, aole lakou i ike ia Iehova, a me Iesu, a me ke ola no ka uhane, ua maa loa lakou mamuli o kekahi hewa. Ua hoolei wale lakou i ka lakou keiki hou, ke kaikamahine ia.
23. Heaha ka mea i hanaia no ko lakou ao ana?
Ua laweia ka olelo a ke Akua i ka lakou olelo iho, a ua hoolaha iki ia no hoi.
24. Pehea ko ke alii manao i ka poe misionari?
Aole oia e ae aku i ka noho o ka poe misionari ma kela aina, aole hoi e ao aku i kanaka. Aka ua holo ilaila kekahi mau kanaka misionari, no Beritania kahi no Amerika kahi, a noho no lakou mawaho o ka pa o kahi kulanakauhale, a hana no.
NO KE AUPUNI O BUREMA.
25. No ka aina hea la ka poe misionari ma Burema?
No Amerika, ua holo ilaila kekahi poe uuku, eha paha elima paha.
26. Ua huli anei kekahi mahope o ka Iesu olelo?
Ua huli io no kekahi poe, aka, haalele ka poe misionari ia aina no ke kuee ana o na'lii. A ua hoi hou aku ka poe misionari i keia manawa e noho nei. Elua a lakou kula.
NO INIA.
27. Pehea ka hana a ka poe misionari ma Inia?
Ua oi aku ka hana a na misionari ma Inia i ka ka aina e ae. Hookahi haneri misionari a me kumamalua i hoounaia ilaila, no kela aina kahi no keia aina kahi, a nui hoi ua kumu maoli.
28. Pehea ka lawe ana i ka olelo?
Ua laweia ka olelo maikai a me na palapala e ae i ka lakou mau olelo iho, a ua hoolahaia hoi.
29. Pehea ka lakou kula?
Nui wale ka lakou kula, i kela wahi kekahi, i keia wahi kekahi, he kanalima tausani haumana a keu. E mahuahua auanei paha ka pono.
30. Ua huli anei kekahi i ka pono?
Ua huli no kekahi poe, a ua paa mamuli o ka pono, ua ike lakou i ka oiaio, a ua okiia ae la hoi kekahi hewa o kanaka. Aka, lehulehu wale ka poe i hoomana i na akua i hanaia e lakou iho, a hoomau lakou ma na hana inoino loa.
NO KELONA.
31. Ehia misionari ma ia moku?
He kanakolu; no Europa kekahi, no Amerika kekahi.
32. Heaha ka lakou hana nui?
Ma ka lawe ana a me ka hoolaha ana i ka olelo a ke Akua, a me na palapala e ae; ao aku lakou i kamalii, a hai aku hoi i ka olelo maikai.
33. Ua huli anei kekahi i ka pono?
He nui no ka poe i huli. Nui na tausani o ka poe haumana. He nui hoi ka poe opiopio ka i huli i ka pono. Pau hoi ka hookauwa lihi ana o kakaka. Huli no kekahi kahuna no Budehu i ka pono, a ua hai aku lakou i ka olelo a Iesu.
NO NU ZELANI
34. Ehia misionari ma Nuzelani?
He umi misionari me na kumu