Ke Kumu Hawaii, Volume I, Number 23, 11 November 1835 — Page 177
KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 1. HONOLULU, OAHU, NOVEMABA 11, 1835. Pepa 23.
HE HUAKAIHELE MALUNA O NA KAMELO.
1. Aia ma na auakua one o Aigupita a me Arabia kahi e hele nui ai na kanaka maluna o na Kamelo. Ua akea ia mau auakua a ua oneanea.
2. A ma ia mau auakua, ua nui wale ka poe powa, he poe holoholo e kaili wale i ka waiwai a ka poe e hele ana ma ke alanui.
3. Nolaila, aole e pono i ke kanaka ke hele malaila oia wale no; o ka hele huakai nui, oia ka pono. Hui no ka poe e hele ana, a hele pu, a puka loa lakou i kela aoao o ke auakua.
4. He nui loa kekahi huakaihele he tausani no kanaka lakou, a he tausani paha Kamelo.
5. Ua oleloia na huakaihele ma Arabia a me Aigupita mai ka wa kahiko loa mai. Ua kuaiia'ku o Iosepa i kekahi huakaihele e iho ana maluna o na Kamelo mai Arabia aku a i Aigupita.
6. He hele malie ko na Kamelo, ke hele huakai ma na auakua. Aole loa lakou e holo, me lakou e holo ai i ka hele pokole ana, ua manao lakou i ka loihi.
7. Aole e hele mama lakou ke hahauia i ke kaula e like me ka hahau ana i ka lio. Aka, i ka wa e maloeloe ai ke Kamelo, alaila, mele aku ka mea hooholo i ke mele, a hokiokio paha, oia ka mea e mama ai kona hele ana. A lohe ke Kamelo i ka leo mele, a i ka hokiokio ana, hele mama ia, a e like me ka ikaika o ka leo i ke mele ana a me ka hokiokio ana, pela ka ikaika o kona hele ana.
8. Ina e hoomaka na kanaka i ke mele ana a i ka hokiokio ana, aole e hiki ke hooki a po ka la, no ka mea, ina e oki ke mele a me ka hokiokio ana, alaila, ku malie ke Kamelo. Nolaila, ina e paupauaho kekahi kanaka o ka huakaihele, alaila, mele mai kekahi a pela e mau ai ko lakou hele ana.
1. Mahea kahi e holo nui ai na kanaka maluna o na Kamelo?
Pehea ke ano o ia mau auakua?
2. Heaha kekahi poe e holoholo ana ma ia mau auakua?
3. Pehea ka hele pono ana ma ia wahi?
4. Pehea ka nui o kekahi huakaihele?
5. I ka manawa hea i olelo mua ia'i ka huakaihele ma Arabia a me Aigupita?
6. Pehea ka hele ana o na Kamelo, ke hele huakai ma na auakua? he holo paha? he hele malie paha?
7. Heaha ka mea e mama ai ko lakou hele ana?
8. Ina e oki ke mele a me ka hokiokio ana, pehea na Kamelo?
NO KA MAKEMAKE I KEIA AO.
HELU 8.
Auhea oukou, e na hoahanau, e pono anei ia kakou e makemake i keia ao? E noonoo pono kakou i keia mau manao maopopo. O ka mea makemake i keia ao, he mea ku e ia i ke Akua. O ka poe makemake i keia ao, ua haalele lakou i ke Akua. Ua makaukau no hoi ko lakou naau e hana i na mea pono ole a pau. O ka makemake ana i keia ao, he mea ia e make ai ka uhane, he mea hooemi i ko Iesu aupuni, he mea e hooinoinoia'i ka ekalesia a e hoowahawahaia'i ka inoa o Iesu a me kana olelo.
E pono anei ia kakou e ku e i ke Akua, e haalele ia ia, a e noho makaukau e hana i kela hewa i keia hewa? E pono anei ia kakou e pepehi i ko lakou uhane iho? E pono anei ia kakou e noho wale, aole hooikaika i ko kakou poe hoalauna a me na makamaka ma ka pono, aole pule aku i ke Akua no lakou? E pono anei ia kakou e ana i ka kakou waiwai, aole haawi aku i kekahi e hoouna aku i na kumu a me na palapala i na kanaka naaupo? Oia ka mea e make ai ko lakou uhane. E pono anei ia kakou e hoolilo i ka inoa o Iesu a me kana olelo i mau mea hoowahawahaia no ka kakou hana kekee ana? Ina aole pono ia kakou e hana pela, "mai makemake aku i ke ao nei, aole nae i na mea o keia ao." Mai noho me ka puniwaiwai.
Mai hahai mamuli o kela kuko lapuwale, keia kuko lapuwale. Mai imi i ka lealea, a me ka mahaloia mai e kanaka.
Mai hoopalaleha i ka hana maikai. E hooikaika nui i lilo oukou i poe haipule io, i poe ikaika i ka malama ana i ka ke Akua olelo. E malama ia oukou iho, o kaumaha uanei ko oukou naau i ka uhauha ana, a me ka ona ana, a me ka manao ana ma keia ao." "O ka poe a pau i hooikaika i ka uku,