Ke Kumu Hawaii, Volume I, Number 21, 14 October 1835 — Page 168

168 KUMU HAWAII. (OKATOBA,

                Ua kukuluia, a paa ka hale kulama Harefora, 1817.
                Ua ike kekahi o makou, oka poe kahuna pule, i keia hale a me na kumu, a me na haumana iloko. "Ua nui ka poe kuli i hele malaila; ua ao lakou a ua ike.
                E heluhelu no lakou i ka palapala, a ua ike pono lakou i ke ano. Ma ka naau no e heluhelu ai, aole leo, aole lohe na pepeiao. Me ka lima no e kamailio ai; a me ka lima no e kakau iho ai i ko lakou manao ma ka pepa. Ua lilo lakou i poe naauao. Ua aloha nui ia kela kula." Hookahi wahine o lakou, aole ona lohe, aole leo, aole maka e ike ai; - he kuli, he aa, he makapo no hoi. Aloha wale ia.

KA MANAO O KEKAHI KAIKAMAHINE KULI, MA KA HALE KULA NO HAREFORA.

                I ko'u hanu ana, make kuu makuakane. Aole au i ike ia ia; no ka mea, he kamalii uuku wau. A hala hookahi makahiki o'u, a i ka lua, aole o'u kuli, ua lohe no au. Hele pinepine au me na keiki malolo o na laau ma ke kihapai.
                Ia manawa, ua nui ko'u mai a aneane make, aka ua maha'i; aole lohe, aole kamailio hou. Ua lilo au i mea kuli, aole hiki ke kamailio. Ua manao au, kaumaha ka naau o ko'u makuwahine, no ka mea, ua pau ko'u lohe a me ko'u kamailio.
                Ua malama pono ko'u makuwahine ia'u. Ua hoomanao au, ua make kekahi hoahanau o'u, ua ike au ia ia; aole minamina au, no ka mea he naaupo au.
                Hele mai kekahi kanaka ilihune ma ka hale o kuu makuwahine. Hakapono oia ia'u. Nui ko'u makau ia ia. Lawe oia i ke koi iini a me ka puolo nui maluna o kona kua. O ko'u manao, he kanaka pepehi ia, he maka huhu kona. Holo aku la au a pee malalo o kuu wahi moe. I mai la ko'u makuwahine, "Aole ia e pepehi ia oe, no ka mea, he kanaka maikai ia." Aole pela ko'u manao.
                Noho kekahi kaikuaana o'u ma Utika, N.Y. He amara no ia. Ua hala elima mau makahiki aole au i ike ia ia. Ua lohe au, ua mareia ia me ka wahine ui, a ua noho pu laua me ka oliolio. Pomaikai laua i ke kamailio pu ana. He wahine maikai kana, a malama pono oia i kana kane. Ke pule nei au i ke Akua e hoopomaikaiia laua me kana wahine. Eia ko'u makemake, i aloha laua i ke Akua, me ka malama aku ia ia, a me ka pule, a me ka paulele aku ia Kristo, i mea e ola'i.

KAHI MELE.

HE NANE.

Kekahi malihini,
He kamaaina hou;
He alakai moowini,
He ili ula no;
A launa wale aku
Na kanaka, na 'lii,
Aole i kipaku
ko ka lewa nei.

He mooomole hewa
Ka mea i hanau;
Oolea me ka newa
Ka aahu kamahao,
He wahi kapuwahi
Ka paipai no ia nei;
He huewai waiahi
Ko ia la noho e.

Ka inoa hookamani
Laauikaikaai;
Ma kona mana nani
E ikaika ai ka mai;
O kona poe puni,
A maa i ka hoao,
Ua wela i ke kuni;
Pouli ka naau;

He halelua kona,
Hamama hewa no;
Na hoalauna ona,
Ua komo maka po;
A hune, a poino,
Hihia, eha pu,
Ko laila waiwai lilo.
He manomano no.

Kii mai ia luna hewa,
Ua lawe makaukau
I pahi me ka newa,
E luku ia kakou;

He powa puni koko,
Aloha ole no;
Pehea la ke noho
Iwaena o kakou?

"E make keia make,
Ua hai ke kanawai;
Ua hewa pono wale
Ia powa kipa mai;
E paa ka powa mana,
Hoopio koke no;
Ua akaka kana hana,
He make no kakou.

E eu, e hookunaina,
Hoohewa, a hoopai;"
Pela ke kiaaina,
Me kona akamai;
"Auhea na ilamuku?
E lawe pu oukou;
E lawe, e hailuku,
Kinai, a nalo mau.

Na halelua ino,
E hoohiolo pu,
I nalo ka poino,
I pomaikai kakou;
Ka mooomole hewa,
E wahiia ke poo;
Na kapuwahi wela,
E oki loa lakou."

E kanaka maalea,
E na lii akamai,
Oukou hoi ko ka lewa,
Ko uka, me ko kai,
E koho i kuu nane,
A hoakaka mai,
No ko oukou uhane,
I hana e ola'i.

                Aole oe e hopohopo i ka mea makau ke emoole mai, aole hoi i ka luku ana i ka poe hewa ke hiki mai.
                No ka mea, o Iehova no kau mea e paulele ai, e malama no oia i kou wawae aole ia e hoiia mai.
                Mai hoopaa oe i ka maikai o ka mea nana ia, ina e hiki i kou lima ka haawi aku.
                Mai olelo oe i kou hoanoho. O hele oe a hoi mai, apopo e haawi aku au, ke waiho wale ia mea nau.
                Mai imi hala oe i kou hoanoho a hihia, no ka mea, noho malie no oia me oe.
                Mai hoopaapaa oe me ke kanaka hala ole, ina aole oia i hana hewa aku ia oe.
                Mai hoomahui oe i ko kanaka hana hewa, Mai koho hoi oe i kona mau aoao.
                No ka mea, he hoopailua ia Iehova ka aia, o ka poe pololei oia kona anaina.

                Ua paiia KE KUMU HAWAII ma ka mea Paipalapala a na Misionari, Honolulu, elua hebedoma hookahi papa, o Wenede ka la e pai iho ai.
                Eia ke kuai ana, HOOKAHI MAKAHIKI $1 00, a na mea e lawe i ka pepa a pau.

Oahu: Mision Press. - R, TINKER, Editor. E.O. HALL, Printer.