Ke Kumu Hawaii, Volume I, Number 20, 30 September 1835 — Page 160
160 KUMU HAWAII. ( SEPATEMABA,
3 He mea e makau ai na'lii no ke aha?
Ina manao ee e pilihua ole i ke'lii pehea la?
A i hana oe ma ka pono hoaponoia oe e wai?
4 He mea aha kana kauwa ana na ke Akua?
A i hana hewa oe, pehea?
Ua loaa i ke'lii ka pahi kaua i aha?
He ilamuku ke'lii no ke aha?
5 No ke aha la e hoolohe ai?
6 No ke aha la e hookupu ai?
7 E haawi aku i ke aha i na'lii a me na kanaka?
KAHI MELE.
HE MELE AHIAHI NO NA KAMALII.
1. Ua iho no ka la,
Ua hiki mai ka po:
Na moa, a me na kaloa,
Ua hiamoe lakou.
2. Na hipa me na kao
Iloko o ka pa;
Na bipi kauo aia no
Ua hemo ae ke kaa.
3. I keia la maikai,
Pehea iho la wau?
Aole eha, aole mai;
Pomaikai wale no.
4. Pehea kuu naau ?
Ua hewa wale no;
Aole pili ia Iesu,
Ka alana ola mau.
5. E ke Akua, e,
Mai huhu wale ia'u,
E kala mai i kuu hewa nei,
I make ole au.
6. A moe ilalo au,
E kiai pono mai,—
E kiai i kuu uhane nei,
A me ko'u kino nae. L.
NO KA PULE MALAMA HOU.
"E hiki mai kou aupuni."—Mataio 6: 10.
E na hoahanau, ua akoakoa ae nei kakou i keia alualu e pule i ke Akua peneia;—"E hiki mai kou aupuni."
I ko oukou manao , he mea nui anei? a he mea liilii anei keia hana?
Ua hiki mai kakou, ea! e pule i ke Akua, e hiki mai kona aupuni iloko o ko kakou mau naau; i pio ka pouli maloko; a e hoopihaia kakou i ka malamalama, a me ka ike, a me ke aloha aku.
Eia hoi kekahi hana i keia manawa. E pule i ke Akua no na'lii, a me na kanaka a pau o keia pae aina ; a e nohoi aku hoi ia ia e alakai i ke alii nui i ka mihi, a e haawi mai ia ia i ka naau hou, a hoolilo ia ia i mea alakai pono no na mea a pau ma Hawaii nei.
E nonoi hoi i ke Akua e hoiho mai i ka Uhane Hemolele maluna o na kumu a pau, a maluna hoi o na ekalesia a pau, a e kokua mai ia lakou e pule "i na uwe ana aole i ekemu ae.'' Alaila, e ike ka poe hewa i ko lakou naau iho; e kaumaha lakou; e makau, a e weliweli hoi imua o ke alo o ke Akua. A e hele koke kela mea keia mea i na kumu e ninau aku me ka naau walania peneia;—Heaha ka'u e hana'i i ola au?"
Eia hoi kekahi. Ua pono ia kakou ke pule no na kumu a me na ekalesia ma na aina naauao. Nui na kane ui a me na wahine ui malaila iloko o ka ekalesia, aka aole lakou i manao nui i ka ilihune a me ka naaupo, a me ka piliia o na kanaka ma na aina naaupo.
Nolaila, aole lakou i hoomakaukau ia lakou ilio e hele i na aina e, e ao aku i ka poe ike ole. Nolaila hoi, ua pono ia kakou ke pule i ke Akua e kulukulu mai ia lakou ia mau mea, a e paipai ia lakou e hele e ao aku i ka poe naaupo; a e paipai hoi i na kahuna pule malaila e nonoi aku i ka lakou mau haumana e hoolohe i ka Iesu kauoha.
Ua pono hoi ke pule i ke Akua i keia manawa no na misionari a pau ma kela aina naaupo keia aina naaupo, e hooikaika ia lakou i na hana maikai a e kokua ia lakou e hoike pono i kanaka i ko lakou hewa a me ko lakou Kalahala; a e nonoi aku ia lakou e hoolaulea i ke Akua.
Auhea oukou, e na hoahanau? ea! Ke ike pono nei anei oukou i ka hope o ka poe pono, a me ka hope o ka poe hewa? He mea akaka anei ia oukou ka loihi o ka olioli ana o ka poe pono i ka lani? a me ka loihi o ka ehaeha ana o ka poe hewa iloko o ke ahi pio ole?
E hele oukou i ke kahakai, a e helu i na one liilii a pau a puni o kela aina keia aina o Hawaii nei.
Ehia one paha? E pane mai oukou peneia paha; "Aole hihi – ua nalowale loa - o ka heluia aole e pau."
Pela no hoi ka helu ana o na makahiki a ka poe hewa e moea ana iloko o ka lapalapa, iloko o ke ahi pio ole! Lehuluhu na makahiki, o ka heluia aole e pau.
Nolaila, ua hookaawaleia keia la e ka poe pono e pule i ke Akua e ninini mai i ka Uhane Hemolele, a e hoohuli mai i ka poe naaupo, a me ka poe hewa a pau i ka pono, e hoolilo ia lakou i poe pono i poe manaoio ia Iesu Kristo; malaila e pakele ae lakou i ke ahi pio ole.
E noonoo nui oukou i ka hope o ka poe naaupo a me ka poe hewa a pau ; a e pule hoi me ko oukou naau a pau ia Iehova e kala mai ia lakou ; a e haawi mai ia lakou i ke ola mau. Pela e hiki mai kona aupuni. L. S.
NO NA MOKU.
O KA HOLO MAI.
Sep. 20 Packet, Proctor, mai Borabora mai, 22 mau la.
24. Vineyard, Tobey, Edegatona, 36 mai. 2,100 bar.
26. Adaline, Buckley, Nuberepota, 22 mai. 800 bar.
O KA HOLO AKU.
23. Garafilia, Seymour, Amerika Hema.
HALE PAIPALAPALA, Sep. 1835.
Ua pai hou ia ka pepa 1, 2, 3, 4, 5, o Ke Kumu Hawaii. Ina i nele kekahi, he pono ke kii mai, a loaa aku.