Ke Kumu Hawaii, Volume I, Number 21, 14 October 1835 — Page 165

1835.) KUMU HAWAII. 165

hiki mai ka mai ia Simeona; pihapiha mai ka opu, holoi iho la i ke kai, a maha, komo ka ai, a hiamoe, A, aumoe, i ae i kana wahine, "E lomilomi mai i ko'u lima." Lomilomi iho la, a oluolu hiamoe hou. A, wanaao, kunu a kuha aku i ke koko, a luai koko, aole nae he nui. Ninau mai la o Debora, "Heaha keia mea ulaula?" I aku la Simeona, "He koko, a pomaikai au ilaila, no ka mea, ua luai pinepine au i ke koko mai ko'u wa kamalii a hiki i keia manawa, a ia'u i luai i ke koko, o ka maha koke no ia.'' I mai la Debora, "Aole kaua ike pono." Alaila, pa mai la o Simeona i kona lima i kona umauma, i ka i ana'e "Eha! e neenee aku,'' haule ma kahi moe, a make loa iho la. O Debora laua Kamualii wale no me ia, ia manawa. Ua pau pu na kanaka o laua i ka hiamoe. Kii aku la o Kamualii ia Haupo, a hele mai oia, ua maopopo, aole hanu, ua make loa. Aole akaka ka mai, ke kumu o kona make, ua moku paha kekahi aa maloko, a nolaila paha kona make ana He oiaio ka Iesu i i mai ai, "Aole oukou e ike i ka wa e hiki mai ai ka Haku, i ke ahiahi paha, i ke aumoe paha, a i ke kani ana o ka moa, a i ke kakahiaka." Ua kailiia'ku o Simeona i ka hora ana e manao ole ai. Aka, ua noho oia me ka makaukau. Ua lawe pu oia i ka aila iloko o kona ipu kukui, nolaila ua hele pomaikai. Pomaikai ka poe make, ke make iloko o ka Haku, ma keia hope aku, e hoomaha lakou i ko lakou luhi, a ke hahai nei no hoi ka lakou hana ana mahope o lakou.
                Hoouna koke mai o Debora i kekahi elele e hoike mai ia'u, a hoouna no hoi i kekahi i Koloa, a i Waimea. Holo koke aku la au, a hiki i Wailua, i ke ahiahi i ka lima o ka hora. Uwe iho la i ka nana'ku i ke kupapau o ko'u hoahanau. Ua lilo kekahi kanaka nui o ko Hawaii nei. Ua nalo kekahi hoalawehana maloko o keia Kihapai a ka Haku. Auhea ka pani o keia hakahaka?
                Ua ae mai no o Debora, he pono i ke Akua ke hoonele mai ia ia, i ka i ana mai, e like me Ioba, "Na Iehova no i haawi mai, nana no i lawe, e hooalohalohaia ka inoa o Iehova."
                I ka 7 o ka hora hiki mai Mika Gulika. Aole hiki ia MikaWini ke hele mai no ka mai o kana wahine.
                A i ka la Satude ahiahi, ua nalo oia iloko o ka lua kupapau ma Wailua. aole kakou ike maka hou ia ia.
                He pono e hoomanao kakou, aole e hiki wale mai keia; na ke Akua no. A, ke kahea mai oia ia kakou, penei, "O oukou hoi kekahi auanei, nolaila, e hoomakaukau e halawai pu me ko oukou Akua." E hana koke kakou i ko kakou mea e hana aku ai, no ka mea, aole loa kakou i ike i ka la apopo; no ka mea, heaha ko kakou oia? He mahu no ia i pua iki ae, alaila ua nalo ia. Na'u na kou kaikaina. W.P.A

NO KA MAKE ANA O SIMEONA KAIU.

WAIMEA, Sepatemaba 26, 1835.

