Ke Kumu Hawaii, Volume I, Number 18, 2 September 1835 — Page 139

1835.) KUMU HAWAII. 139

maoli malalo kekahi. Nui loa iho la kona nawaliwali. Ua iini nui no na makua i mea e pono ai ka laua keiki; aole nae e hiki ia laua ke hoola i ka ke Akua mea i manao ai e lawe. Ua manao pahu ke Akua i ka manao nui o na makua i ka laua keiki, a hoolilo mai ke Akua i ka make ana o ka laua keiki i mea e pono ai laua. Ia la a po, aole he leo, aole uwe, o ke kuhikuhi wale no o ka lima. Nui loa ke aloha o na makua i ka laua keiki. Ia po no, olelo maoli no kona makuakane maloko o kana pule ana aku i ke Akua, "E ka Haku e, aia no iloko o kou poho lima na mea a pau loa, aia no i kou manao, a me kou makemake, ina no oe i manao e lawe i keia keiki, ua pono. Mai kau nae oe i ka hewa o na makua maluna ona."
                Nui loa ka naenae o ke kaikamahine; ala wale no ia po a ao, o ka la umikumamakahi ia o ka malama. A ia la, eha ka laau o ka hooha inu ana, i luai mai, aole i luai. A i ka umikumamalua o ka hora pau pauaho iho la ia, a kailiili ka hanu, a nanahu iho la i kona lima a moku o ke aho no ia. A lalau aku la kona makuwahine, a ike iho la ia, ua kokoke e haalele mai ka laua kaikamahine, a lele loa ae la ka hanu, a make iho la.
                He ano e no ka make ana o Hanu, he maikai. Ua nana pono ae i ai kona makuakane me ka oluolu o kona mau maka. Me he hiamoe maoli la no ke ano maluna o ka uha o kona makuakane. A ike iho la ka makuwahine, ua make kana kaikamahine, hele akula ia i kahi e, e uwe ai i kana kaikamahine. A i ka umikumamakolu o ka la o Feberuari, laweia aku la i ka hale kula. O ka manawa ia e halawai ai na kamalii. Hoike aku la o Mi Dibele i na kamalii, "E, auhea oukou, e na kamalii? E nana oukou i keia pahu e waiho nei imua o ko oukou alo. He kaikamahine maloko, o Hana kona inoa. Ua make. Ua hele ka uhane; o ka hale wale no kiea. E, auhea oukou, e noonoo iho oukou, e make ana no oukou e like me nei kaikamahine. Nolaila e aloha aku oukou ia Iesu."
                A pau ae la ka pule ana, lawe ia aku la o Hana, a waiho ma kona lua.  KAIO.

O KA NAAUPO. - HELU III.
4. O ka naaupo, aia ka mea a nawaliwali ai ka ekalesia.

                Ua moakaka keia. No ka naaupo, aole lilo ka nui o kanaka i poe makaukau e komo iloko o ka ekalesia. O ka naaupo, oia ka mea e pono ole ai ka poe iloko o ka ekalesia. Kauoha mai ke Akua i kona poe kanaka a pau loa, e hooikaika i mahuahua ko lakou alohaia mai, a me ko lakou ike ana aku i ka Haku e ola'i ia Iesu Kristo: aka aole malama ka poe naaupo i keia kauoha a Iesu. Aole mahuahua iki ko lakou ike ana i ko lakou Haku. Pehea e mahuahua ai ko lakou ike ia Iesu, i heluhelu ole lakou i kana olelo? a i lohe lakou i kana me ka noonoo ole, a me ka manao ole? O ke komo ana o ka poe naaupo iloko o ka ekalesia, ua moakaka ia, aole e pono ka ekalesia malaila. O ko lakou komo ana, oia ka mea e nawaliwali ai ko Iesu ekalesia.
                5. O ka naaupo, oia ka mea e poino ai kanaka ma kela ao mahope. He mea ia e lilo ai lakou i poe makaukau ole e noho pu me ke Akua, ma ka lani.
                Ua akaka lea ia, aole loa e hana maikai ka poe ike ole i ke Akua, a me kana Keiki, a me kana olelo. Hookahi mea a ko Akua i haawi mai e ola'i kanaka, i kana Keiki, ia Iesu; "o ka mea i paulele aku ia ia, he ola mau loa kona." Aka, pehea e hiki i ke kanaka ke paulele aku ia Iesu, i kona ike ole aua ia ia? Ma ka olelo a ke Akua, nui na mea e pono ai ka poe makemake, ka poe heluhelu, aka, i ole lakou heluhelu malaila, pehea e pono ai lakou? Haawi mai ke Akua i kana olelo i ai na ka uhane o kanaka ; i mea e ikaika ai, a pomaikai ai ; aka aole e loaa mai i kekahi ua pomaikai la, ko makemake ole ia i kana olelo, ke heluhelu ole ia malaila. I ko na kanaka, a me na wahine, a me na kamalii noho ana ma ka naaupo, me ka ike ole i ka olelo a ke Akua, a, a me ka noonoo ole ana i na mea e pili ana i kela ao mahope, a me na mea e pono ai ka uhane, akaaka mai ka Diabolo. Manao no ia, aia no lakou e hoomakaukau ana e noho pu me ia ma keia ao ino malalo. Ua moakaka ia i kona manao, o ka naaupo, oia ka mea e hooemi nui ia mai ko ke kanaka pomaikai, a me ko ka hale, a me ko ke aupuni, a me ko ka ekalesia. Oia ka mea e mahuahua nui ai ka poe e noho pu me ia ma kona wahi ino. Makemake no ka Diabolo e noho mau kanaka, a me kamalii, ma ka naaupo; i noho lakou me ka noonoo ole, a me ka makemake ole i ka naauao, a me ka naau hou, a me ke ola. Hoowalewale pinepine mai ka Diabolo i kanaka e haalele i ka palapala, a e noho e ka naaupo i make pu lakou.
                E na kanaka naaupo o keia aina, pehea ka loihi o ko oukou noho ana pela? No ke aha la oukou i haalele ole i keia mea e poino nui ai? No ke aha la oukou e noho like me na holoholona, a me na mea kolo? Nani ko ke Akua lokomaikai i kona haawi ana mai i kana olelo. No ke aha i huli ole oukou malaila? No ke aha i hoowahawaha aku i ke Akua, a me kona lokomaikai, a me ka makana maikai ana i haawi mai ai? E huli koke oukou i ka ke Akua olelo. E lilo oukou i poe naauao.
                Ina paha e hele hou mai ka Haku, o Iesu i keia ao, a hiki mai i keia poe aina, hu ae la kona aloha, i kona ike ana i ka nui o kanaka me kamalii, e au wana ana me na hipa kahu ole. Oiaio no - he mea a makau loa, ka noho ana o kanaka me ka naaupo - aole ike i ka olelo a ke Akua - aole malama i ka la Sabati - aole komo iloko o ka hale o ke Akua, aole mihi i ko lakou hewa, aole manaoio aku ia Iesu. Ina ma keia pae aina o Iesu, e uwe nui no ia i kona ike ana i na kamalii a pau e noho ana ma