Ke Kumu Hawaii, Volume I, Number 19, 16 September 1835 — Page 147

1835.) KUMU HAWAII. 147

malama no ia i kekahi, e malama ole hoi i kekahi. Aole hoi e hiki ia ke malama pu i ke Akua a me ka mamona." Aole loa e hiki i ke kanaka e malama pono i ke Akua ke kau aku ia i kona makemake nui ma na mea o keia ao.
                O ka makemake i na mea o keia ao, he hewa nui ia. Ua like me ka hoomana kii. Oia hoi ma ke Kolosa 3:5. "Ka makee waiwai, o ka hoomana kii no ia." O ka mea hoomana kii, oia no ka mea hoomana ole aku i ke Akua, i hoolohe ole no hoi i kana olelo. Pela no ka mea makemake i keia ao. Ua lilo keia ao i akua nona. Oia kona mea e hoomana aku. Ua hoopoina ia ia Iehova, aole malama aku ia ia, aole hoolohe aku i kana olelo.
                Ma kekahi mau mea ua like loa ka poe makemake i neia ao me ka poe hoomana kii. O ka poe hoomana kii, aole lakou i pule ia Iehova. Aole pule lakou ma kahi malu, aole pule lakou me ka naau a me ka oiaio. Pela no ka poe makemake i keia ao. Aole lakou i pule ia Iehova me ka makemake nui ma kahi malu. Ua pule no paha lakou me ka waha a me ka manao ole, aole lakou i pule me ka naau a me ka oiaio. Ua like ka lakou pule me ke kani ana o ka manu a me ka nalu o ke kai. Aole ono lakou i ka pule. Aole makemake lakou e noonoo ma ka ke Akua olelo. Ua nui ko lakou noonoo ana i na mea o keia ao. D.B.L.

WAIMEA, Kauai, Sept. 8, 1835.

NO KA HOIKE.

                E na hoahanau, aloha oukou. Ua hoike iho nei makou i na haumana mai Nualolo a Hanapepe. Eia ko lakou nui 1145. Mai o a o ka poe ike i ka heluhelu a me ka poe ike i ke kahakaha lima. Aole i pau loa i keia hoike ana o ka poe i ike i ka heluhelu, a me ka poe kahakaha lima.

NO KA EMI ANA O NA KANAKA.

                Eia keia no ka emi ana o na kanaka. I ka la 8 o Sepatemaba, hoike makou a pau helu iho nei makou i ka poe hanau a me ka poe make. Mai ka malama o Mei a hiki i ka malama o Sepatemaba ka helu ana iho nei.
Ka poe make 73
Ka poe hanau 27
46
                Ua oi ka poe i make mamua o ka poe i hanau.
                Eia ko lakou ia, 46. Aloha ino lakou.
                E noonoo kakou. Eia paha. O ka hoopiha loa i ka opu i kela la i keia la o ka ai nui, a piha loa ka opu, a nui ke kino, a hikimai ka naenae, a mai, a make malaila.
                Ua olelo mai o Paulo, Aole ka pakela ai.
                Eia paha kekahi mea i make nui ai o ko keia pae moku. Ua hoopilauia ka hinaloa, a ua pai pu ia me ka hinihini i mea ai.
                E na hoahanau, e waiho aku ia, e oki aku, i hiki ai ia lakou ke hoonani i ka Haku.
Na DANIELA.

NO KO MOLOKAI.