                Aloha oe e Tineka. Eia ko'u manao ia oe. Ua make iho nei kekahi hoahele o kaua, o Simeona Kaiu, ua make no ia. Aole nui o kona mai ana, a make no. Ua moku paha kekahi aa koko ma ka houpo, a paa ka hanu, make loa iho la. O ka la 11 o Sepatemaba, ka la i make ai. Ua ike no kaua i kona noho ana, ia kaua i holo ai i Nuuhiwa a hoi mai. Oia mau no kona oluolu, a me kana hana ma ka pono o ko kakou Haku. Ua hele aku o Simeona laua o Debora ma Wailua, i keia mau malama aku nei, e hoolaha i ka ke Akua olelo. E hooike aku i kela poe naaupo i ka pono. Ua noho mai no ia ilaila a loaa ka make ia ia. He hoahanau aloha nui ia ma Kauai. Ke ue nui ko keia aina ia ia e noho nei. Oia no kekahi o na hua mua i ohiia mai, ma Hawaii nei. Ua bapetisia i ka malama o Dekemaba, 1825. Ma Honolulu ka bapetiso ana me Kaahumanu ma. Maia manawa mai, a make ia, aole makou ike i kona hewa, ma ka pono wale no kana hana ana, a makou i ike ai. Aole no i hoomaopopo mai o Simeona i kona manao i ka hele ana, no ka mea, ua loaa koke ka make ia ia. Iloko o kona noho ana mawaena o makou, ua ikea na hua o ka Uhane. Nolaila, ke manao nei makou he pomaikai kona i ko kela noho ana. "Pomaikai ua kauwa la ke ike mai kona Haku ia ia e hana ana pela, i kona hoi ana mai."—Luka xii - 43.
Na WINI.

NO NA KAHUNA PULE.

                O ka poe hai aku i ka olelomaikai, e ola no lakou ma ka olelomaikai.
                Ua lokomaikai ke Akua i na kanaka a pau. Aole ia i haalele i kekahi poe me ka nele loa i loaa ole na mea e poao ai ka noho ana ma ka honua nei.
                O ka poe mahi ai, haawi ke Akua i na mea ola no lakou ilaila. O ka poe hooikaika nui hoi i ka lawaia ana, haawi mai la ke Akua ia lakou i na mea e pono ai ko lakou noho ana. Haawi mai no ke Akua i ka ia, i mea e ai ai, a i mea e kuai i ka ai, a me ke kapa. O ka poe kalepa loaa ia lakou malaila ka mea e kuai ai i ai a me kela mea keia mea e pono ai. A hana pono kekahi i ka oihana a ke alii, ua ae mai no ke Akua i loaa ia ia malaila na mea e pono ai kona noho ana. O ka poe kahuna kalai waa hawawa ole, a molowa ole hoi, ua ae mai ke Akua i loaa ia lakou na mea a pau e pono ai ko lakou noho ana, i ko lakou malama ana i kela oihana. O ka poe kahuna lapaau naauao i imi nui ma na palapala i ke ano o kela mai o keia mai, a me ka laau pono, a me ka laau pono ole, ua ae mai ke Akua i loaa ia lakou na mea e pono ai i ko lakou malama ana i ka lakou oihana. O ka poe kumu hooikaika nui e ao aku i ka palapala, ua ae mai ke Akua i malamaia lakou e ka poe launa aku i ka ike a me ka naauao. I ka wa kahiko, ua hookaawaleia ka ohana a Levi e hana i ka oihana o ka luakini. Aole lilo lakou i kekahi hana e ae. Aole ke Akua i haawi ia lakou i ka aina i mahi ai lakou. Aole i makemake ia i ko lakou lilo ana i ka hana e. Kanawailua 10: 8, 9. I kela manawa hookaawale ae la o Iehova i ka ohana a Levi e halihali i ka pahuberita o Iehova, e ku imua o Iehova e lawelawe nona, a e hoomaikai aku ma kona inoa, a hiki i keia la. No ia mea aole he kuleana o ka Levi, aole he hooilina pu me kona poe a hoahanau; o Iehova, oia kona hooilina e like me ka Iehova kou Akua i olelo mai ai ia ia. Kanawailua 18: 1, 2. Aole kuleana, aole hoi mea no na kahuna, na mamo a Levi e ili pu mai me ka Iseraela, aole hoi no ka ohana a pau a Levi: e ai no lakou i ka mohai no Iehova i puhi i ke ahi, a me ka mea e ili mai ana nona. No ia mea, aole o lakou hooilina iwaena o ko lakou poe hoahanau o Iehova oia ko lakou hooilina e like me kana i olelo mai ai ia lakou." No ka loaa ole i ka ohana a Levi ka hooilina iwaena o kona poe hoahanau, kauoha aku la ke Akua i ka Iseraela a pau e malama aku ia lakou. Kanawailua 18: 3, 4. Eia ka ke kahuna wahi na na kanaka mai, na ka poe e kaumaha aku i ka mohai, i ka pipikane paha, i ka hipa paha: a e haawi aku lakou i ka uha mua a me na papalina elua, a me ke opu na ke kahuna. O ka hua mua o kau palaoa, o kou waina, a me kou aila, a o ka hulu ako mua o kau poe hipa, e kau ia e haawi aku ai nana.
D.D.L.