Ke Kumu Hawaii, Volume I, Number 19, 16 September 1835 — Page 150

150 KUMU HAWAII. (SEPATEMABA,

Bipi, no ka nele loa no i ka mea e ai ai.
                6. Aole no hoi e manao ka poe waiwai, he oluolu ko lakou ola ana, ke loaa ole ia lakou ka waiu o ka Bipi a me ka waiu bipi paa a me ka bata.
                7. Ua hanaia ka ili o ka Bipi i mea kamaa, a no na mea e, he nui loa. Ua hanaia kona mau pepeiaohao i mea kahi, a i au pahi. He ono kona io. O kona aila, ua hanaia i kukui keokeo. A o kona wawae, ua hanaia i mea pilali e paa ai ka laau.
                8. He lokomaikai io no ko ke Akua nana i haawi mai ia kakou i keia holoholona.
                l. Nui anei na aina i noho ole ia e ka Bipi? kakaikahi paha?
                2. Ma ka aina hea kahi oluolu i ka Bipi?
                Mahea kahi i nui ai kona kino? a mahea hoi i uuku iho?
                3. Ma ke aha ka maikai o ka Bipi? ma ka nana ana aku anei e like me ko ke Tiga? a kekahi mea e ae paha?
                4. Aole anei he holoholona e ae e pono ai na kanaka e like me ka Bipi?
                O ka Bipi kane anei ka mea waiwai loa? o ka Bipi wahine paha?
                5. Pehea ka poe ilihune ma Irelani a ma kekahi mau aina e ae, ke ole ka Bipi?
                6. Pehea hoi ka poe waiwai, ke loaa ole ia lakou ka waiu o ka Bipi?
                7. Heaha kekahi mau waiwai e ae o ka Bipi?
                8. Aole anei he lokomaikai ko ke Akua i kona haawi ana mai ia kakou i keia holoholona maikai?

AI O KA LA.
HELU 25
KA EPISETOLE A PAULO I KO ROMA.
MOKUNA 11: 30-36, 12: 1-13.

                30 Me oukou i hoolohe ole ai i ke Akua mamua, a i keia manawa ua loaa ia oukou ke alohaia mai, ma ko lakou hoolohe ole,
                31 Pela hoi lakou i hoolohe ole ai i keia manawa i loaa ia lakou ke alohaia ma ko oukou alohaia.
                32 No ka mea ua kuu iho ke Akua ia lakou a pau i ka manaoia ole i aloha mai ai oia ia lakou.
                33. Nani ka hohonu o ka waiwai a me ke akamai, a me ka ike o ke Akua; nani hoi ke kupanaha o kona mau manao, a me ka ike ole ia'ku o kona mau aoao.
                34. No ka mea owai la ka mea i ike i ka naau o ka Haku? Owai aku la hoi kona hoakukakuka?
                35 Owai la hoi ka mea i haawi e aku ia ia e uku hou ia mai ai ia?
                36 No ka mea nana mai, a ma o na la, a nona no hoi na mea a pau; ia ia ka hoonani mau loa ia'ku. Amene.
                MOKUNA xii. No ia hoi, ke nonoi aku nei au ia oukou, e na hoahanau, ma ke aloha o ke Akua, e haawi i ko oukou mau kino i mohai ola, hemolele, hooluolu, i ke Akua. Oia ka oukou hoomana ma ka naau.
                2 Mai noho oukou a hoohalike me ko ke ao nei, aka e hoopahaohao oukou ma ke ano hou ana o ko oukou naau, i hoomaopopo oukou i ko ke Akua makemake, ka pono, ka hooluolu, a me ka
                3 No ka mea, ma ka haawina i haawiia mai ia'u, ke olelo aku nei au i keia mea i kela mea iwaena o oukou, mai manao mahalo iho oia ia ia iho a pono ole ka manao, aka e manao hoohaahaa, e like me ka haawina o ka manaoio a ke Akua i haawi mai ai i keia mea a i kela mea.
                4 No ka mea e like me ka nui ana o na lala o kakou ma ke kino hookahi aole nae he oihana hookahi na lakou a pau,
                5 Pela hoi kakou he nui wale, hookahi hoi o kakou kino iloko o Kristo, a he mau lala kakou kekahi no kekahi.
                6 I ko kakou lako ana i na haawina like pu ole, mamuli hoi o ka haawina i haawiia mai ia kakou, ina he wanana, ma ke ana ia o ka manaoio,
                7 Ina he puuku, ma ka lawelawe puuku ana, a o ka mea e ao aku, ma ke ao ana,
                8 A o ka mea olelo hooikaika, ma ka olelo hooikaika ana. O ka mea haawi, me ka naau ku pono. O ka luna, me ka molowa ole. O ka mea hana lokomaikai aku, me ka hoihoi.
                9 O ke aloha, mai hookamani ia. E hoowahawaha i ka ino, e hoopili aku i ka maikai.
                10 E lauana aku kekahi i kekahi, ma ke aloha hoahanau, e hoopakele aku kekahi i kekahi ma ka hoomaikai ana.
                11 I ka hana mau ana, mai hoopalaleha, i ikaika hoi oukou ma ka naau, e malama ana i ka Haku.
                12 E hauoli ma ka manao lana, e hoomanawanui i ka popilikia, e hoomau ana ma ka pule.
                13 E kokua aku no ke nele o na haipule. E hookipa no.