KALUAAHA, Aug. 14, 1835.
                Auhea oe, e ka hoahanau, e Tineka. Eia ko'u wahi manao hoakaka ia oe. Iini au e palapala aku ia oe i mea kokua ia oe ma ke Kumu Hawaii, aka aole e hiki ia'u ia no kuu pihoihoi ana ma na mea e.
                Mamua o kuu holo ana i Lahaina me ka'u wahine, nui loa no na hana ma ko'u mau lima. O ke kukulu i hale kula pohaku kekahi, o ko'u hale noho kekahi, a o ka hale pule kekahi.
                Aole oia mau hana wale no, aia ma ko'u oihana ka nui. Elua a'u hoakaka ana'ku i ka olelo maikai ma ka la Sabati. Elua hoi a'u kula Sabati aa i kekahi mau Sabati ekolu no. - Hookahi ka hooakaka ana a'u i ka ke Akua olelo ma ka poakolu. He pule mahina hou kekahi a'u e malama, a ma ka halawai ekalesia. Ke malama nei no hoi au i ka pule kakahiaka o kela la o keia la.
                Aole nae i pau kau hana ma ia mau mea. O ke Kula kamalii kekahi hana nui. Nui ko'u manao ana ia kula. O ko kakou hale kula hou ua maikai. Kanalima anana kona loa a me kumamaha; a o kona laula elua ia anana a me ka ia, a o ke kiekie awalu paha ona kapuai. Ua hanaia ko loko i ka puna, a me ko waha. He mau puka komo elua, a me na puka makani aniani eono. - Ua hanaia na noho a maikai, a me na papa palapalalima a ua kau pono ia na palapala hoikehonua - a me kekahi mau papa eleele.
                Hookahi paha haneri a'u haumana – a ma kanalima. He poe kamalii no. Ua maheleia lakou i elima papa.
                O ka papa mua o ke ao nei lakou ma ka Hoikehonua - a me ke Kumu Hawaii, a me ka Olelo hoike holoholona, a me ka helu, a me ka palapala lima.
                Ao ka papa lua ma ia mau palapala no, ua koe nae ka Hoikehonua aole ia papa i heluhelu ia mea.
                O ka papa kolu ke ao nei lakou ma ka Ikemua - a ua kahakaha lakou ma ka papapohaku.
                O ka papa ha, he heluhelu ko lakou ma ka papapai eleele. Ua kahakaha no hoi ma ka papapohaku.
                A o ka papa lima, ma ka A wale no lakou. O ka poe a pau i ike i ka heluhelu, ua hai mai lakou i ka pauku ma ka "Ai o ka la" - a he hai pooolelo no hoi ko lakou ma ka po akahi.
                Oia no ke ano o ko makou kula kamalii e noho nei makou, he kula maikai no. Ke hooikaika nei makou ma na mea e pono ai na kamalii, ma o lakou ia ko makou manao nui. Ina o ke Akua kekahi pu me makou ina e pomaikai no, aka o makou wale aole e hiki.
                Ia makou i noho ai i Lahaina. Ua hanau ka lua o ka maua keiki, ma ka 22 o Iulai kona hanau ana - he keiki kane no. Ua haawiia aku nona ko'u inoa. Ua maha a ua kokoke ikaika ko Mika Hikakoke wahine. He mea e no ka lokomaikai o ko kakou Makua ia makou. Ke hooikaika no o Elikabeka i ke ao i ka Hawaii olelo - nui kona makemake e loaa koke, i hiki ia ia ka malama ana'ku i ke kula. Pomaikai makou i ke Akua i kona hoopae ola ana mai ia ia ia nei.
                O kau no au, me ke aloha io,
H.R. HIKAKOKE.

WAIMEA, Kauai, 1835.
                Aloha oukou, e na misionari a pau, mai Hawaii a Kauai nei. Ke hooikaika nei oukou i ke ao i na keiki a makou ma ke Kumu Hawaii, a i ka la Sabati, e alakai ma ka pono i na kamalii. A ua hoakaka mai ka makou kumu ma ka olelo a Paulo ma Timoteo, lua 2:1 E heluhelu au a maopopo loa. "O oe hoi, e ka'u keiki, e hooikaika ma ka pono iloko o Kristo Iesu."
                A ke ao nei na wahine a oukou, ke mau kula kamalii, a me oukou no hoi. A ke hoomaopopo nei oukou i na makuakane, a me na makuwahine, a me na makua hanai keiki, e alakai ia lakou ma ka aoao e pomaikai ai. Pela mai o Solomona.
                A ke hoike nei oukou, e na misionari a pau, ma ko Iesu pono; aole ko oukou pono iho. Aole oukou i hele mai no ka waiwai; aole oukou i hele mai e lawe i ko makou aina; aole oukou i hele mai i na waiwai o keia pae aina. I hele mai oukou e hoolaha i ke kauoha a Iesu Kristo; e ao i kana olelo; e alakai i na kamalii ma ka pono; a e hoohaumana i na kanaka a pau loa. Na DANIELA.
                E kuu keiki, mai haalele oe i ko'u kanawai, e waiho hoi i ka'u mau kauoha ma kou naau.
                No ka mea, oia ka nui aina la a me na makahiki o kou ola ana, a o ka malu hoi e haawiia oe.
                I ole e haalele ia oe ka lokomaikai a me ke aloha, e hawele ma kou ai, e kakau hoi ma ka papa o kou naau.