KA HOOMOAKAKA ANA.

                Mok. xi. 30, 31 I ka wa mua, he poe malama ole ko na aina e, a no ka hookuli o na Iudaio, haawi ke Akua i ka euanelio i ko na aina e a hoolohe kekahi poe a lilo hoi i ohua pomaikai, i ka wa ia Paulo.
                Pela hoi na Iudaio e noho hookuli ana e hoohuli hou ia mai ma ka pono no ka ka pomaikai o ko na aina e. Malaila e kupu hou ai ko lakou makemake e pomaikai pu iloko o Kristo. Rom. xi. 13. 14.
                32 Ua kuu iho ke Akua i na Iudaio a me ko na aina e i ka manaoio ole i akaka ka hewa o kanaka, a i akaka lea hoi kona ahonui, a me kona lokomaikai wale i kona hoola ana ia lakou. Rom. v; 20. 21. ix: 18.
                33, Mahalo nui aku la o Paulo i ka lokomaikai nui wale o ke Akua, a me kona akamai loa a me ka ike wale, i kona aloha ana i ka poe hewa a i kona hoolilo ana i ka hewa o kekahi poe i mea e pomaikai ai kekahi poe. O ke Akua ike wale, ike mua, ike loa, oia wale no ka mea e hiki ai keia hana. He hana kupaianaha loa ia. Moakaka anei ke ano ia kakou?
                34 He kiekie loa, he hohonu loa ko ke Akua manao, owai la ke kanaka i maopopo ia ia kona manao, a me kana hana ana i keia mea luaole? Owai kona hoakukakuka i kokua ia ia? Isaia xi: 13.
                35 Owai la ka mea nana i haawi i ke akamai a me ka mana, a me ka waiwai ia ia, e pono ai ka ukuia mai? Aole loa.
                36 Aole mea i kokua ia ia e uku pono ia mai, no ka mea, na ke Akua mai na mea a pau, ma o na la hoi i mau ai na mea a pau, na ano hoi na mea a pau, nona na kanaka, a me na anela, nona ke ola a me ka mana a me ke akamai, nona na mea a pau e hoonaniia'i kona inoa. He pono ia ia ke hana mamuli o kona makemake iho i keia mea i kela mea. He pono hoi ke hoonani mau loa ia'ku ia e na mea a pau. Oiaio no ia.
                xii.1 No ia mea la, ea, e na hoahanau, ke hooikaika aku nei au ia oukou ma ka lokomaikai nui o ka Haku e haawi lilo aku ia oukou iho nona i mohai ola, aole i pepehiia e like me na mohai i hookaheia ke koko, i mea hana ikaika, i mohai e ola ana, i mohai kina ole, hala ole, hemolele, hoano, i mohai hooluolu i ke Akua, oia ko oukou malama oiaio ia ia me ka naau a me ka uhane. O ka hoomana me ka uhane no ia. Aole ke koko kahe ke haawi aku, aka o ko oukou ikaika e pau ke hoolilo nona.
                2 Mai hoohalike oukou me kanaka i hoopapau ma na mea o keia ao. Mai hana like me lakou, e hoopahaohao nae oukou i ano hou, i okoa ka hana ana a me ka manao ana, i pau ka naau i ka hana hou ia i naau hou, i hiki ia oukou ke hoomaopopo i ka makemake o ke Akua, i ka mea pono, i ka mea hooluolu i ke Akua, i ka mea hemolele.
                3 Ma ka oihana lunaolelo i loaa ia'u ke papa aku nei au i keia mea kela mea o oukou, mai hookano, mai haaheo, mai mahalo hewa ia ia iho, e manao